11 PARTI
Biblia mandashcagunaga imasata yanapai tucunchi
1. Imaraicuta Bibliahua yanapaita minishtinchi
Imasata Dios mandashcagunaga cuirarisha causangahua yanapai tucunchi (HECHOS 17:28)
Jehova ñucanchita Rac ashcamandaga, ñucanchimandas yalitami yachan. Astahuambas, ñucanchita llaquishami ashcata yanapanata munan. Diosca mana rarachu runaguna paimanda caruyasha causanauchun nisha (Jeremias 10:23). Imasami ichilla huahuaguna paiba yayahua yanapaita minishtinaun, chasnallatami runagunaga Diospa yanapaita minishtinchi (Isaias 48:17, 18). Diosca Bibliaibi mandashcagunataga ñucanchita ashcata llaquishcamandami cushca. 2 Timoteo 3:16, leingui.
Jehova mandashcagunaga cunan punzhaibi, shamungarauc punzhagunaibi ali causaita charingahuami yachachi tucunchi. Pai ñucanchita Rac ashcamandaga, ñucanchiga cushiyasha paita cazuna anchi. Salmo 19:7, 11; Apocalipsis 4:11, leingui.
2. Imasata Diospa Shimiga yanapai tucunchi
Bibliaibiga ishcai sami yachachishcagunami tianaun. Mandashcagunata leishaga pactachinalla man (Hechos 15:29). Cuti, shuc yachaigunata leishaga ashca pactachinaguna tiashcatami intindinchi. Chita intindingahua ali yuyashami ñucanchi causaibi imatas alita rashun (Efesios 5:15). Yuyari, Bibliaga yachachinmi, Diosmi causaita cushca nisha. Chi shimigunaga yanapai tucunchimi, ñucanchi tarbanaibi, huasibi, maima riushahuas, alita cuirarisha imatas rangahua. Hechos 17:28, leingui.
3. Maicangunata mas balic mandashcaguna an
Jesusca ishcai mandashcagunatami mas balic an nira. 1) Diosta ricsisha, llaquisha, huañunagamami cazuna anchi. Cai mandashcataga tucui ñucanchi raigunaibimi yarina anchi (Proverbios 3:6). Chi mandashcata pactachisha puriucunaga Diospa amigogunami tucungauna. Chasna rashaga, cushi, huiñai causaitami charingauna. Mateo 22:36-38, leingui.
2) Shuccunahuan sumaglla causana anchi (1 Corintios 13:4-7). Chi shimigunata ñucanchi causaibi pactachishaga, runagunata Dios llaquishca shina ñucanchihuas llaquinacusha causashun. Mateo 7:12; 22:39, 40, leingui.
4. Bibliaibi mandashcagunaga imaraicuta ali an
Bibliaibi mandashcagunaga ailluibi llaquinacusha, tandalla causangahuami yanapai tucunchi (Colosenses 3:12-14). Bibliaga yanapanmi, cazarashcaguna mana jichunacuna chan nisha. Marcos 10:7-9, leingui.
Biblia nishcagunata cazucpiga, mana yapacta llaquiringahua, ñucanchi causaibi minishtishcata charingahuami yanapai tucunchi. Tarbachic amugunaga, pigunatata japinaun. Dios mandashca shina causac, mana shuhuac, mana tarbanaibi pishic runagunatami japinaun (Proverbios 10:4, 26; Hebreos 13:18). Astahuambas Diospa Shimiga yachachinmi, ñucanchi causangahualla charishcagunahuan cushiyasha causanauchun nisha. Chasna rashami ricuchishun, Yaya Diosta ñucanchi causaibi punda churashcata. Mateo 6:24, 25, 33; 1 Timoteo 6:8-10, leingui.
Diospa Shimi mandashcagunaga yanapanmi ama yapacta ungusha causanauchun nisha. Bibliata cazusha mana machashaga, ashca ugüigunamanda, piticta huañunamandas quishpishunmi (Proverbios 14:30; 22:24, 25; Romanos 13:13). Biblia nishca shinaga, imasaibi ashicuhuata ucu yacuta upinaga mana jucha chan (Salmos 104:15; 1 Corintios 6:10). Dios mandashcagunaga yanapanmi alita yuyasha, alita rasha causangahua (Salmo 119:97-100). Jesusta ali caticcunaga mana ñucanchi alita causangahuallachu cazunchi. Astahuambas, ñucanchi jahuapachaibi Causac Jehova Diosta jatunyachingahuami cazunchi. Mateo 5:14-16, leingui.