Genesis
41 Chi punzhamandami, Esauga Jacobhuan manacaillata piñarira, paihua yaya bendicionda apishcamanda. Esau paihua shungüibi nira: “Ñuca yaya ñallami huañungaraun. Pai huañushca huasha, ñuca huauqui Jacobta huanchisha”. 42 Rebecata pai rucu churi imata rana munashcata rimashcamanda, uctalla paihua quipa churi Jacobta cayasha, casna nira: “Uyai. Canba huauqui Esau, canda huanchinata munan, canhuan piñarishcamanda. 43 Chiraicu, ñuca rimashcata pactachi churi. Haran llactama uctalla ri, ñuca turi Laban aushca llactama. 44 Shuc timputa paihuan causagri, camba huauqui piñaita saquinagama, 45 piñarishcata pasanagama, can paita rashcata cungarinagama. Pai cungarishcai, can bulltiamungahua cayaicachashcangui. Imahuata shuc punzhallai ishcandita pirdishcanguichi”. 46 Chi huasha, Rebeca Isaacta rimai callarira: “Het runahua ushiguna mana causana yuyaita cuhuashcauna. Jacob Het runahua ushita cazarangahua apicpi, cai llactamanda huarmitas apicpi, ña mana causana munanichu”.