Angelguna demonioguna piguna tanaun

1. Angelgunamanda imahuata yachana anchi.

ANGELGUNAGA Jehovahua aillu parti manaun. Bibliaga “Diospa churiguna” manaun nin (Job 38:​7). Diosca paiba ailluta ricsichun munan. Angelgunaga imatata ranaun. Callari urasca runagunata imasata yanapanaura. Ñucanchita yanapana ushanaunzhu (nota 8​ta ricui).

2. a) Angelgunata pita rara. b) Masna angelgunata tiyanaun.

² Pundaga angelgunata pi rashcata yachashun. Colosenses 1:16​pi Jehova punda Jesusta rashcata nin, chihuasha ‘ahua pachaibi tiyaccunata, cai pachaibi tiyaccunatas’ rara. Chibi Jehova “angelgunata” rara. Jehovaga masna angelgunata rara. Bibliaga nin, mana yupaibac ashca huaranga angelguna tiyacta (Salmo 103:20; Apocalipsis 5:​11).

3. Job 38:​4-7 angelgunamanda imata nin.

³ Chasnallata, Bibliaga Allpata chara mana rashallata angelgunata punda rashcata nin. Paigunaga Jehova Allpata racpiga imasata sintirinaura. Job libroibi angelguna yapa cushiyashcata nin. Tucui angelgunami aillushina tandalla Jehovata sirvic anaura (Job 38:​4-7).

ANGELGUNA DIOSTA SIRVICCUNATA YANAPANAUN

4. Angelguna runagunamanda yachana munashcata imasata yachanchi.

⁴ Angelgunaga runagunamanda yachanata munanaun. Chasnallata, Jehova Allpaibi runagunaraicu rangaraushcatas yachana munanaun (Proverbios 8:​30, 31; 1 Pedro 1:​11, 12). Adan y Eva Diospa contra tucucpi, angelgunaga llaquirishca mangauna. Diosta cunan ashca runaguna mana casucpi maschari llaquirinaun. Sa acpihuas, maican aripintirisha Jehovama bulltiacpiga angelguna cushiyanaunmi (Lucas 15:10). Angelgunaga Diosta sirvic runagunata yanapanata munanaun. Diosca paigunata cuirangahua angelgunata cachan (Hebreos 1:​14). Angelguna imasa yanapashcata ricushun.

5. Angelgunaga Diosta ñaupa sirviccunata imasata yanapanaura.

⁵ Jehovaga Sodoma y Gomorra llacta chingarinamanda Lot, paiba aillutas quishpichingahua ishcai angelgunata cachara (Genesis 19:​15, 16). Ashca huataguna huashama, profeta Danielta leongunahua atun uctui shitanaura. Chibi “Diosca paiba angelta cachasha, leongunahua shimita tapara” chiraicu mana imas tucura (Daniel 6:22). Jesus shamushca huasha, apostol Pedrota carcelmanda surcungahua Dios shuc angelta cachara (Hechos 12:​6-11). Angelgunami Jesus Allpai aushcaibi yanapanaura. Bautisarishca huasha, angelgunami paita cuiranaura (Marcos 1:13). Huañuna pactariushcai shuc angelmi “yanapasha sinzhiyachira” (Lucas 22:43).

6. a) Angelguna Diosta sirviccunata cunan punzhaibi yanapashcata imasata yachanchi. b) Ima tapuigunata yachashun.

⁶ Angelgunaga cunan runagunata mana ricurinaunzhu. Chasna acpihuas, Diosca paita sirviccunata yanapangahua angelgunata utilizan. Imasata yachanchi. Bibliaga nin: “Jehovahua angelga paita manzhaccuna mayanda cuirasha quishpichin” (Salmo 34:​7). Ushayuc enemigoguna ñucanchita dañuna munacpi, Diospa yanapaita minishtinchi. Cai enemigogunaga piguna tanaun. Maimandata llucshinaura. Imasata dañunata munanaun. Intindingahua Adan y Evata tarabashca huashalla ima tucushcata ricushun.

MANA RICUIBAC ENEMIGOGUNA TIYANAUN

7. Supaiga ashca runagunata imatata rashca.

⁷ Capitulo 3​pi shuc angel Diospa contra tucusha shuccunata mandana munashcata yacharanchi. Bibliaibiga Supai “Satanas” nin (Apocalipsis 12:​9). Satanasca runagunas Diospa contra tucuchun munara. Evata pandachishca huasha, ashca runagunatas pandachishca. Chasna acpihuas Abel, Enoc, Noe shuccunahuas Jehovata mana saquinaurachu (Hebreos 11:​4, 5, 7).

8. a) Maican angelgunaga imasata demonioguna tucunaura. b) Allpata catac manzhanaita atun tamiamanda quishpingahua demoniogunaga imata ranaura.

⁸ Noe punzhagunaibi, maican angelgunaga Diospa contra tucunaura. Paigunaga Allpaibi causangahua cielota saquisha shamunaura. Bibliaga nin, huarmigunata munasha apingahua shamushcata (Genesis 6:​2 leipai). Paigunaga mana chasna rana chanaura (Judas 6). Chi mana uyac angelguna shinallata, chi timpuibi causac runaguna mana ali, yapa piñasha macac tucunaura. Jehovaga mana ali runagunata atun tamiahuan Allpa intiruta yacuta undachisha huin tucuchira. Sashas, paita sirviccunata quishpichira (Genesis 7:​17, 23). Cai angelgunaga Allpata catac manzhanaita atun tamiamanda quishpiringahua cielomallata bulltianaura. Bibliaga cai mana ali angelgunata, “supaiguna” o “demonioguna” nin. Paiguna paina munasha Supai parti tucunaura (Mateo 9:34).

9. a) Demonioguna cieloma tigrashcai imata tucunaura. b) Imatata yachashun.

⁹ Demonioguna cieloma tigracpi, Jehovaga paihua aillu parti anata ña mana munarachu. Cai demonioguna ña mana aichayuc, tulluyuc tucunata ushanaunzhu. Sa ashahuas, “intiru munduta” pandachisha catiunguna (Apocalipsis 12:​9; 1 Juan 5:19). Ashca runagunata imasa umasha pandachishcata ricushun (2 Corintios 2:11 leipai).

DEMONIOGUNA IMASATA RUNAGUNATA UMANAUN

10. Demoniogunaga runagunata imasata umanaun.

¹⁰ Demoniogunaga runagunata umanaun. Maican runagunaga shaman o brujota rimasha demoniogunahuan cuintanacunaun. Paigunahuan cuintanacunaga “espiritismo” nishca man. Diosca tucui demonioguna rashcagunamanda caruyachun munan (Galatas 5:​19-21). Imasata shuc runa animalta apingahua trampata churan, chasnallatami demoniogunaga runagunata umanaun paiguna munashcata rangahua (nota 26​ta ricui).

11. a) Ima tucunata yachangahua runaguna imata ranaun. b) Imaraicuta adivinana manzhanaita an.

¹¹ Demoniogunaga brujogunata utilizasha ima tucunata yachangahua adivinachinaun. Chasnallata, maicangunaga huanducta, ayahuascata upisha ima tucungaraushcata ricunaun. Adivinangahua barajata, horoscopota ricunaun. Ashca runagunaga cai sami rashcaguna ali man ninaun. Chasna acpihuas, caita ranaga manzhanaita man. Bibliaga demonioguna adivinachishcata nin. Hechos 16:​16-​18ibi “supai ushaihuan ima tucungaraushcatas musiac” huarmimanda cuintan. Apostol Pablo cai huarmimanda supaita surcucpi, ushai illac saquirira.

12. a) Huañushcagunahuan cuintanacuna imaraicuta manzhanaita an. b) Jehovata sirviccunaga imahuata demoniogunamanda cuirarinaun.

¹² Chasnallata, demoniogunaga huañushcagunahuan cuintanacuna ushashcata, shuc partibi causasha catishcata quirichisha ninaun. Astahuanbas, demoniogunaga huañushcaguna ñucanchihuan cuintanacunata, yanapanata o dañunatas ushashcata quirichina munan. Maican runa pai aillu o amigo huañucpiga paihuan cuintanacungahuachari brujota mascanga. Brujoga huañushca runa, causacpi rimashca shinallata uyaricta rimanga. Huañushca runahuanmi cuintanacuun ningachari, chasna acpis demoniogunahuanmi cuintanacuun (1 Samuel 28:​3-19). Ashca runaguna ninaun, huañushca huasha shuc partibi causasha catin nisha. Chasnallata velorioibi mana pichana, huañushcata apausha ushpata shitana, pantiunma huañushcagunaraicu micunata apana, huañushcagunata cayanatas quirinaun. Jehovata sirviccuna caita mana racpiga ailluguna, ricsishcaguna piñasha manachari rimanata munangaunachu. Sacpis, Jehovata sirviccunaga huañushcaguna shucpi causasha catin nishcata mana quirinchichu. Huañushcagunahuan mana cuintanacunata ushanchichu. Paigunaga yanapanata, dañunatas mana ushanaunzhu (Salmo 115:17). Chiraicu cuiraripangui. Huañushcagunahuan o demoniogunahuan cuintanacunata ama pinsaichu, tucui demonioguna ranata ama raichu (Deuteronomio 18:​10, 11 leipai; Isaias 8:19).

13. Ñaupa demoniogunata manzhaccunaga cunan manzhanaunzhu.

¹³ Chimandahuas demonioguna umasha, runagunata manzhachinaun. Cunanga, Satanas paiba demoniogunahuas cai Allpaibi “pai munashcata rana uras ña tucuriushcata” yachanaunmi. Diosmi paigunata tucuchingaraun. Chiraicu, yapa piñarishca aunguna (Apocalipsis 12:​12, 17). Sa acpis, ashca huaranga runaguna demoniogunata ñaupa manzhaccuna, cunan mana manzhanaunzhu. Imasa rashata mana manzhanaun.

DEMONIOGUNAMANDA CUIRARISHA IMASA CARUYANA

14. Jesusta punda caticcuna shina, Jehovata sirvingahua imata rana anchi.

¹⁴ Bibliaga demoniogunamanda imasa cuirarinata, imasa caruyanata riman. Por ejemplo, Jesusta punda caticcuna timpuibi, Efeso llactamanda runagunaga Jesusta chara mana catic ashallata demoniogunahuan cuintanacuc anaura. Demoniogunamanda imasata caruyanaura. Bibliaga nin: “Ashca burujugunami Jesusta quirisha paiguna yachana quillcagunata apamusha tucui runaguna ñaupacpi illacta rupachinaura” (Hechos 19:19). Jesusta catic tucuna munasha, magiamanda tucui librogunata ichunaura. Cunanga paiguna rashca shinallata rana anchi. Jehovata sirvingahua demoniomanda librogunata, revistagunata, horoscopogunata, peliculagunata, musicata, mana ali pugllaita, Supai parti dibujugunatas huin ichuna manchi. Chasnallata, misha nishcagunatas mana charina chanchi (1 Corintios 10:​21, NM).

15. Supaimanda, demoniogunamanda quishpiringahua imata rana anchi.

¹⁵ Efeso llactamanda runaguna magiamanda librogunata huin ichushca huasha, apostol Pablo “ushaiyuc supaigunahuan” chara turmintariunguna nira (Efesios 6:12). Librogunata rupachishca acpihuas, demoniogunaga chara turmintachinata munanaura. Sashaga cai Jesusta caticcunaga imata rana anaura. Supai paigunata atacacpi difindiringahua apostol Pablo nira: ‘Flechata quishpina iru palahuan [o escudo] quishpinacuinta’ feta charichi (Efesios 6:16). Guerraibi shuc escudo quishpichishca shinami, sinzhi feta charicpiga demoniogunamanda quishpichi tucushun. Jehova quishpichinata tucui shunguhuan quiricpiga Supai pai demonioguna turmintachicpi ahuantashunmi (Mateo 17:20).

16. Jehovaibi sinzhita quiringahua imata rashun.

¹⁶ Jehovaibi sinzhita quiringahua imata rashun. Bibliata caran punzha leisha, Jehova quishpichihuangami nina anchi. Jehovaibi tucui shunguhuan quiricpiga Satanas, demoniogunahuas mana imatas rai tucushunzhu (1 Juan 5:​5).

17. Demoniogunamanda quishpiringahua ima masta rana anchi.

¹⁷ Efeso llactamanda Jesusta caticcunaga yapa espiritismo llactai causanaura. Chiraicu, apostol Pablo nira “tucui uras” Diosta mañanguichi nisha (Efesios 6:18). Jehova cuirachun nisha, caran uras mañana anaura. Ñucanchihuas yapa espiritismo munduibi causanchi. Chiraicu, Jehova cuirachun mañana anchi. Mañausha paiba shutitas rimana manchi (Proverbios 18:10 leipai). Jehovata caran uras Supaimanda lugaryachihuai nicpiga, Jehova ñucanchi mañashcata uyangami (Salmo 145:19).

18, 19. a) Supaita demoniogunata imasata binsishun. b) Catic capituloibi ima tapuita yachashun.

¹⁸ Jehovaibi confiasha, demoniomanda tucui cosasta ichucpiga Supai, demoniogunas mana imatas raitucushunzhu. Paigunata mana manzhana chanchi (Santiago 4:​7, 8 leipai). Jehovaga demoniogunamandas mas yali ushaiyuc man. Noe punzhagunaibi demoniogunata castigashcata, nalla paigunata tucuchingaraucta yacharanchi ( Judas 6). Mana sapallachu ahuantaunchi. Jehovaga paiba angelgunahuan cuirai tucunchi (2 Reyes 6:​15-17). Jehova yanapaihuan Supaita, demoniogunatas binsishunmi (1 Pedro 5:​6, 7; 2 Pedro 2:⁠9).

¹⁹ Supai paiba demoniogunas runagunata yapa turmintachiuta yachashcanchi. Chiraicu tapurinchichari: “Imaraicuta Dios paigunata chara mana tucuchin”. Cai tapuita catic capituloibi yachashun.