Esdras
1 Persia llactamanda rey Ciro punda huatata mandaushcaibi, Jehovaga Persia llactamanda rey Cirota, paiba tucui mandana llactaibi shuc leyta churachun mandara, Jehova Jeremiasta rimachishca pactarichun. Cai quillcashca leyga casna nic ara: 2 “Persiamanda rey Ciro caita nin: ‘Jehova, cielomanda Dios, cai allpai tucui mandanata cuhuashca, Juda llactaibi ac Jerusalenbi, pairaicu huasinata mingahuashca. 3 Paihua llactamanda runaguna, Dios paigunahuan auchun, Juda llactaibi ac Jerusalenda sicanauchun, Israel llactamanda Dios Jehovahua huasita alichinauchun. Paimi sirtu Dios an, Jerusalenbi paiba huasi aura. 4 Paiguna mayambi causac runaguna, maibi causacpihuas Israelmanda runagunata yanapana manaun. Cullquita, curita, huagragunata, ima charishcatas cunauchun, Jerusalenbi sirtu Diospa huasiraicu shungumanda munashcata cunauchun’”. 5 Chasna acpiga, Benjaminhua, Judahua caran ailluta cuirac cariguna, sacerdoteguna, levitagunas, sirtu Dios mingashca huin runaguna, Jerusalenda sicasha Jehovahua huasita cuti shayachingahua alichirinaura. 6 Paiguna mayambi causac runaguna cullquita, curita, huagragunata, balic cosascunata cusha yanapanaura. Chimandas, shungumanda munasha imatas cunaura.