Genesis
16 Labanga ishcai ushigunatami charira: paiba rucu ushiga Lea shuti mara, malta ushiga Raquel shuti mara. 17 Leaga mana yapa gustu huarmi chara. Raquel randiga, ali gustu sumac huarmi mara. 18 Jacob Raquelta munasha Labanda nira: “Camba quipa ushi Raquelmanda canzhis huatagunata tarbasha”. 19 Laban randi nira: “Chican runagunata cuna randiga, candami cushcangui. Ñucahuan causangahua saquiri”. 20 Jacobca canzhis huatagunata, Raquelta apingahua tarbara. Pai ñahuibiga ansa puzhahuaguna shina pasara, cai huarmita yapa munashcamanda. 21 Timpu pasashcai Jabob Labanda nira: “Ña timpu pactarishcami. Ñuca huarmita cuhuai, paihuan puñungahua”. 22 Chasnami, Labanga vecinogunata tandachisha, micungahua istata rara. 23 Tutayashcaibi, Raquelta cuna randiga, paiba ushi Leata apisha, Jacobhuan puñuchingahua apara. 24 Labanga paita sirvic Zilpá nishca huarmita paiba ushi Leata cura, paita sirvichun. 25 Cayandi tutamanda, Jacob Leahuan puñusha pagarishcata ricura. Chimanda, Labanda nira: “Imatata rashcanguia. Raqueta apingahuami, canzhis huatagunata cambaraicu tarbarani. Imahuata umahuashcangui”. 26 Laban randi nira: “Cai llactaibiga rucu ushi mana apigllaita, malta ushita mana cuna chan. 27 Punda, cai huarmita apishcamanda semanata istasha pasai. Cuti canzhis huatagunata ñucaraicu tarbashca huasha, Raqueltas apinguimi”. 28 Jacobca ari nira. Chasnami cai huarmita apishcamanda shuc semanata istara. Chi huashami, Labaga pai ushi Raquelta Jacobta cura. 29 Labanga paita sirvic Bilhá nishca huarmita paiba ushi Raquelta cura, paita sirvichun