Ageo
2 “Manzhanaita Ushayuc Jehova, caitami nin: ‘Cai llacta nin: “Jehovahua huasita tarbana timpu charamana pactamushcachu”’”. 3 Profeta Ageomanda cuti Jehova rimashcata uyaranchi: 4 “Cai huasi huaglishca acpihuas, canguna tablamanda gustu huasibi causana timpu ashcata quiringuichichu. 5 Chasna acpiga, Manzhanaita Ushayuc Jehova caitami nin: ‘Canguna imata raushcata alita yuyaichi. 6 Canguna ashcata tarpushahuas, amsallata pallanguichi. Micushahuas, mana sacsanguichichu. Upishahuas, upinayaihuan saquiringuichi. Llachapata churarishahuas, mana rupacyanguichichu. Shuccunaraicu tarbasha cullquita ganashahuas liquirishca bulsai huacaichinguichi’”. 7 “Manzhanaita Usahyuc Jehovaga caitami nin: ‘Canguna imata raushcata alita yuyaichi’. 8 “‘Urcuma sicaichi, maderata apasha ñuca huasita tarbaichi. Cai huasi ñuca munashca shina achun, ñucata ahuayachihuanauchun’, caitami Jehovaga nin”. 9 “Canguna ashcata apisha nishahuas, amsahuata apiranguichi. Canguna huasima chita apashcaibi, shugrailla chingachirani. Manzhanaita Ushayuc Jehova, imahua caita rashcata nin. Ñuca huasi huaglishca man. Canguna randi canguna huasita cuiranguichi. 10 Chimandami, canguna ahuaibi cieloga shulla yacuta mana curachu, allpaga tarpushcata mana huiñachirachu. 11 Ñucami allpata chaquichirani, urcugunata, micuna muyugunata, mushuc vinota, aceiteta, allpai huiñacta, runagunata, huiba animalgunata, canguna maquihuan tucui tarbashcata chaquichirani”’.