Rebecaga Jehovata cushiyachinata munara

Rebeca nishca huarmiga Jehovata llaquic mara. Paihua cari Isaac mara. Paihuas Jehovata llaquic mara. Imasata Isaacta Rebeca ricsira. Rebecata ricusha imaraicuta Jehovaga cushiyara. Ricushun.

Isaacpa yayagunaga Abrahan, Sara shuti manaura. Paigunaga Canaan nishca llactai causanaura. Abrahanga paiba churi Isaacta, Diosta sirvic huarmihuan cadsarachinata munara. Chasna acpihuas, Canaan llactamanda huarmigunaga Jehovata mana quiric chanaura. Chiraicumi, Abrahanga paita sirvic runata Haran nishca llactama cachara. Chiga Eliezer nishca runa chari ara. Imahuata Haran llactama cachara. Haran llactaibimi Abrahanba ailluguna causanaura. Chibimi Eliezerga, Isaacta cadsarachingahua Diosta sirvic huarmita tupana ara.

Eliezerga caruta rira shuc sirviccunahuan. Chunga (10) camellogunaibi micunata, cumbiranatas apachisha apanaura. Chasna acpihuas, imasata Eliezerga Isaacpa huarmita tupara. Paiga yacharami, Haranmanda huarmiguna yacuta apangahua yacu pugruma ric ashcata. Chita yachashami, Haranma pactashaga yacu pugruma rinaura. Chibi pactashami, Jehovata mañara casna nisha: “Shuc malta huarmitami yacuta cuhuai nisha. Chi huarmi ñucata, ñuca animalgunatahuas yacuta cucpimi, ñuca yachasha chi huarmita can sirtu anllashcata”.

Chi ratumi, Rebecaga yacu pugruma pactamura. Bibliaga ninmi, Rebecaga sumac huarmi mara nisha. Eliezer yacuta tapucpi, Rebeca nira: “Indá, cunan ratu cushcangui. Camba animalgunatas yacuta upichishami” nira. Camelloguna ashca yacuta upic ashcamandami, Rebecaga ashca cutin yacuta astara. Cai mayanbi auc dibujuta ricui. Rebeca imatata raun... Callpasha, sinzhita yacuta astauta ricusha, Eliezerga manzharisha, alii ricusha shayaura. Jehovami pai mañashcata uyashca ara.

Eliezerga munai cumbiranagunata Rebecata cura. Chi huashami Rebecaga Eliezerta, paihuan pariu auccunatahuas paiba yayahua huasima pasiachingahua apara. Paigunahuagma pactasha Eliezerga cuintara, Haran llactama imaraicu Abrahan cachashcata. Chasnallata, Jehovami ñuca mañashcata cutichihuara nira. Chita uyashaga, Rebecahua aillugunaga ashcatami cushiyanaura. Chiraicumi paigunaga Eliezerta ninaura: “Ali man, Isaac Rebecahuan cadsarachun”.

Imatata ningui, Rebecaga cadsaranata munarachu... Paiba ailluguna tapucpiga Rebeca, indá nira. Imaraicuta chasna nira. Jehova Eliezerta cachashcamandami Rebeca, indá nira. Chiraicumi Eliezerhuan Canaanma rira. Chi llactaibi pactacpimi, Isaacca Rebecahuan cadsarara.

Rebeca Jehovata cadsura. Chiraicumi, Jehovaga paita alita cuirara. Chasnallata Diosca Rebecahua aillutami anllara Jesusta cai Allpama cachangahua. Rebeca shina can Jehovata cadsucpiga, candahuas cuirangami. Chasnami Jehovaga canmanda cushiyanga.