Imaraicuta Diosca Allpata runagunatas rara

1. Diosca runagunaraicu imatata rana munan.

DIOSCA punda cari, punda huarmi ali gustu causaita charingahua rara. Jehovaga Adan y Eva gustu allpaibi causasha, huahuagunata charisha, animalgunatas cuirasha causanata munara. Chasnami cai Allpata gustu causana paraisota rana anaura. Pai rasha nishcata pactachingami. Diosca cai Allpata shuc gustu paraisota rasha runagunama cunata munan (Genesis 1:28; 2:​8, 9, 15; nota 6​ta ricui).

2. a) Dios pactachingaraushcata imasata yachanchi. b) Allpaibi ima tunu runagunata causangauna. c) Runagunaga masna timputata causangauna.

² Paraiso Allpaibi causana nishcaga sirtu chan. Jehova nin: “Rimashcanimi; chasnallata pactachishami” (Isaias 46:​9-11; 55:11). Diosca pai rimashcata pactachingami, mana pihuas pai rasha nishcata arcangachu. Chimandahuas, Jehovaga cai Allpata “mana yangachu rara” (Isaias 45:18). Diosca cai Allpaibi ashca runaguna tiyachunmi munan. Chasna acpihuas, ima tunu runaguna causanatata munan. Chimandahuas masna timputata causangauna. Bibliaga ali runaguna, casuc runaguna ‘cai allpaibi causangauna’ nin. Chasnallata ‘huiñaimi causangauna’ (Mateo 5:5; Apocalipsis 21:​3, 4).

3. Runaguna ungusha, huañushcata ricusha imatata tapurinchi.

³ Cunanga pinsashun runagunaga ungusha, huañusha catinaun. Shuc llactagunaibiga paigunapura piñanacusha huañunacunaun. Diosca mana chasna causanata munarachu. Sashaga imaraicuta chasna causanchi. Dios munashca, imaraicu mana pactarishcata Biblia cutichin.

DIOSPA ENEMIGO

4, 5. a) Pita paluta rimachira. b) Imasata mana shuhuacca shuhuac tucuna ushan.

⁴ Bibliaga nin Diospa enemigoga “Supai” man nisha. Eden nishca gustu causana pistuibi, Supaiga Evata pandachingahua paluta rimachira (Apocalipsis 12:​9; Genesis 3:​1). Supaiga paluta rimachisha Evata quirichira (nota 7​ta ricui).

⁵ Sashaga Dioschu Supaita rara. Mana. Adan y Evaraicu Dios Allpata raushcaibiga ashca angelguna cieloibi tiyanaura. Unaimaga, chi angelgunamanda shuc angel pai munasha supai tucura (Job 38:​4, 7). Shuc angelga imasata supai tucura. Yuyashun shuc mana shuhuac runaibi. Imasata shuhuac tucuna ushan. Mana pihuas shuhua runa pagarinzhu. Chasna ashahuas shucpacta munasha ricusha chillai yuyaupiga, shuhuanayangami. Shuhuanalla acpiga shuhuangami. Chasnami mana shuhuac runaga shuhuac tucun (Santiago 1:​14, 15 leipai; nota 8​ta ricui).

6. Shuc angelga imasata Diospa enemigo tucura.

⁶ Cai angelga chi runa shina tucura. Jehova Adan y Evata rashcaibiga, huahuagunata charisha Allpaibi miraichi nirami (Genesis 1:​27, 28). Cai angelga casna chari pinsara: “Tucui cai runaguna Jehovata adorana randiga ñucata adoranatami munani”. Supaiga caibi pinsaushalla, runaguna Jehovata adoranata quichuna munara. Chiraicumi Evata llullasha pandachira (Genesis 3:​1-5 leipai). Casna rashami Supai tucusha, Diospa enemigo saquirira.

7. a) Adan y Evaga imahuata huañunaura. b) Imahuata rucuyasha huañunchi.

⁷ Diosca Adan y Evata cushca pistuibi tiyac shuc ruyamanda ama micunguichichu nirami. Micushaga huañunguichimi nisha Dios rimashca acpihuas mana uyasha micunaura (Genesis 2:17; 3:​6). Jehova nishca shina Adan y Evaga uchai urmashcamanda unaima huañunaura (Genesis 3:​17-19). Adan y Evahua huahuagunaga uchayuc llucshishcamanda huañunaura (Romanos 5:12 leipai). Adan y Evahua huahuagunata imasata ucha chimbara. Adanga mana micuna muyuta micusha uchayuc tucura. Adanba huahuaguna ashcamanda tucuiguna uchayuc manchi. Chiraicu tucuiguna rucuyasha huañunchi (Romanos 3:23; nota 9​ta ricui).

8, 9. a) Supaiga Adan y Eva imata quirichunda munara. b) Jehovaga imahuata paiba enemigogunata mana shugrailla huanchira.

⁸ Adan y Evata uchai urmachisha Supaiga Jehovahua enemigo tucura. Dios llulla ashcata, mana ali mandac ashcatas Satanas paigunata quirichina munara. Astahuanbas Diospa yanapai illac causasha, paiguna amu munashcata anllanata intindichira. Chasna tucucpiga Jehovaga imatata rara. Jehovaga paita mana casuccunata shugrailla tucuchina usharami. Chasna ashahuas Dios chita rashaga Supai llulla ashcata mana ricuchina ushanmachara.

⁹ Jehovaga paiba enemigogunata shugrailla huanchina randiga runaguna paina munashcata rasha causachun saquira. Jehova caita rashaga, Supai llulla ashcata ricuchina munara. Astahuanbas, Jehovallami runagunaraicu ima ali ashcata yachan. Cunanga, Adan y Eva rashcamanda imatata pinsangui. Supaita quirisha, Diosta mana casushaga alitachu ranaura. Jehovaga gustu, ucha illac causanata, gustu tarabanatas paigunata cura. Randi, Supaiga Adan y Evata mana imatahuas cushca chara. Can chibi aushca ashaga imatashi rangui mara.

10. Pita casunatata anllana anchi.

¹⁰ Quishpiringahua ñucanchihuas imata ranata anllana manchi. Jehovata casunata, o Supaita casunata ricuna manchi. Jehovata casushaga Supai llulla ashcata ricuchishun (Santiago 4:8; Proverbios 27:11 leipai). Cai munduibiga ashca runaguna Diosta mana casusha causanaun. Chasnami Dios paigunata mana mandaushcata ricuchinaun. Chasna acpiga pishi cai munduta mandaun.

CAI MUNDUTAGA PITA MANDAUN

11, 12. a) Supai Jesusta cusha nishcamanda imatata yachanchi. b) Bibliaibi maican partibita Supai cai munduta mandaushcata ricuchin.

¹¹ Jesusca cai munduta pi mandaushcata yacharami. Shuc punzhaga Supaiga Jesusta “ricuchira tucui cai pachai tiyac llactagunatas, chibi tiyac gustugunatahuas”. Chihuasha nira: ‘Can ñucahuacpi cungurisha alabahuacpiga cai mandanagunata cushcanguimiʼ nisha (Mateo 4:​8, 9; Lucas 4:​5, 6). Supaiga cai llactaguna mana paibac ashca acpiga Jesusta mana cunma chara. Chimandami cai munduibi mandanaguna Supaibac ashcata yachanchi.

¹² Can ninguichari: “Jehova tucuita rac Dios acpiga imahuata Supaimi cai munduta mandaun” nisha (Apocalipsis 4:11). Diosca tucuita rac man. Chasna acpihuas Jesusca Supai ‘cai munduta mandaushcataʼ pasacta intindichira (Juan 12:31; 14:30; 16:11). Chasnallata, Apostol Pablo “cai pachata mandauc supai” nirami (2 Corintios 4:3, 4). Apostol Juanbas cai “mundu intirumi supaiba maquibi aun” nisha quillcara (1 Juan 5:19).

SUPAI MANDASHCA MUNDU ÑALLAMI CHINGARINGA

13. Imaraicuta mushuc, ali causaita minishtinchi.

¹³ Cai munduibiga yapa llaquiguna tiyanaun. Tucui partibi guerragunata, mana alita rac runagunata, macanacuigunatas ricunchi. Runagunaga cai llaquigunata tucuchisha nishahuas mana tucuchishcaunachu. Chiraicu Diosca ñallami Armagedon guerraibi cai huin llaquigunata tucuchisha, ali causaita apamungaraun (Apocalipsis 16:​14-16; nota 10​ta ricui).

14. a) Diosca paiba Reinoibi pitata mandangahua anllara. b) Bibliaga Jesusmanda imatata rimara.

¹⁴ Jehovaga ahua pachamanda ali mandanata apamungaraun. Cai mandanaga Diospa Reino nishca man. Diosca Jesustami chi Reinoibi Rey shina mandachun anllashca. Ashca huaranga huata huashama Bibliaga Jesusta “Cungailla Mandac” manga nira. Chasnallata paiga huiñaimi mandanga (Isaias 9:​6, 7). Jesusca paita caticcunata chi gubirnu shamuchun mañanata yachachira. ‘Camba ali mandanaga tucuibi mirarishca tucuchun. Camba munaiga ahuapachai ashcacuinta cai pachaibis chasnallata achun’ (Lucas 11:2). Capitulo 8ibi Diospa Reino cai munduibi tiyac gubirnugunata tucuchingaraushcata yachashun (Daniel 2:44 leipai). Chi huasha, Diospa Reinoga Allpata gustu paraisota ranga (nota 11​ta ricui).

ÑALLAMI GUSTU PARAISO ALLPAIBI CAUSASHUN

15. Mushuc allpaibi pigunata causangauna.

¹⁵ Diosca Bibliaibi: “Mushuc cielota mushuc allpatahuas rashami” nin. Chasnallata chi allpaibi “alillami angauna, ima uchas, ima iridsahuas illangami” (2 Pedro 3:13; Isaias 65:17). Bibliaga imasaibi “allpa” nishaga allpaibi causac runagunatami rimac an (Genesis 11:​1). “Mushuc allpa” nishaga Diosta casuc runaguna cai allpaibi tiyanata nin. Tucuigunami gustu paraiso allpaibi causangauna.

16. a) Diosca imatata cungaraun. b) Dios cungaraushcata apingahua imatata rana anchi.

¹⁶ Jesusca, Diosmi paraiso Allpaibi causangarauccunata “huiñai causaita” cungaraun nira (Marcos 10:​29, 30). Huiñai causaita charingahua imata rana anchi. Imata rana ashcata yachangahua Juan 3:16; 17:​3 leipai. Cunanga, gustu paraiso Allpaibi causana imasa angaraushcata yachashun.

17, 18. Paraiso Allpaibi cungailla, gustu causanata imasata yachanchi.

¹⁷ Guerraguna, mana alita ranaguna, macanacuiguna tucuringami. Allpaibiga ali runagunallami causangauna (Salmo 37:​10, 11). Cai Allpa gustu paraiso tucushcaibiga Diosta casuc, paita llaquic runagunallami causangauna. Chasnallata, huiñaibac cungailla causashun (Salmo 72:​7). Diosca guerragunata tucuchingami (Salmo 46:​9; Isaias 2:​4).

¹⁸ Diosta casuc runagunaga cungaillami causangauna. Callari timpuibiga, israelitaguna casucpiga Jehovaga paigunata cuirac mara (Levitico 25:​18, 19). Ñucanchihuas paraiso gustu Allpaibiga mana imatahuas manzhashunzhu. Cungailla cushi causashun (Isaias 32:18; Miqueas 4:​4 leipai).

19. Imaraicuta tucuigunaraicu micuna tiyangami ninchi.

¹⁹ Tucuigunaraicu micuna tiyanga. Bibliaga nin: “Allpaibi ashca micuna tiyanga; urcu pundagunaibihuas manacailla micunachu tiyanga” (Salmo 72:16). Jehovaga “bendiciai tucushunmi”, chasnallata “allpallatami micunata aparichinga” (Salmo 67:​6).

20. Imasata cai Allpa gustu paraiso tucunata yachanchi.

²⁰ Tucui Allpami gustu paraiso anga. Gustu huasigunata, sumac sisa pambagunatas charishunmi (Isaias 65:​21-24; Apocalipsis 11:18 leipai). Tucui Allpami punda rashca jardin de Eden shina gustu ricuric anga. Jehovaga ñucanchi tucui minishtishcata cui tucushun. Bibliaga nin: “Camba maquita pascasha, tucui cai allpaibi causaccunata paiguna munashcata cuungui” (Salmo 145:16).

21. Runaguna, animalgunahuan cungailla causanata imasata yachanchi.

²¹ Runagunaga animalgunahuan cungailla causangauna. Animalgunaga runagunata mana susirichingaunachu. Cunan manzhanayacta ac animalgunahuan huahuaguna pugllangauna (Isaias 11:​6-9; 65:25 leipai).

22. Jesusca ungushcagunahuan imatata rangaraun.

²² Mana pihuas ungungachu. Jesus cai Allpai aushcaibiga, ashca runagunata ambira (Mateo 9:35; Marcos 1:​40-42; Juan 5:​5-9). Diospa Reinoibi Jesus mandaushaga huin ungushca runagunata ambinga. “Mana pihuas ungushca mauni ningachu” (Isaias 33:24; 35:​5, 6).

23. Diosca huañushcagunahuan imatata rangaraun.

²³ Huañushcaguna causaringaunami. Diosca huaranga huaranga huañushca runagunata causachishami nin. Chasnallata, ‘ali causaucuna mana ali causaucunas huañushca huasha cuti causaringaunamiʼ nin (Juan 5:​25 leipai; Hechos 24:15).

24. Paraiso gustu Allpaibi causana munanguichu.

²⁴ Tucuigunami, Jehovamanda yachasha, paita casuna o mana casunata ricuna anchi. Jehovata casushaga shamungarauc punzhaibi, ali gustu causaita charishun. Chasnallata, huiñai causaita charingahua Jesucristomanda mas yachana anchi. Chiraicu, Dios munashcata pai imasa pactachingaraushcata yachashun.