Camba ailluhuan cushilla causai

1, 2. Jehovaga imasa causachunda munan.

JEHOVAMI huarmihuan carihuan casarasha causanata callarichira. Bibliaga Dios punda huarmita rasha carita cushcata nin. Adanga yapacta cushiyasha casna nira: “Caiga ñuca tullumanda tullu, ñuca aichamanda aicha mapan” (Genesis 2:​22, 23). Jehovaga cari, huarmiguna cushilla causachun munan.

² Chasna ashahuas, ashca aillugunaga mana ima uraspas cushilla causaita charishcaunachu. Chimandahuas, Bibliaga aillugunapura alita apanacusha, cushilla causangahua ali cunaigunata cusha yanapan (Lucas 11:28).

DIOSCA CARI IMATA RACHUN MUNAN

3, 4. a) Cariga imasata paiba huarmita tratana an. b) Cari, huarmipura imaraicuta perdonanacuna anaun.

³ Bibliaga ninmi, ali cariga huarmita llaquisha respetana man nisha (Efesios 5:​25, 28, 29 leipai). Cariga tucui urasmi huarmita llaquihuan cuirasha, sumacta charina an.

⁴ Huarmi pandaricpi, cariga imata rana an. Bibliaga nin: “Cariguna, canguna huarmigunata llaquina manguichi, paigunata ama yanga piñanguichichu” (Colosenses 3:19). Carigunahuas pandarinaunmi. Chasnallata, Dios canda perdonachunga, camba huarmita punda perdonana mangui (Mateo 6:​12, 14, 15). Cari, huarmipura perdonanacushaga cushi causanata ushangauna.

5. Cariga imaraicuta pai huarmita balichina an.

⁵ Jehovaga cari paiba huarmita balichichun munan. Cariga huarmi munashcata riparasha ricuna an. Caitaga pactachina man. Cari pai huarmita mana alita tratacpiga, Jehova pai mañashcata mana uyangachu (1 Pedro 3:​7). Jehovaga carita, huarmita pariulla balichin. Jehovaraicuga tucui paita llaquic runagunami balishca anaun.

6. Imahuata cari, huarmi “shuc aichalla” manaun nin.

⁶ Jesusca nirami casarashca huasha cari, huarmi “mana ishcaichu, randi shuc aichallami” an (Mateo 19:​6). Cari, huarmiga shucta munasha mana ichunacuna chan (Proverbios 5:​15-21; Hebreos 13:​4). Casarashcagunaga pai huarmihuan, carihuan puñunata mana mitsanacuna chanaun. Chasna ashahuas, mana paillaibi pinsarina chanaun (1 Corintios 7:​3-5). Bibliaga ninmi: ‘Cariguna camba quiquin aichata cuirasha llaquiushcacuinta canguna huarmita llaquina anguichiʼ. Chasnallata nin, ‘mana pihuas paihua quiquin aichataga piñanzhuʼ randi ‘alita micushami, alita cuirarinʼ. Chiraicu, cariga paiba huarmita llaquisha ricuna an. Huarmiga paiba cari llaquicpi alita sintiringa (Efesios 5:​28, 29).

DIOSCA HUARMI IMATA RACHUN MUNAN

7. Tucui ailluga imahuata pushac runata minishtin.

⁷ Tucui aillugunami alita rangahua pushac runata minishtinaun. Bibliaga 1 Corintios 11:​3​pi nin: ‘Yaya Diosca Cristota mandan, Jesucristoga paita quiric runagunata mandan. Chasnallata shuc cariga paihua quiquin huarmita mandanʼ.

8. Huarmiga imasata carita balichina ushan.

⁸ Tucui huarmiyuccunami pandarinaun. Chasna acpihuas, cari ima rashcagunata huarmi apoyasha yanapacpiga, huin aillugunami alita causangauna (1 Pedro 3:​1-6). Bibliaga ninmi: “Huarmiga paihua cari nishcata pactachina” man nisha (Efesios 5:33). Chasna ashahuas, cari Diosta mana quiricpihuas, huarmiga paita respetana man. Chimandas Biblia ninmi: “Huarmiguna canguna carita uyana manguichi. Diosta llaquisha ali causacpi camba cari Diospa shimita cunan mana uyac ashallata can mana camachigllaita can ali causauta ricusha pai Señor Jesucristota quirinata munangami” (1 Pedro 3:​1, 2). Huarmi alita causacpiga, cariga pai quirishcata intindisha respetangami.

9. a) Huarmiga mana pai cari shina yuyasha imata rana an. b) Tito 2:​4, 5ibi cariyuccunaraicu ima cunaita tiyan.

⁹ Huarmiga mana pai cari shina yuyasha imata rana an. Respetohuan pai imata yuyashcata rimana an. Saraibi yuyashun, paiga paiba cari Abrahanda pai mana gustashcata rimara. Chiraicu, Jehovaga Abrahanda nira: “Pai nishcata uyai” nisha (Genesis 21:​9-12). Cari Jehova munashca shina raucpi huarmiga apoyana man (Hechos 5:29; Efesios 5:24). Astahuanbas, ali huarmiga paiba ailluta cuirana man (Tito 2:​4, 5 leipai). Huarmi ailluta yanapangahua imatas racpiga paiba cari, paiba huahuagunas llaquisha mas respetangauna (Proverbios 31:​10, 28).

10. Ichunacunamanda, divorciarinamandaga Biblia imata nin.

¹⁰ Maican cari, huarmigunaga ichunacunallata munanaun. Chasna acpihuas, Bibliaga ninmi ‘huarmiga paihua carita mana ichuna chanʼ. Randi cariga ‘huarmita mana ichuna chanʼ (1 Corintios 7:​10, 11). Imasaibi ailluta cari mana mantenina munacpi, yapa macacpi, Diosta adorachun mana saquicpi ichunacuna ushan. Chasna acpihuas, mana yangalla ichunacunaunzhu. Divorciarinaga ali chan. Bibliaga, casarashca huasha cari huarmi chicanhuan puñusha ashiyagllaibi divorciarinata ushan nin (Mateo 19:​9).

DIOSCA YAYAGUNA IMATA RACHUN MUNAN

11. Huahuagunaga imata minishtinaun.

¹¹ Huahuagunaga yayagunata minishtinaun, chiraicu yayagunaga huahuagunahuan pasangahua tiempota surcuna anaun. Chasnallata Jehovamanda yachanata minishtinaun (Deuteronomio 6:​4-9).

12. Yayagunaga huahuagunata cuirangahua imata rana anaun.

¹² Satanas cai munduta mandaucpi yapa turmintuguna tiyan. Maican runagunaga huahuagunata huaglichinata munanaun. Imasaibi mana ali runaguna huahuagunata abusangaunami. Maican yayagunaraicu abusanamanda cuintana sinzhi acpihuas, abusac runamanda imasa cuirarinata rimana manaun. Yayaguna, canguna huahuagunata cuirana manguichi (1 Pedro 5:​8).a

13. Yayagunaga imasata huahuagunata yachachina anaun.

¹³ Yayagunaga huahuaguna alita portarichun yachachina manaun. Imasata yachachina anaun. Huahuagunata cuscanzhina minishticpihuas mana yapacta piñasha macana chan (Jeremias 30:11). Rabia pasashcaibi cunasha cuscanzhingui. Huahuagunata yapa sinzhita rimasha piñacpiga mana alitachu sintiringauna (Proverbios 12:18). Imaraicu casuna ashcata cunasha intindichi (Efesios 6:​4; Hebreos 12:​9-11; nota 30​ta ricui).

DIOSCA HUAHUAGUNA IMATA RACHUNDA MUNAN

14, 15. Imahuata huahuagunaga yayagunata casuna anaun.

¹⁴ Jesusca atun llaquigunata charishahuas, paiba Yayata tucui uras casura (Lucas 22:42; Juan 8:​28, 29). Jehovaga huahuaguna paiba yayagunata casuchun munan (Efesios 6:​1-3).

¹⁵ Huahua asha, yayagunata casuna sinzhi chari an. Chasna ashahuas, can casucpiga Jehova, camba yayagunas cushiyangaunami (Proverbios 1:​8; 6:20; 23:​22-25).b

16. a) Supaiga maltaguna mana alita rangahua pigunata utilizan. b) Imaraicuta Jehovata llaquic amigogunata anllana angui.

¹⁶ Supaiga maltaguna mana aligunata rangahua amigogunata, shuc runagunatas utilizanmi. Paigunata binsina sinzhi acta Supaiga yachanmi. Jacobpa ushi Dinamanda yachashun. Paiga Jehovata mana llaquic amigogunata charira. Chiraicu turmintui urmasha paiba aillugunata llaquichira (Genesis 34:​1, 2). Jehovata mana llaquic amigogunata charicpiga, Jehova mana munashcata rai nitucunguimi. Chita rashaga turmintui urmasha, camba ailluta Jehovatas llaquichinguimi (Proverbios 17:​21, 25). Chiraicu Jehovata llaquic amigogunata anllana angui (1 Corintios 15:33).

CAMBA AILLUHUAN CUSHI CAUSANA USHANGUIMI

17. Caran ailluga imata rana an.

¹⁷ Ailluguna Jehovata casushaga, alita causangauna. Chiraicu, huarmiyuc ashaga, camba huarmita llaquisha alita tratasha causai. Cariyuc ashaga, camba carita respetasha, cari ima rashcata apoyasha Proverbios 31:​10-​31 nishcata pactachipai. Huahuagunata charishaga, Jehovata paiguna llaquichun yanapai (Proverbios 22:​6). Huarmiyuc, huahuayuc ashaga, aillugunata alita pushai (1 Timoteo 3:​4, 5; 5:​8). Huahua ashaga, camba yayata mamata casui (Colosenses 3:20). Tucui aillugunami pandarinchi, chiraicumi perdonda tapusha, mansu shungu ana anchi. Caibi yachashca shina, Bibliaga caran ailluraicu cunaita charin.