13 PARTI
Biblia nishca shinaga religiongunaga imata tucunga
1. Huin religiongunachu Dios munashcata ranaun
Huin religiongunaibimi mansu, ali shunguyuc runaguna tianaun. Chi runagunata llaquishami Diosca yanapanata munan. Chiga shuc gustu cuintai man. Randi, ashca religiongunaga jiridsa juchagunatami rashcauna (2 Corintios 4:3, 4; 11:13-15). Televisiongunaibi, radiogunaibiga uyashcanchimi, huaquin religiongunaga guerrasgunaibi chapurishcauna, allpagunata amuyashcauna, runagunata yangamanda huanchishcauna, ichilla huahuagunata violashcauna. Ali shunguyuc quiriccunaga chita ricushami yapacta turbarishcauna. Mateo 24:3-5, 11, 12, leingui.
Sirtu religion Diosta jatunyachicpihuas, mana ali religionga Diosta mana ali sintichishami pingachin. Mana ali religiongunaga Diosmanda, huañushcagunamanda llullashami, Bibliaibi mana tiashca yuyaigunata yachachin. Randi, Jehovaga munanmi runaguna paimanda sirtuta yachanauchun nisha. Romanos 6:23; 1 Timoteo 2:3-5, leingui.
2. Bibliaibi nishca shinaga religiongunaga imata tucunga
Religionguna umasha Diostami llaquinchi nicpihuas, Diosca mana umaibac chan. Paigunaga Supaiba mundutami llaquinaun (Santiago 4:4). Diospa Shimiga llullac religiongunata shutichinmi, “Jatun Babilonia llacta” nisha. Ñaupa timpuibi Babilonia nishca llactaibimi tucui yanga religiongunaga callarira. Nallami Diosca, runagunata umac, llaquichic religiongunataga cungaimanda dsaslla tucuchinga. Apocalipsis 17:1, 2, 5, 16, 17; 18:8, leingui.
Diosca mana cungarishcachu mundu intiruibi mana ali religiongunaibi auc ali runagunata. Paigunata paiba Shimita alita yachachishami tandachiun. Juan 6:45, leingui.
3. Ali shunguyuc runagunaga imatata rana anaun
Mana llullasha yachachic religionga tandalla angahuami yanapan
Diospa Shimita sirtuta yachasha pactachinata munac runagunataga Diosca llaquinmi. Chiraicumi panda religiongunamanda llucshichi nin. Sirtuta Diosta llaquishaga, paita cushiyachingahua ñaupa causaita saquina manaun. Apocalipsis 18:4, leingui.
Jesus huañushca huashaga, ali shunguta charic ashca runagunami apostolguna camachishcata uyasha cambiarinaura. Jehovaga chi runagunata yachachirami shuc mushuc, sumac, cushi causaita charinauchun nisha. Paiguna shinallatami ñucanchihuas Bibliamanda gustu cuintaigunata uyashaga Jehovata pundaibi churana anchi. 1 Tesalonicenses 1:8, 9; 2:13, leingui.
Yanga religionmanda llucshisha Diosta cazucpiga paiga ugllarishami japin. Diospa parti tucuccunaga mundu intiruibi ashcata llaquic huauquigunata, panigunatahuas charinaun. Chasnallata Diospa amigo tucusha, huiñai causaitami charingauna. Chi causaita charinata munanguimachu. Marcos 10:29, 30; 2 Corintios 6:17, 18, leingui.
4. Imatata Diosca ranga tucui Allpaibi cungailla, cushi causai tiachun nisha
Llulla religiongunata Jehova tucuchicpi, cungailla causaimi tianga. Religiongunaga ña mana runagunata umasha caran partima chausichingaunachu. Mundu intiruibimi runagunaga tandalla, shuc Diosllata yuyarisha causangauna. Apocalipsis 18:20, 21; 21:3, 4, leingui.