Exodo
3 Moisesca paiba huarmihua yaya Jetrohua ovejagunata cuirac tucura. Jetroga, Madian llactamanda sacerdote mara. Shuc punzha, Moisesca ovejagunata oeste chaquishca partima pushaushcai, Horeb urcuma pactara, sirtu Diospa urcu. 2 Chasnami, Jehovahua angelga nina sindiushca zarza ruya chaupibi ricurira. Alita ricusha, Moises chi zarza ruya sindishca ashahuas mana rupashcata ricura. 3 Chiraicu, Moises casna nira: “Cai manzhanaita ricuricta, alita ricungahua caillayangarauni. Imahua chi zarza ruya mana rupaushcata yachangahua riuni”. 4 Jehovaga pai ricungahua caillayaushcata ricura. Chasnami, zarza ruyamanda Dios paita cayasha nira: “Moises. Moises”. Pai nira: “Caibi mauni”. 5 Dios paita nira: “Ama mas caillayaichu. Sandaliagunata surcuri, santu allpata aitaungui”. 6 Chihuasha paita nira: “Ñucami canba yayahua Dios ani, Abrahanba Dios, Isaacpa Dios, Jacobpa Dios ani”. Chimanda, Moises manzharisha sirtu Diosta mana ricungahua ñahuita taparira. 7 Jehova masta nira: “Egipto llactai, ñuca llacta turmintarishcata ricurani, paigunata yapacta tarbachiccuna culpamanda paiguna huacashcata uyashcani. Paiguna turmintarishcata alita yachani. 8 Chiraicu, egipciogunamanda quishpichingahua iraicusha. Chi allpamanda, shuc gustu anzhu paglla allpama paigunata sicachingahua, chi allpai manacailla leche, sacha mishqui tian, cananeoguna, hititaguna, amorreoguna, perizitaguna, heveoguna, jebuseogunahua allpama pushangarauni. 9 Ricui, Israel llactamanda paiguna huacasha mañashca ñucama pactamushca. Chasnallata, egipcioguna paigunata yapa turmintachishcata ricurani. 10 Cunanga, shamui, faraon ñaupacpi canda cachangarauni. Egipto llactamanda, ñuca llactata llucshichingaraungui, israelitagunata”. 15 Cutillata Dios Moisesta nira: “Caitami israelitagunata rimana angui: ‘Jehova, camba ñaupa aillugunahua Dios, Abrahanba Dios, Isaacpa Dios, Jacobpa Diomi, cangunama cachahuashca’. Huiñairaicu caimi ñuca shuti an. Chasnami, caran miraiguna ñucata yuyarihuangauna.