17 YACHANA PARTI
Jesusca ima tunu runa tan
Jesus cai Allpaibi aushcai, pai rashcata, nishcata yachasha catishaga, paima, paiba Yaya Jehovama mas caillayanchi. Jesusca ima sami runa tan. Jesus shina angahua, imatata rana anchi.
1. Imaibita Jesusca paiba Yaya shina an
Jesusca, cieloibi paiba Yayahuan, mana yupaibac huatagunatachu causara. Chibi, Jesusca paiba Yaya imasa ashcata ricusha yachara. Chiraicumi, Jesusca paiba Yaya shina sintin, yuyan, imatas ran (Juan 5:19ta leipai). Jesusca paiba Yaya shina ashcata ricuchin. Chimandami, paiga casna nira: “Maican ñucata ricucca Yayatahuas ricushcami” (Juan 14:9). Casna, Jesusta alita ricsishaga, paihua Yaya Jehovatas alita ricsinguimi. Jesus runagunata llaquishcaga, Jehova canda llaquishcata ricuchin.
2. Imasata Jesusca paiba Yayata llaquishcata ricuchira
Jesus nira: ʻCai munduibi auc runaguna ricunauchun nisha, ñuca Yayata llaquishcamandami, tucui pai mandashcagunata pactachishcaniʼ (Juan 14:31). Cai Allpaibi aushcai, Jesusca ima turmintuguna tiacpihuas, Jehovata casusha, paita llaquishcata ricuchira. Astahuanbas, Jesusca paiba Yayamanda rimanata munac ara. Chasnami, Diospa amigoguna tucunauchun, shuccunata yanapara (Juan 14:23).
3. Imasata Jesusca shuc runagunata llaquishcata ricuchishca
Bibliaga ninmi, Jesus “runagunata yapa llaquinmi” nisha (Proverbios 8:31). Jesus shuc runagunata shungumanda yanapashaga, mana imatas tapurachu. Jesusca mana pai ushaita ricuchingahuallachu cai milagrogunata rara. Randi, runagunata llaquishcamandami casna rara (Marcos 1:40-42). Llaquic mara, tucui runagunata pariu ricuc ara. Tucui ali corazonyuc runagunata yanapasha cushiyachic ara. Tucui sami runagunata llaquishcamandami, Jesusca turmintarisha huañura. Chasnallata, pai yachachishcata casuc runagunataga ashcatami llaquin (Juan 15:13, 14ta leipai).
CAIMANDA MASTA YACHAI
Jesus ima tunu runa ashcata mas yachashun. Chasnallata, ñucanchihuas pai shina angahuami, imasa shuc runagunata llaquisha yanapana ushashcata ricushunchi.
4. Jesusca paiba Yayata llaquinmi
Jesusca pai rashcahuanmi, Diosta llaquishcata ricuchira. Paiga Diosta imasa llaquinata yachachitucuranchi. Lucas 6:12ta chimandas Juan 15:10 y 17:26ta leichi. Caran textogunata leishca huasha, cai tapuimanda cuintanacuichi:
Jesus rashca shina, imasata Jehovata llaquishcata ricuchinata ushanchi.
Jesusca paiba Yayata llaquira. Tucui uras paihuan cuintasha mañac ara.
5. Jesusca minishtirishca runagunata llaquisha yanapan
Jesusca paillaibi yuyana randiga, shuc runagunaibimi yuyac ara. Sambayashca ashahuas, paiba timpuhuan, paiba ursahuan, shuccunata yanapanata munac ara. Marcos 6:30-44ta leichi, huasha cai tapuigunamanda cuintanacuichi:
Caibi nishca shina, imasata Jesusca shuccunata yanapana munashcata ricuchira (Versiculo 31, 34, 41 y 42ta ricuichi).
Imahuata Jesusca chi runagunata yanapara (Versiculo 34ta ricuichi).
Jesusca paiba Yaya shina, llaquic ashcatami ricuchin. Caiga, imatata Jehovamanda yachachitucunchi.
Jesus rashca shina, imasata shuc runagunata yanapanata ushanchi.
6. Jesusca ali shunguyuc man
Jesusca mana ashcata charishahuas, ali shunguyuc mara. Ñucanchihuas, pai shina angahuami yachachitucushcanchi. Hechos 20:35ta leichi, huasha cai tapuimanda cuintanacuichi:
Jesus rimashca shina, imata cushiyachitucunchi.
VIDEOTA ricuichi, huasha cai tapuimanda cuintanacuichi:
Mana ashcata charishahuas, imasata cumbirasha yanapanata ushanchi.
Yacharanguichu
Bibliaga yachachinmi, Jesuspa shutibi Jehovata mañana anchi (Juan 16:23, 24ta leichi). Casna rashami, Jehovahuan amigo tucungahua yanapac ashcamanda, Jesusta pagrachusha balichinchi.
MAICANGUNAGA CASNAMI NINAUN: “Dios runagunata turmintachisha camaun”.
Jesusca paiba Yaya shina llaquic man. Caiga, Jehova mana turmintachic ashcata imasata ricuchitucunchi.
IMATA YACHASHCANGUI
Jesusca, Jehovata, runagunatas llaquinmi. Jesusca paiba Yaya shina man. Chiraicu, Jesusta mas ricsishaga, Jehovata mas ricsinguimi.
Yachashcata cuintai
Jesus rashcata catishaga, imasata Jehovata llaquishcata ricuchinchi.
Jesus rashcata catishaga, imasata runagunata llaquishcata ricuchinchi.
Jesusmandaga imatata mas gustangui.
CANLLATA MASTA YACHAI
Jesus shina angahua, imata rana ushashcata ricui.
“Jesus shina causashunchi” (Jesús: el camino, la verdad y la vida, página 317)
Jesuspa shutibi Dioshuan cuintangahua, imahua balishca ashcata ricui.
“Imahuata Jesuspa shutibi Diosta mañana anchi” (La Atalaya, 1 de febrero de 2008)
Bibliaga Jesus imasa ricuric ashcata rimanzhu.
“Jesusca ima sami ricuric ñahuiyuc tara” (jw.org internet pistuibi)
Jesus huarmigunata imasa tratashcamanda imatata yachanchi.
“Diosca huarmigunata respetasha balichin” (La Atalaya, 1 de septiembre de 2012)