Exodo
32 Israelitagunaga Moises urcumanda tigramungahua unayashcata ricunaura. Chiraicu, huin israelitaguna Aaronba mayambi liú tandarisha, paita ninaura: “Acu, shuc diosta rai, ñucanchi ñaupacpi richun. Cai Moises ima tucushcata mana yachanchichu, paimi Egiptomanda llucshichitucushcanchi”. 2 Chiraicu, Aaron paigunata nira: “Canguna huarmiguna, churiguna, ushiguna, rinribi churarishca curi aretescunata surcusha apamuhuaichi”. 3 Chimanda, huinguna paiguna rinribi churarishca curi aretescunata surcurisha, Aaronda cunaura. 4 Paiga chi curita apisha, iru pundahuan tazhasha, curimanda malta huagra diosta rara. Chiraicu, paiguna nicallarinaura: “Caiga, canguna Dios man, Israel. Paimi Egiptomanda llucshichitucuranguichi”. 5 Aaronga caita ricusha, curimanda malta huagra ñaupacpi shuc altarta rara. Chi huasha rimara: “Caya Jehovaraicu shuc istata rashun”. 6 Chasnami, cayandi punzha tutamandata atarisha, animalgunata rupachisha cumbiranaura. Chi huasha, israelitagunaga micungahua upingahua tiarinaura. Chasnallata, istasha cushiyangahua atarinaura. 7 Cunan Jehova Moisesta nira: “Iraicusha ri, Egiptomanda can llucshichishca israelitaguna mana alita rashcauna. 8 Ñuca mandashca ñambibi purinamanda huairashina caruyashcauna. Curimanda malta huagra diosta rashcauna, paiba ñaupacpi cungurisha, animalgunata rupachisha, casna ninaun: “Caiga, canguna Dios man, Israel. Paimi Egiptomanda llucshichitucuranguichi”.