Imatata Diosca Allpata ranga

1. Imaraicuta Diosca Allpata rara

Jehovaga Allpata rarami runaguna chibi causanauchun nisha. Adanda, Evata rashaga mana jahuapachaibi mirangahuachu rara. Diosca jahuapachaibi causanauchun nishaga angelgunataga ñaupatami rashca ara (Job 38:​4, 7). Jehovaga jardin de Eden nishca pistuibi Adanda churara (Genesis 2:​15-​17). Chasnallata, Adanhuas, paihua huahuagunahuas Allpaibi huiñai causaita charinauchun nishami munara. Hechos 17:26; 1 Juan 2:17, leingui.

Callari punzhaibiga jardin de Edenga Allpaibi ashilla parti mara. Adan y Evaga huahuagunata charishami paraisotaga mirachisha Allpata catana ara (Genesis 1:​28). Allpaga huin runaguna causana pistu man. Mana ima uraspas chingaringachu. Salmo 104:5, leingui.

Cai videota ricui: Imaraicuta Dios allpata rara

2. Imaraicuta Allpaga cunanga mana Paraiso an

Juchayashcamandaga Adanda, Evatas Diosca Edenmanda llucshichishami cachara. Chasnami chi Paraisoga chingarira. Cunangamaga chi Paraiso shinaga mana maibis tiashcachu. Allpaibiga mana ali runagunaga jundactami mirashcauna. Genesis 3:23, 24, leingui.

Sashaga, Jehovaga runagunaraicu Paraisota rana nishcataga cungarishcachu. Mana chasna chan. Pai tucui ushaita charishcamandaga chita pactachingami (Isaias 45:18). Shamungarauc punzhagunaibiga runaguna causanauchun nishaga, Jehovaga Allpata shuc paraisotami ranga. Mateo 5:​5, leingui.

3. Imasata cai Allpaga cutillata shuc paraiso tucunga

Jesusca Dios anllashca rey ashami Allpataga shuc paraisota ranga. Paiga angelgunahuan tucushami Diospa cuntargunataga Armagedon nishca guerraibi tucuchinga. Chi huashaga Adanda Evata juchayachic Supai Satanastaga, huaranga huatagunatami tapasha saquinga. Diosta cazuccunata Armagedonbi ama huañunauchun nishami Jesusca cuiranga. Chi huashaga, cai Allpa Paraiso tucushcaibi paigunaga cushi, huiñai causaita charingauna. Apocalipsis 20:​1-3; 21:3, 4, leingui.

4. Llaquigunaga ima urasta tucuringa

Diosca mana aligunataga ima urasta tucuchinga. Jesusca yachachirami, chi timpu caillayamucpi mana ali causai tianga nisha. Cunan punzhaibi manzhanaita llaquiguna tiacta ricushami yachanchi “cai pacha tucuriushcai” causaushcata. Mateo 24:​3, 7-​14, 21, 22, leingui.

Jesusca jahuapachamanda huaranga huatagunata cai Allpaibi runagunata mandanga. Chibimi Jesusca llaquigunata ashilla ashilla tucuchisha ringa (Isaias 9:​6, 7; 11:​9). Jesusca Diosta llaquic runagunahua juchata anchuchingami. Diosca Jesusta churanga ungüita, rucuyaita, huañuitas tucuchingahua. Isaias 33:24; Apocalipsis 21:4, leingui.

5. Pigunata Paraisoibiga causangauna

Diosta cazuccunami Paraisoibiga causangauna (1 Juan 2:17). Jesusca paita caticcunata nira, ali shunguta charic runagunata yachachingahua mascaichi, Diospa amigo tucunauchun nisha. Cunan punzhaibiga, Jehovaga ashca huaranga runagunatami Paraisoibi causanauchun nisha yachachiun (1 Timoteo 2:4). Jehovahua testigoguna tandarina huasibiga aillu muntunmi Diosta tandalla sirvinaun. Cazarashcagunahuas mas ali causangahua Bibliamanda ali cunaigunata yachaunguna. Apocalipsis 15:4, leingui.