Ñucanchi tandarinama rinaga imasata yanapaitucungui

Testigo de Jehovaguna tandarinama rishcanguichu. Can cai tandarinama chara mana rishallata, rinata munashaga manzharinguimachari. Can tapuringuima: Chi tandarinaiga testigo de Jehovaguna imatata ranaun nisha. Imahuata chi tandarinagunaga paigunaraicu balishca an. Ñucahuas rinachu ani. Tandarinama rishaga imasa Diosma mas caillayangahua, camba causaibi yanapashcata yachangui.

1. Imaraicuta tandarinchi

Shuc Bibliata quillcac runa nira: “Atun tandarinai Jehovata alabasha” (Salmo 26:12). Cunan punzhaibihuas, testigo de Jehovaguna tandarinaun. Chita rashaga, cushillami sintirinaun. Mundu intiruibi, caran semanai Diosta alabasha cantangahua, paita mañangahua pariulla tandarinaun. Chasnallata, caran huatai atun tandarinata charinaun.

2. Ñucanchi tandarinagunaibi imatata yachangaraungui

Ñucanchi tandarinagunaibi, Diospa shimimanda yachanchi. Chibi, Biblia nishcata pagllai yachachinaun (Nehemias 8:8​ta leipai). Can tandarinama rishaga, Jehovamanda, pai imasa ashcamandahuas masta yachangui. Jehova canda llaquishcamanda yachashaga, paima mas caillayanata munangui. Chasnallata, cushilla causaita charingahua, imasa Jehova canda yanapashcata yachangui (Isaias 48:​17, 18).

3. Tandarinaibi ricsingaraushca runagunaga imasata yanapaitucungui

Bibliaga nin: “Ñucanchipura llaquinacusha alita rasha pariumanda yanapanata yuyarinacushunchi. Tucui uras Diospa runagunahuan paiba huasibi tandarinata mana saquina chanchi” (Hebreos 10:​24, 25). Tandarinaibiga shungumanda llaquinacuc runagunata tupangui. Paiguna can shina Jehovamanda mas yachanata munanaun. Chibi, Bibliamanda sinzhiyachic yuyaigunata uyangui (Romanos 1:​11, 12​ta leipai). Chasnallata, turmintuta binsic runagunahuan cuintanacunata ushangui. Chiraicumi, Jehovaga ñucanchi tandarinauchun munan.

CAIMANDA MASTA YACHAI

4. Testigo de Jehovaguna tandarina

Punda Jesusta caticcuna, Jehovata adorangahua tandaric anaura (Romanos 16:​3-5). Colosenses 3:16​ta (TNM) leichi,a huasha cai tapuimanda cuintanacuichi:

• Punda Jesusta caticcunaga imashinata Jehovata alabac anaura.

VIDEO: Ñucanchi tandarinagunaga imasa tan (2:​12)

• Colosenses 3:16 nishca shina, tandarina huasibi runaguna imatata ranaun.

• Videota o dibujota ricusha, ñucanchi tandarinamanda, imatata mas gustaitucungui.

2 Corintios 9:7​ta leichi, huasha cai tapuimanda cuintanacuichi:

• Testigo de Jehovaguna tandarinaibi, imahuata cullquita mana tapunchi.

Cai semanamanda shuc tandarinaibi imata yachangaraushcata canda yachachic runahuan ricui.

• Chi tandarinai yachachingaraushcaga imatata mas gustaitucungui.

Yacharanguichu

Internetpi jw.org pistuibi, mundu intiruibi, ñucanchi tandarina maibi ashcata, ima uras ashcata yachanata ushangui.

1. Ñucanchi tandarinagunaibi discursoguna, videoguna, Bibliamanda yachachina partiguna tian. Tucui tandarinagunata callaringahua, tucuchingaraushahuas, shuc cancionda cantasha, Diosta mañanchi.

2. Tandarinamanda maican partigunaibi huinguna maquita alsasha rimanata ushanaun.

3. Maicangunahuas tandarinagunama shamuna ushanaun: ailluguna, cariguna, huarmiguna, rucuguna, huahuaguna.

4. Testigo de Jehovaguna tandarinagunaibiga mana cullquita tapunchichu.

5. Tandarinama ringahua esforzarina manchi

Jesuspa aillumanda yuyarishun. Nazaret llactaibi causanaura. Caran huataibi, Jerusalenbi ac Diospa huasima ringahua, urcu ñambigunata quimsa punzhata puric anaura. Lucas 2:​39-42​ta leichi, huasha cai tapuigunamanda cuintanacuichi:

• Imatata yuyangui, Jerusalenma rinaga sinzhi chara.

• Canga tandarinama ringahua, ima arcaigunatata binsina angui.

• Tandarinama rina sinzhi acpihuas canbaraicuga ali chan. Imahua.

• Imahuata tandarinama mana cungarisha rina anchi.

IMATA YACHASHCANGUI

Tandarinama rinaga Jehovamanda masta yachangahua, paima mas caillayangahua, shuccunahuan Diosta pariulla adorangahua yanapaitucungui.

Yachashcata cuintai

• Jehovaga imahuata tandarinama ringahua invitaitucunchi.

• Testigo de Jehovaguna tandarinaiga imatata yachangui.

• Tandarinagunama rina imasata yanapaitucungui.

CANLLATA MASTA YACHAI

Tandarinama rinata manzhanguichu. Shuc runa tandarinama risha, imasa gustai callarishcata ricui.

Llaquihuan pasiachishcata mana ima uraspas cungarishunzhu (4:16)

Tandarinama rinata gustac maltata ricsi. Tandarinama risha catingahua imata rana ashcata ricui.

Tandarinagunama rinata gustahuara (4:33)

Tandarinagunamanda maican runaguna imata yuyashcata yachai.

“Tandarina huasima rina imahuata ali an” (jw.org internet pistuibi)

Tandarinama rishca huasha, shuc pandillero imasa paihua causaita cambiashcata ricui.

“Maita rishahuas ñuca illapata mana saquic charani” (La Atalaya, 1 de julio de 2014)