Genesis
12 Chasnami, Isaac chi pistuibi muyugunata tarpui callarira, chi huataibi tarpushcamanda 100 yali cutin muyuta pallara, Jehova paita bendiciashcamanda. 13 Casna rasha, cai runaga mas cullquita charisha, yapa cullquiyuc tucura. 14 Manacailla ashca huagrata, ovejagunata, paita sirvic runagunatas charira. Chiraicumi, filisteoguna envidiai callarinaura. 15 Chasnami, filisteogunaga paihua yaya Abrahanda sirvic runaguna allashca yacu pugrugunata allpahuan tapanaura. 16 Chimanda Abimelec Isaacta nira: “Ñucanchimanda caruma causangahua ri, can ñucanchimanda mas ushayuc tucushcamanda”. 17 Chasnami, Isaacca chimanda llucshisha, Guerar pambata rira, chibi causangahua callarira. 18 Issac paiba yaya Abrahan allashca yacu pugrugunata cuti pascara, filisteoguna Abrahan huañushca huasha chi pugrugunata tapashca anaura. Chimandas, chi yacu pugrugunata paiba yaya shutichishca shinallata shutichira. 19 Chi pambai allaushcaibi, Isaacta sirviccuna yacu pugruta tupanaura. 20 Pero, Guerar llactamanda pastorguna Isaacpa pastorgunata piñangahua callarinaura, casna nisha: “Ñucanchi yacu man”. Chimandami, Isaacca chi yacu pugruta Ésec nisha shutichira, paihuan piñanacushcamanda. 21 Chasnallata, shuc yacu pugruta allai callarinaura, chi runaguna cai pugrumandas cuti piñai callarinaura. Chiraicu, pai chi yacu pugruta Sitná nisha shutichira. 22 Huasha, chimanda risha shuc yacu pugruta allai callarira, pero chi pugrumanda ña mana piñanaurachu. Chimandami, paiga Rehobot nisha shutichira, casna nisha: “Cai tucuitaga Jehovami cushca. Pai bendiciashcamanda, ñucanchita atun pistuta cuitucuscanchi, cai llactaibi ashca tucushcanchi”. 23 Chi huasha, chimanda Beer-Seba llactama rira. 24 Chi tuta, Jehova ricurisha paita casna nira: “Ñucaga camba yaya Abrahanba Dios mani. Ama manzhaichu, canhuan mauni. Bendiciashcanguimi, camba miraigunata ashcata mirachisha, ñucata sirvic Abrahanmanda”.