Diosta mañanaga shuc bendicion man

1, 2. a) Imahuata Diosta mañanaga shuc bendicion man ningui. b) Diosta mañanamanda Biblia imata yachachishcata imahuata yachana anchi.

JEHOVAMI cielota Allpata rara. Bibliaga nin, Jehovaraicu tucui Allpaibi causac runaguna yacu gota shina manaun nisha (Salmo 115:15; Isaias 40:15). Dios tucui rashcata ricusha, ñucanchiga ichicuhua manchi. Chasna acpihuas, Bibliaga ninmi: “Jehovaga tucui paita mañaccunahua mayanbi, tucui pai munashca shina mañaccunahua mayanbi maun. Paita manzhaccunata uyangami, chasnallata pai mañashcata uyasha quishpichingami” (Salmo 145:​18, 19). Jehova Tucuita Rac Dios ashahuas, ñucanchi mañashcata uyasha, ñucanchi amigo tucuna munan. Chiraicu, cushilla sintirina anchi. Diosta mañanaga, pai ñucanchita llaquisha cushca bendicion man.

² Jehovaga pai munashca shina mañacpi uyai tucushun. Imasata Dios munashca shina mañashun. Yaya Diosta mañanamanda Biblia imata yachachishcata ricushun.

IMAHUATA JEHOVATA MAÑANA BALISHCA AN

3. Imaraicuta Jehovata mañana balishca an.

³ Jehovaga can paita mañasha tucuita cuintachun munan. Imasata yachanchi. Caita yachangahua Filipenses 4:​6, 7​ta leipai. Jehovaga tucuita cuintahuaichi nin. Tucuita Rac Diosca canda llaquinmi. Chiraicu, can imasa sintirishcata, can problemagunatas Diosta cuintangui.

4. Diospa ali amigo tucungahua, imata rana anchi.

⁴ Jehova Diosta mañanaga paiba ali amigo tucungahua yanapan. Shuc amigohuan caran uras paiguna imasa sintirishcata, imata yuyashcata, imahua llaquirishcata cuintanacushaga astahuan mas alita apanacunaun. Chasnallatami, Jehovaga pai imata yuyashcata, imasa sintishcata, nalla imata rangaraushcatas Bibliaibi cuintan. Jehova Diosta mañaushaga can shungu ucuibi imata sintishcata cuintana ushangui. Caran uras mañashaga, Diospa ali amigo tucungui (Santiago 4:​8).

ÑUCANCHI MAÑASHCATA DIOS UYACHUN IMATA RANA ANCHI

5. Imaraicuta tucui mañashcata Jehova mana uyanzhu ninchi.

⁵ Jehovaga tucui paita mañashcagunata uyanzhu. Mana. Profeta Isaias timpuibi, Jehovaga israelita runagunata nira: “Caran uras mañacpihuas, mana uyanichu, runata huanchishcamanda paiguna maquiga rahuaimuilla man” (Isaias 1:15). Jehova Dios mana gustashcata rashaga paimanda caruyashun. Chasna racpi, ñucanchi mañashcagunata Dios mana uyangachu.

6. a) Diosta quirinaga imahuata balishca an. b) Imasata Diosta quirishcata ricuchinchi.

⁶ Jehova ñucanchi mañashcata uyachunga, paita quirina manchi (Marcos 11:24). Apostol Pablo nira: “Diosta mana quirishaga paita cushiyachinata mana ushanzhu. Canguna Diosma caillayangahua punda quirina manguichi pai causaunmi nisha. Chasnallata paita mascashaga pai ñucanchita alita yanapangaraun nisha quirina manchi” (Hebreos 11:​6). Mana Diosta quirinimi ninalla chanchi. Jehova Diosta sirtu quirishaga, paita tucuibi casuna anchi (Santiago 2:26 leipai).

7. a) Jehovata mañaushaga imahuata respetohuan, mansu shunguhuan mañana anchi. b) Imasata shungumanda Diosta mañashcata ricuchishun.

⁷ Jehovata mañaushaga, respetohuan, mansu shunguhuan tapuna anchi. Imaraicu. Shuc presidentehuan cuintanacushaga respetohuan rimanchi. Jehovaga tucuita rac Dios man. Chiraicumi paita mas respetohuan, mansu shunguhuan cuintana anchi (Santiago 4:6; Genesis 17:​1; Salmo 138:​6). Chasnallata, shungumanda mañana anchi. Yangalla mana chillatata chillatata rimasha mañana chanchi (Mateo 6:​7, 8).

8. Diosta mañashaga imata rana anchi.

⁸ Chasnallata, ñucanchi mañashcata pactachingahua esforsarina anchi. Por ejemplo, ñucanchi minishtishcata charingahua tapushaga, mana quilla ana chanchi. Astahuanbas, Jehova Dios tucuita cuchun nishaga mana chapana chanchi. Tarabana ashaga, imaibihuas sinzhita tarabailla (Mateo 6:11; 2 Tesalonicenses 3:10). Alita rangahua mañashaga, ima mana aligunatas ama raichu. Dios mana gustashcata saquingahua mañashaga, tucui mana ali raigunamanda caruyana manchi (Colosenses 3:⁠5). Cunanga, Yaya Diosta mañanamanda runaguna tapurishcata yachashun.

DIOSTA MAÑANAMANDA IMATATA TAPURINAUN

9. a) Pitata mañana anchi. b) Diosta mañanamanda Juan 14:​6 imatata yachachin.

⁹ Pitata mañana anchi. Jesusca paita caticcunata casna mañanata yachachira: “Ñucanchi ahuapachaibi tiyac Yaya” (Mateo 6:​9). Yaya Jehovallata mañana anchi. Jesuspas nirami: ‘Ñuca ñambi ani, sirtuta rimac ani, causaita cucpas ani. Mana pihuas ñuca Yayahuagma rinata ushanzhu mana ñucahuan rishaga’ (Juan 14:​6). Chiraicu, Jesuspa shutibi mañana anchi. Jesuspa shutibi mañanaga ima tan. Jehova ñucanchi mañashcagunata uyachun nishaga Jesus rashcata balichina anchi. Cai libroibi, Jesus ñucanchi uchamanda, huañuimanda quishpichingahua shamushcata yachashcanchi (Juan 3:16; Romanos 5:12). Chasnallata, Jehovaga Jesusta Sumo Sacerdote, Taripac achun saquishca (Juan 5:​22, 23; Hebreos 6:​20, NM).

10. Cungurishallachu mañana anchi. Intindichipai.

¹⁰ Cungurishallachu mañana anchi. Mana. Jehovaga mana ninzhu shayarishalla, tiyarishalla, cungurishalla mañanata. Imasa mañashahuas respetohuan mañana anchi (Nehemias 8:​6; Daniel 6:10). Jehovaga, paita shungumanda cuintashcata balichin. Astahuanbas chunlla o sinzhita rimasha mañana ushanchi. Chimanda maibi aushas, tuta, punzha acpihuas mañanalla manchi. Ñucanchi mañashcata mana maican uyacpihuas Jehova Diosca uyanmi (Nehemias 2:​1-6).

11. Imagunamandallata mañana anchi.

¹¹ Imagunamandallata mañana anchi. Tucui Jehova munashcata mañana anchi. Bibliaga ninmi: “Dios munashca shina mañasha tapucpiga pai uyangallami” (1 Juan 5:14). Ñucanchi minishtishcagunata mañana ushanchi. Jehovahuan cuintanacunaga shuc ali amigohuan cuintanacuna shina man. Tucui ñucanchi yuyashcata, pinsashcata cuintana ushanchi (Salmo 62:​8). Chasnallata , alita rangahua paiba espiritu santota mañana anchi (Lucas 11:13). Chimandas, ali yuyaihuan alita rangahua, llaquigunata ahuantangahua ursata cuchun mañana anchi (Santiago 1:​5). Jehova ñucanchi uchata perdonachun mañana anchi (Efesios 1:​3, 7). Chasnallata aillugunamanda, Diosta sirviccunamanda, shuccunamandas mañana manchi (Hechos 12:​5; Colosenses 4:12).

12. Mañaushaga imatata mas balichina anchi.

¹² Mañaushaga imatata mas balichina anchi. Jehova Diosta, pai munaita mas balichina anchi. Jehova tucuita ñucanchiraicu rashcamanda, shungumanda pagrachuna anchi (1 Cronicas 29:​10-13). Jesusca paita caticcunata imasa mañanata yachachiushaga, punda imata mas balichisha mañanata yachachira (Mateo 6:​9-13 leipai). Jesusca Jehova shuti atunyachishca achun nisha punda mañanata yachachira. Chihuasha, Diospa Reino shamuchun nisha, paiba munai tucui Allpaibi pactarichun nisha mañanata yachachira. Cai balishcagunamanda mañashca huasha ñucanchi minishtishcata tapunata yachachira. Jehovata, paiba munaita pundai churasha mañashaga ñucanchiraicu ima mas balishca acta ricuchinchi.

13. Masna tiempotata Diosta mañana anchi.

¹³ Masna tiempotata Diosta mañana anchi. Bibliaga mana ninzhu. Diosta mañaushaga imamanda cuintashahuas, amu munashca tiempota mañana ushanchi. Por ejemplo, chara mana micushallata Diosta mañana ushanchi. Randi, Jehovata pagrachungahua, ñucanchi problemagunamanda cuintangahua unaita mañana ushanchi (1 Samuel 1:​12, 15). Jesuspa timpuibi maican runagunaga painata balichinauchun nisha mañac anaura. Ñucanchiga mana chasna rana chanchi (Lucas 20:​46, 47). Jehovaga chasna mañashcata mana uyanzhu. Paiga shungumanda sirtuta rimasha mañanata gustan.

14. a) Masna cutinda mañana anchi. b) Jehovamanda imatata yachanchi.

¹⁴ Masna cutinda Diosta mañana anchi. Jehovaga caran uras ñucanchi paihuan cuintachun munan. Bibliaga ninmi: “Diosta mañashalla causaichi”, “mana saquisha Dioshuan cuintasha causaichi” (Romanos 12:12; 1 Tesalonicenses 5:17). Jehovaga ima uras paita mañacpihuas uyanllami. Pai llaquic, ali shungu ashcamanda caran punzha pagrachuna ushanchi. Chasnallata, ñucanchita cuirasha, ursata cusha, cushilla angahua yanapachun mañana ushanchi. Jehova paita mañangahua saquishcata pagrachushaga, tucui uras paihuan cuintanacushun.

15. Diosta mañanata tucuchiushaga imahuata “amen” o “chasna achun” nina anchi.

¹⁵ Diosta mañanata tucuchiushaga imahuata “amen” o “chasna achun” nina anchi. Amen nishaga “chasna achun” nisha mañanchi. Chasna nishaga, shungumanda mañashcata ricuchinchi (Salmo 41:13). Chasnallata, Bibliaga ninmi, shuc runaguna ñaupacpi mañaushaga “amen” nina manchi. Amen nishaga chi runa mañashcata Dios pactachichun nisha chasna ninchi (1 Cronicas 16:36; 1 Corintios 14:16).

ÑUCANCHI MAÑASHCATA DIOSCA IMASATA CUTICHIN

16. Diosca ñucanchi mañashcata uyanzhu. Intindichipai.

¹⁶ Diosca ñucanchi mañashcata uyanzhu. Indá. Bibliaga ninmi Diosca “mañashcata uyac” man nisha. Chiraicumi, Dios ñucanchi tapushcata cungami ninchi (Salmo 65:​2; Isaias 30:19). Jehovaga runaguna shungumanda mañashcata uyasha cun.

17. Jehovaga ñucanchi mañashcata cungahua imasata angelgunata, paita sirviccunata utilizan.

¹⁷ Jehovaga paiba angelgunata, paita sirvic runagunata utilizasha ñucanchi mañashcata cutichin (Hebreos 1:​13, 14). Ashca runaguna Bibliata intindingahua Diosta mañashcauna, chi huashalla Testigoguna pactashcauna. Caita yachasha angelguna Bibliamanda “gustu cuintaigunata” ricusha yanapaushcata yachanchi (Apocalipsis 14:​6 leipai). Chimandas, ashca runagunaga problemata charisha, imata minishtishahuas Jehovata mañashcanchi. Cai mañashcata cutichingahua, Jehova Diosca paita sirvic runagunatami ñucanchita yanapangahua cachan (Proverbios 12:25; Santiago 2:16).

18. Jehovaga ñucanchi mañashcata cutichingahua, imasata Bibliata, paiba espiritu santota utilizan.

¹⁸ Jehovaga ñucanchi mañashcata cungahua, paiba espiritu santota utilizan. Problemata alichingahua mañacpiga Jehova Diosca paiba espiritu santohuan alita ranata ricuchisha, ursata cusha yanapan (2 Corintios 4:​7). Chimandas, Jehovaga ñucanchi alita rangahua Bibliaibi rimasha ñucanchi mañashcata cutichin. Bibliata leisha, maicanbiga ñucanchi munashcatachari tupashun. Chasnallata, Jehovaga tandarinaibi shuccuna rimashcata uyachisha cushiyachi tucunchi. Astahuanbas, congregacionbi cuirac ancianoguna Bibliata leisha cushiyachi tucunchi (Galatas 6:​1).

19. Imahuata mañashcata Jehovaga mana uyanzhu nina ushanchi.

¹⁹ Ima urasca tapurishcanguichari, imahuata Jehova Diosca ñuca mañashcata mana uyahuan nisha. Chasna ashahuas, Jehovallami ñucanchi tapushcata ima uras, imasa cunata yachan. Paillami tucui ñucanchi minishtishcata alita yachan. Ñucanchi mañashca balishca acta ricuchingahua, Jehovaibi quirishcata ricuchingahua mañasha catina anchi (Lucas 11:​5-10). Imasaibi Jehovaga mana ñucanchi yuyashca shina cutichingachu. Por ejemplo, shuc atun llaquita charisha Diosta mañana ushanchi. Jehovaga llaquita anchuchina randi, ahuantangahua ursata cuna ushan (2 Corintios 4:7 leipai).

20. Imahuata caran uras mañana anchi.

²⁰ Diosta mañanaga pai ñucanchita llaquisha cushca bendicion man. Chiraicu, ñucanchi mañashcata Dios uyanmi ninchi (Salmo 145:18). Chasnallata, tucui uras shungumanda mañacpiga Jehova Diosma mas caillayasha paiba amigo tucushun.