Leina textoguna—Bibliaga caitami yachachin

CAPITULO 1

DIOSCA IMASA TAN

(Santiago 1:13) Ima uras maican runa juchata ranata yuyariushaga, ama ninguichu Diosmi casna yuyachihuan nisha. Diosca juchata ranata mana yuyaricchan, chasnallata mana pimas jucha rana yuyaita cunzhu.

(Salmo 37:9-11) Mana ali runagunallatami tucuchishca angauna. Chasna acpihuas, Jehovaibi chapauccunaga Allpata apingauna. ¹⁰ Ñallami irus runaga mana tiyanga. Pai aushca pistuta ricucpi ña mana tiyangachu. ¹¹ Chasna acpihuas, ali shungu runagunami Allpata apingauna. Cungailla gustuta causasha cushi angauna.

(1 Pedro 5:7) Dios cangunata yapa ali cuirashcamanda ama imamandas turbarisha nusparichichu, ima tucucpihuas paita catichi.

(Hechos 17:11) Berea llactaibi tiyauc runagunaga Tesalonica llactaibi tiyac runagunamanda mas ali shungu manaura. Paiguna Diospa shimita ali munaihuan uyanaurami, chasnallata caran punzha Diospa shimita ricunaura Pablo camachishcaga sirtuchu nisha.

CAPITULO 2

BIBLIATAGA DIOSMI QUILLCACHIRA

(2 Timoteo 3:16) Diosllata paihua runagunata yuyachisha quillcachira tucui paihua shimita. Chi shimi balinmi ali purinata yachachingahua. Paihua shimimanda ñucanchi jucha rashcatas yachanchi. Ñucanchi pandacpi Diospa shimi pasacta yachachin imasna ñucanchi alichinata. Chasnallata ñucanchi alita causanatahuas yachachin.

(Apocalipsis 1:3) Maican runaga cai quillcata ricusha cushi angaunami. Chasnallata cai quillcashcata ricuc runata rinrihuan uyasha pactachic runagunahuas cushi angaunami. Cai rimashca shimiguna ñallami pactaringa.

(Tito 1:2) Cai pachata chara mana rashcallaita mana llullac Dios casna rimashcami, Ñucahua runagunaga ñucahuan huiñai causanaungami nisha rimara. Chita quirishami causaunchi.

(Hebreos 4:12) Diospa shimiga shuc sinzhi rijuncuinta man. Ishcandi partima jiluyuc rijunhuan tucsicpi yapa ucuma pitin, mucugunais tullu ñuctugunais yaicun. Ñáa Diospa shimi chi rijunmanda yali sinzhi man. Ñucanchi shungüibi yaicusha imatas ñucanchi munasha yuyariuctas Diospa shimiga ricuchin.

CAPITULO 3

IMARAICUTA DIOSCA ALLPATA RUNAGUNATAS RARA

(Santiago 1:14-15) Randi maican runas paihua quiquin mana ali yuyaimandallatami umachitucun, chasna acpi juchata ranata yuyarin. Chi juchaga mana ali yuyaimandami llucshin, casna juchata rashcamandami huañuiga shamunga.

(Genesis 3:1-5) Chasna acpihuas, Jehova Dios rashca sachaibi tiac tucui sacha anilmalgunamanda palumi mas sabiru ara. Chasna ashami huarmita rimangahua callarira: “Sirtuchu Diosca cangunata nishca, cai jardinbi auc tucui ruyagunamanda ama micunguichichu” nisha ² Evaga cutichira: “Jardinbi auc ruyagunamanda muyuta micunata ushanchimi, ³ cuti jardin chaupibi shayauc ruyamanda muyuta micunamandaga Diosca nishcami, chitaga mana micuna changuichi. ‘Mana, mana llanganallas changuichi, mana huañungahua’ ”. ⁴ Chasna nicpimi, huarmita paluga nira: “Sirtupacha mana huañunguichichu. ⁵ Diosca yachanmi chita micushca punzhallatami canguna ñahui pascaringa. Chibiga Dios cuinta tucunguichi alita mana alita yachasha”.

(Romanos 5:12) Callari uras cai pachama juchaga shuc runamandallami shamura, chi juchamanda huañunahuas callarira. Chi urasmanda cunangama tucui runaguna juchata rashcamanda huañunchi.

(Proverbios 27:11) Ñuca huahualla ali yuyac ai, ñuca shunguta cushiyachihuai. Chasna racpi, ñucata piñasha caudsayachiuta cutichisha.

(Daniel 2:44) Chi reygunahua punzhagunaibiga, ahua pachamanda Diosmi shuc Reinota churanga, mana ima urashuas tucuringachu. Chi Reinoga mana maican llactamas pasachishca angachu. Chi tucui Reinogunata cutasha chingachinga, paillatami huiñaibac tiyasha catinga.

(Juan 3:16) Yaya Diosca cai pachai causac runagunata yapa llaquishcamandami paihua sapalla churita caima cachamushca tucui paita quiric runaguna ama [...] chingarinauchun, astahuanbas huiñai causaita charinauchun nisha.

(Juan 17:3) Chi huiñai causanaga casnami: Can sirtu quiquin Yaya Dios actas ricsisha quirina man, chasnallata can cachamushca Jesucristotahuas.

(Isaias 32:18) Ñuca anllashca runaguna cungailla, alita causana llactaibi causangauna. Turmintu illac, cungailla samana huasigunaibi causangauna.

(Miqueas 4:4) Caran amu, paiguna uva ruya ucuibi, higo ruya ucuibi tiyarisha cungailla samangauna. Mana pitas manzhangaunachu. Caitami, Mandac Jehova Dios rimashca.

(Isaias 65:21-24) Huasigunata tarbasha chibimi causangauna. Uva chagrata tarpusha, paigunallatami muyuta micungauna. ²² Shuccuna causachun mana huasingaunachu. Shuccuna micuchun, mana chagrangaunachu. Ñuca anllashca runaguna, ruya shina unaita causangauna. Ñuca anllashcaguna, paiguna quiquin maquihuan, imatas rangauna. ²³ Mana yanga tarbangaunachu, turmintuta apamungahua mana huahuayangaunachu, Jehova Dios bendiciashca miraiguna ashcamanda, paihua huahuagunas bendiciashca mangauna. ²⁴ Paiguna mana tapugllaita ñucami cutichisha. Paiguna chara rimaugllaita ñucami uyasha.

(Apocalipsis 11:18) Ña punzha pactamushcami cai pachata huaglichic runagunata huaglichingahua.

(Isaias 11:6-9) Sacha allcuga ovejahuan shuc timputa causangami. Muru pumaga chivohuan siringa. Malta huagra, malta leon, sacsacta micushca animalhuas, huiguna pariulla causangauna. Shuc huahuallami paigunata pushanga. ⁷ Huagra osahuan quihuata micungauna, paina huahuagunas pariulla siringauna. Leonga toro shina ucshata micunga. ⁸ Huahuaga cobra palu uctuibi pugllanga. Chasnallata, canic palu uctuibi shuc huahua paihua maquita churanga. ⁹ Ñuca ucha illac urcuibi mana pihuas dañusha huaglichingachu. Mar yacu undashca shinami, tucui Allpa intiru Jehovata ricsina yuyaihuan undaringa.

(Isaias 65:25) Sacha allcuga ovejahuan pariulla quihuata micungauna. Leonga toro shina ucshata micunga. Chasnallata, paluga pulbuta micunga. Ñuca ucha illac urcuibi mana pihuas dañusha huaglichingachu. Jehovami nishca.

(Juan 5:25) Sirtupacha cangunata nini, Diospa Churi rimashca shimita huañushca runagunahuas uyangaraunguna, maican chi shimita uyasha casuccunaga causangaunami. Chasna tucuna urasca ña pactamushcami.

CAPITULO 4

JESUCRISTO PI ASHCATA RICSINCHICHU

(Juan 3:13) Mana pihuas jahuapachamaga sicashcachu, randi ñuca Runa Tucuc nishcallami chimandallata uraicumuc ashami ushani.

(Juan 6:38) Ñucaga jahuapachamanda shamushcanimi, mana ñuca quiquin munashcata rangahua astahuanbas ñucata cachamuc Yaya munashcallata rangahua shamushcani.

(Juan 6:62) Chasna ashaga imashi tucunma Runa Tucuc ac ñuca ñaupa tiyashcamallata sicauta canguna ricucpiga.

(Juan 17:4, 5) Can ñucata imatas rangui nisha rimashcataga tucuitami pactachishcani. Chasna rashami cai pachaibi canda balichishcanimi. ⁵ Ñuca chara cai pachata rashcallaitami camba mayanbi yapa ali balichishca aurani. Cunanga chi balinallatata cuti cuhuai Yayalla.

(Juan 14:28) Ña uyahuaranguichimi riunimi nisha ñuca nishcata, chasnallata ñuca cuti bulltiamushami cangunahuan aungahua nishcatahuas. Canguna ñucata sirtu llaquishaga cushiyanguichimami. Ñuca Yayahuacta riushcata yachashaga cushiyanguichimami pai ñucamandahuas mas jatun ashcamanda.

(Mateo 9:35, 36) Jesus tucui llactagunai puric ara jatun llactaibis ichilla llactagunaibihuas. Maibi purishas israelguna tandarina huasigunai yaicusha cushi shimita yachachic ara casna nisha cangunataga Diospa ali mandanamanda cuintasha paimi quishpichinata munan nishami camachic ara. Chasnallata tucui imasna ungüigunatas nanaigunatasmi jambic ara. ³⁶ Chi ashca runagunata ricusha paigunata llaquisha yanapashcanguichimi nira. Chi runagunaga turbarishcami tiyac anaura, paigunata cuirac runa mana pihuas tiyashcamandami jichushcacuinta anaura.

CAPITULO 5

DIOSCA ÑUCANCHITA QUISHPICHINGAHUA IMATA RASHCA

(Mateo 20:28) Ñuca Runa Tucuc asha mana cuirahuanauchun nisha shuc jatun mandac tucungahua mana shamuranichu, astahuanbas shuccunata cuirasha yanapangahuami shamurani. Tucuigunahua dihuita pagashcacuinta ñuca huañungahua shamurani ashca runaguna juchamanda quishpichisha lugar causaita charinauchun nisha shamurani nira.

(Romanos 5:19) Shuc runalla Diosta mana casuc ashcamandami tucui runaguna juchayuc tucunaura. Chasnallata shuc runalla Diosta casushcamandami ashca runaguna Dioshuan alichishca tucushcanchi.

(Romanos 3:23, 24) Tucui runagunaga juchata rashcamandami Diospagma pactanata mana ushanaunzhu. ²⁴ Chasna agllaita Dios runagunata llaquisha Jesucristo huañushcamanda quiriccunataga tucui paiguna juchagunata pichasha lugaryachishcami. Chasna acpi paigunaga Dioshuan ña ali tucushcaunami.

(Lucas 22:19) Chihuasha panda japisha Yaya Diosta pagrachu nira. Chi panda paquisha paigunama cusha rimara, Caiga ñuca aicha man, cangunamanda huañungaraushca aicha. Ñucata yuyaringahua casnallata rasha causanguichi nira.

CAPITULO 6

HUAÑUSHAGA IMATA TUCUNCHI

(Eclesiastes 9:5, 6) Causaccunaga huañuna ashcata yachanaunmi. Cuti huañushcagunaga mana ima yuyaillatahuas charinaunzhu. Mana imatas apinaunzhu, paigunata yuyarinahuas cungarishcamanda. ⁶ Chasnallata, paiguna llaquinahuas, piñanahuas, tumbanahuas ña chingarishcami. Indi shitashca Allpaibi mana imatas ranata charinaunzhu.

(Eclesiastes 9:10) Camba maquihuan imata rana ashahuas, camba ushaihuanllanda rai. Tarbana, ima ranata yarina, yachana, intindinahuas can riushca Seol pistuibiga mana tiyanzhu.

(Genesis 3:19) Camba urinti umbihuanmi allpama bulltianagama micunata micungui. Chimanda apishca marangui. Allpa pulbumanda mangui, allpamallata bulltiangui.

(1 Juan 4:8) Diosca sirtu llaquic man. Chasna ashcamandami chi mana llaquic runagunaga paita mana ricsinaunzhu.

CAPITULO 7

DIOSMI HUAÑUSHCAGUNATA CAUSACHINGA

(2 Corintios 1:3, 4) Ñucanchi Señor Jesucristohua Yayataga pagrachu nishunchi. Pai yapa yuyarisha yanapac asha ñucanchita tucuibi cushiyachisha sinzhiyachin. ⁴ Ima llaqui tiyacpihuas ñucanchita cushiyachinmi ñucanchi randihuas pai cushca cushihuan llaquitucushca runagunata cushiyachisha sinzhiyachingahua.

(Juan 11:41, 42) Jesus mandashcata pactachisha chi rumita anchuchinaura. Chihuashami Jesus jahuama ricusha nira, Canda pagrachu nini Yaya, ñuca tapushcata can uyashcamanda. ⁴² Tucui uras ñuca tapushcagunata can uyashcata yachanimi, randi caibi auc runagunaraicu caitaga ninimi, can ñucata cachamushcata paiguna quirinauchun nisha canda rimarani.

(Isaias 40:26) Ahuama ñahuita alsasha ricuichi. Pita caigunata rashca. Paiga soldado muntungunata shinami surcun. Tucui chigunata shutibi cayan. Yapa ursata charishcamanda, paiga manzhanaita ushaita charin, chimandami mana pihuas pishinzhu.

(Hechos 24:15) Cai runagunashinami sirtu quirini ali causaucunas mana ali causaucunas huañushcahuasha cuti causaringaraushcata.

(Apocalipsis 21:4) Diosca paiguna huacashca ñahui yacutas pichasha chaquichingami. Huañunahuas illangami, huacanahuas, llaquirisha caparinahuas, nanaigunahuas tucuringami. Tucui chi ñaupa tiyaccuna ña tucurishca manga.

CAPITULO 8

DIOSPA REINOGA IMATA RANGARAUN

(Mateo 6:9-13) Astahuanbas canguna Yaya Dioshuan cuintausha casna yuyarina manguichi: Ñucanchi jahuapachaibi tiyac Yaya, camba shuti balichishca achun. ¹⁰ Camba ali mandanaga tucuibi mirarishca tucuchun. Jahuapachaibi can munashcata rashcacuinta cai pachaibihuas chasnallata rashca achun. ¹¹ Cunan punzha ñucanchi minishtishca micunataga cuhuai. ¹² Ñucanchita mana alita raccunata perdunashcacuinta ñucanchitas mana alita rashcagunatas perdunai. ¹³ Supai ñucanchita pandachisha nisha camacpi cuirahuai ñucanchi canda ama saquingahua.

(Apocalipsis 14:1) Chihuasha ricurani Sion nishca urcu jahuaibi Oveja shayauta. Paihuan pariu tiyanaura shuc patsac chuscu chunga chuscu huaranga (144.000) runaguna. Paiguna urintigunaiga Ovejahua shutitas, paihua yayahua shutitahuas quillcashca manaura.

(Apocalipsis 14:4) Chita cantaucunaga huarmigunahuan mana huagliccuna chanaura, juchas illac sumac causauc manaura. Paigunaga Oveja maita ricpihuas paihuan pariulla puriunguna. Tucui quishpichishca runagunamanda Yaya Diospacta Ovejahuactas punda anllashca manaura.

(Apocalipsis 12:7-10) Chihuashaga shuc jatun macanacuna jahuapachaibi tiyara. Mandauc angel Miguelmi paihua angelgunandi dragonhuan macanacunaura. Chasnallata dragonbas paihua angelgunandi Diospa angelgunahuan macanacunaura. ⁸ Chasna macanacushallata dragon mana binsinata ushara, chihuasha jahuapachaibi lugar mana mas tiyarachu chibi paiguna tiyangahua. ⁹ Chasna acpi chi dragonda chimanda allpama llucshichisha cachai tucura. Pai callari urasmanda palucuinta mara, supaigunahua amu Satanas nishca man, paiga intiru munduta umachic man. Paita cai munduma shitashca mara paihua angelgunandi. ¹⁰ Chimandaga jahuapachaibi sinzhita caparishcata uyarani casna nisha: Cunanga supaimanda quishpina punzha pactarishcami. Ñucanchi Dios pailla mandauc aushcata ricuchishcami. Chasnallata pailla tucuita ranata ushac ashcatas, paihua Cristo jatun mandac amu ashcatahuas ña ricuchishcami. Tutandi punzhandi ñucanchi Diospa ñaupacpi ñucanchi quiric huauquigunata culpayachiu supaitaga jahuapachamanda cai pachama ña tucsitucushcami.

(Salmo 37:10) Ñallami irus runaga mana tiyanga. Pai tiyaushca pistuta ricucpi, ña mana tiyangachu.

CAPITULO 9

TUCURIC PUNZHAGUNAIBICHU CAUSAUNCHI

(Hebreos 10:24, 25) Chita yuyarisha ñucanchipura llaquinacusha alita rasha pariumanda yanapanata yuyarinacushunchi. ²⁵ Tucui uras Diospa runagunahuan paihua huasibi tandarinata mana saquina chanchi. Maicanguna saquirigllaita ñucanchiga pariu tandarisha sinzhi tucungahua yanapanacuna manchi Cristo bulltiamuna punzha pactarimucta yachashcamanda.

CAPITULO 10

ANGELGUNA DEMONIOGUNA PIGUNA TANAUN

(Genesis 6:2) Chi huasha Diospa churiguna, runagunahua ushigunata munai callarinaura, paigunaga gustu huarmiguna manaura. Chimanda, paigunaraicu huarmigunata api callarinaura, tucui paiguna gustashcata anllanaura.

(2 Corintios 2:11) Chitaga rani supai ñucanchita ama binsichun nisha. Pai munashcataga ña yachanchimi. Pai ama chasna rachun nisha ñucanchi perdunasha alichinacuna manchi.

(Deuteronomio 18:10, 11) Cangunapuraibiga mana pihuas tiyana chan. Paihua churita ushushita ninaibi rupachic, adivinacionda rac, magiata rac, ima tucungaraushcata mascac, burujugunas, ¹¹ chasnallata, shuccunatahuas pajuchic, huaglichic runa, huañushcagunahuan cuintachicta mascac runa. Ima tucunata ricuc sinzhi yachac burujuguna, huañushcagunata tapuc runagunas mana tiyana chan.

(Proverbios 18:10) Jehovahua shutiga shuc sinzhi, ahua ricuna huasi shina man. Chaima alita rac runa callpacpiga, mitucuchi tucungami.

(Santiago 4:7, 8) Chasna yachasha camba munaita Diosma cuichi. Supaita mana uyasha paihuacpi mana manzhasha shayarichi, chasna racpi pai cangunamanda miticusha anchuringami. ⁸ Yaya Diospagma caillayaichi. Paihuagma caillayacpi pai cangunahuagma caillayangami. Juchayuccuna, canguna maquita maillashcacuinta jucha rashcagunata illacta saquichi. Dios munashcata ranatas juchata ranatas, ishcandita (2) ranataga mana ushanguichichu. Imatas mana alita yuyarinataga saquisha canguna shunguta alichichi.

CAPITULO 11

IMARAICUTA TURMINTUGUNA TIYAN

(2 Pedro 3:9, 10) Señor Jesucristo cuti shamushami nisha sirtu pai rimashca shina pactachingami. Maican runa pai yapa unayanmi nisha rimaunguna imaraicuta mana ucta shamun nishaga yuyaringuichi. Astahuanbas cangunata chapaunmi. Pai mana munanzhu shuc runahuas jichushca tucunata, randi caran runa paihua juchata saquisha Diospagma shamuchun nisha munashami chapaun. ¹⁰ Ña Señor Jesus shamuna punzhaga cungaimanda tucungami, shuhuac runa mana yachashca uras cungaimanda shamushcacuinta shamungami. Chi uras yapa manzhanayacta uyarinahuan cielo tucuringami. Tucui cieloibi tiyaccuna rupashca tucungaunami, cai munduga caibi tiyaccunahuan rupachishca tucungami.

(1 Corintios 10:13) Yuyarichi. Supai cangunata urmachinata munasha camagllaita paita binsinata ushanguichimi. Cangunata turmintachishcacuinta shuc quiriccunatas chasnallata pai quillachin. Yaya Diosca randi cangunata llaquishami supai quillachiushcaibi cangunata mana cungaringachu, canguna ahuantana tupullata saquingami mana yalicta. Supai quillachiushcaibi Yaya Dios canda ricuchingami imasna can supaita binsinata. Pai chasna canda ricuchicpi supai quillachishcata quishpinata ushanguimi mana juchata rasha. Chasnahuan ahuantanguichimi.

CAPITULO 12

DIOSPA AMIGO TUCUNGAHUA IMATA RANA ANCHI

(Salmo 55:22) Llashac carga shina turmintuta Jehovama apachi. Paillatami yanapai tucungui. Alita rac runa llaquigunata charichun mana saquingachu.

(Salmo 15:1-5) Jehovalla, pita camba carpa huasibi causanga. Pita camba ucha illac urcuibi causanga. ² Sumaclla causac runa, alita rasha paihua shungu ucuibi mana llullac runa chibi causanga. ³ Paihua calluhuan mana yanga culpashcachu. Pai mayambi ac runata mana llaquinaita rimashcachu. ⁴ Mana alita rac runata mana gustanzhu. Chasna ashahuas, Jehovata casuccunata balichinmi. Pai imata pactachisha nishca, sinzhi acpihuas, pactachinmi. ⁵ Paita cullquita mañac runata mana sicachisha cobranzhu. Ali shungu runata mana alita rana yuyaihuan mana tapunzhu. Caita rauc runa ima uraspas mana urmangachu.

CAPITULO 13

DIOS CUSHCA CAUSAITA BALICHISHUNCHI

(Hechos 17:24, 25) Cai pachata tucui caibi tiyaucunatas Diosmi rara. Paiga jahuapachaibi cai pachaibis amu ashcamandami mana runa rashca huasigunaibi causacchan. ²⁵ Chasnallata runa rashcatas Dios mana minishtinzhu. Astahuanbas paimi tucui ñucanchi causaitas samaitas tucui ñucanchi minishtishcagunatahuas cun.

(1 Juan 3:15) Maican quiric huauquigunata piñasha mana ricunayasha puric runaga shuc runata huanchiccuinta tucun. Canguna ña yachanguichimi runata huanchicca mana Diospa huiñai causaita charinzhu.

(Exodo 21:22, 23) Maican runaguna macanacuushcai shuc huicsayuc huarmita susirichisha, paiba huahua ñaupata pagarisha mana huañucpiga, cai runaga huarmihua cari masna cullquita tapushcata pagana man. Paiga juesguna masna cullquita pagana nishcata cuna man. ²³ Chasna acpihuas macanacuushcai susirisha maican huañucpiga, chi runahuas huañuna man.

(Hechos 15:28, 29) Diospa Samai ñucanchita yuyarichicpi, chasnata ranata yuyariranchi, cangunata ama yapa turmintachingahua caillata mandanchi: ²⁹ Ama micunguichichu yanga dioscunata ricuchishca aichagunata, chasnallata sipisha huanchishcatas, rahuaitahuas. Chasnallata ama shuccunahuan tacaringuichichu. Tucui caigunata pactachishaga ali causanguichimi. Cai shimigunallahuan cangunamanda dispirinchi, nisha quillcanaura.

CAPITULO 14

CAMBA AILLUHUAN CUSHILLA CAUSAI

(Efesios 5:25) Cristo paihua runagunata yapa llaquisha paigunamanda huañura. Chi cuintallatami cariguna, canguna huarmita llaquina anguichi.

(Efesios 5:28, 29) Cariguna chicuintallatami canguna huarmita llaquina anguichi camba quiquin aichata cuirasha llaquiushcacuinta. Maican cari paihua huarmita llaquisha paihua quiquin auc aichatashina llaquinmi. ²⁹ Yachanguichi mana pihuas paihua quiquin aichallatataga piñanzhu randi alita micushami, chimanda alita cuirarin. Cristoga chicuintallatami paita quiriccunata llaquisha cuiraunmi, carashcacuinta pai munashcata yuyachin.

(Tito 2:4, 5) Chasna causashami chi shuc mas quipa huarmigunata yachachinata ushanaunga caran shuc paihua carita huahuagunatahuas llaquingahua. ⁵ Chasnallata paiguna quiquin aichata mandasha sumacta causanauchun alita yuyarisha, paihua quiquin huasibi alita tarabasha, paihua carita casusha, shuccunatas yanapasha causana man nisha yachachinauchun. Chasna causacpi shuccunaga Diospa shimimanda mana jiridsata rimanaungachu.

CAPITULO 15

MAICAN RELIGIONDA BIBLIA NISHCA SHINA YACHACHIN

(Juan 17:17) Camba shimiga sirtu man Yaya. Paiguna camba sirtu shimita catishami cambaglla causanauchun nini.

(Juan 13:35) Casna tucui cangunapura llaquinacusha causaupiga tucui mundui ac runagunami cangunata ricushaga asirtangauna canguna ñuca japishca ñucata catic runaguna ashcataga.

(Juan 3:36) Diospa churita quiricca huiñai causaitami charin. Randi mana Diospa churita quirinata munacca mana charingachu chi causaitaga, randi Yaya Dios manzhanayacta cashtiganga nira.

(Juan 18:36) Jesus paita cutipara, Ñuca mandanaga mana cai pachamandachan. Cai pachamanda acpiga ashca ñucata catic runagunami macanacunaunma israelguna ñucata ama japinauchun nisha. Randi ñuca mandanaga mana cai pachamandachan, shugmandami an.

(Mateo 24:14) Diospa ali mandanamanda cuintasha paimi quishpichinata munan nishami tucui mundui chi cushi shimita camachishca tucungami tucui runaguna chita uyanauchun nisha, chihuasha cai pacha tucurina uras pactarimungami.

CAPITULO 16

DIOS MUNASHCA SHINA ADORANA ANCHI

(Hechos 17:29, 30) Ñucanchi sirtupacha Diosmanda miraiguna ashaga ama yuyarishunchi Diosca runa ushaimanda rashca man nisha. Ima curimanda cullquimandas rumihuanbas Dios rashcami an nisha ama yuyaringuichichu. ³⁰ Ñaupa uras runaguna yuyai illacta racpihuas Dios mana imatas rarachu. Cunanga pai tucui runagunata nin: Canguna jucha rashcata saquisha ñucata catihuaichi nisha.

(2 Corintios 6:17) Chiraicumi jatun Dios casna quillcachishca: Paiguna tiyashcamanda llucshichi, paigunamanda anchurichi chican tucuichi nira. Ima jiridsatas ama llangaichichu. Tucui ñuca rimashcata uyasha casucpiga ñuca cangunata japishami nira.

(Mateo 7:12) Shuccuna cangunata alita ranauchun canguna nisha munashaga cangunami pundaga paigunata alita rana anguichi. Chitaga Moises mandasha saquira, chasnallata Dios rimashcata pasachic runagunahuas rimashcauna. Chasna nisha cuintac ara.

CAPITULO 17

DIOSTA MAÑANAGA SHUC BENDICION MAN

(Filipenses 4:6, 7) Mana imamandas turbarishachu causana anguichi. Randi tucui uras canguna turmintarishcamanda Dioshuan cuintaichi, ima pishicpihuas paita tapuichi. Ima cungaringuichichu paita pagrachu ninatas. ⁷ Chasna racpimi canguna Jesucristohuan shuglla ashcamanda Yaya Diosca cangunata mana manzhana cungailla yuyaitas cungami. Maicanbas chi tunu yuyaita charishcata ricusha mana yachanata ushanaungachu. Canguna Cristohuan pariu shuglla ashcamandami Yaya Diosca cangunataga alita cuiranga.

(Santiago 2:26) Yachanguichi imasna shuc runa samai pitiricpi huañushca an, chasnallatami shuc runa quiric ani nishallata ali rashcagunata mana rashaga huañushcacuinta man.

(Apocalipsis 14:6) Chihuasha shuc angel jahuai pahuasha riuta ricurani. Chi angelga huiñai quishpina shimita charira tucui runagunama rimangahua. Tucui cai pachaibi causaccunama, tucui muntungunama, caran tunu runagunamas, caran tunu shimita rimaccunamas, tucui llactagunamahuas pai ali shimita charira rimangahua.

(2 Corintios 4:7) Chasna acpi ñucanchi aichaga shuc allpa mangacuinta api agllaita Dios shuc gustu cushcata charinchimi. Chasna api aichacuinta aushcai Yaya Dios yapa ushaiyuctaga ricuchinchi. Chi sinzhi ushaiga mana ñucanchimandachu astahuanbas Yaya Diospagmanda ashcatami ricuchinchi.

CAPITULO 18

DIOSTA SIRVINGAHUA BAUTISARINA CHANI

(Juan 17:3) Chi huiñai causanaga casnami: Can sirtu quiquin Yaya Dios actas ricsisha quirina man, chasnallata can cachamushca Jesucristotahuas.

(1 Pedro 4:2) Chi runa ñuca causaigama Diospa munaita tucui uras rashami ninmi. Paihua aicha munashcata mana casunzhu.

(Mateo 28:19) Chasnamandami tucui runaguna ñucata quirisha catic tucunauchun nisha yachachigringuichi, paigunata Yaya Diospa shutihuan, Diospa Churi shutihuan, Diospa Samai shutihuan bautisanguichi.

CAPITULO 19

JEHOVA DIOSMANDA AMA CARUYAICHU

(Mateo 22:37) Tapucpi cutipara: Camba amu Diosta tucui camba shunguhuan, tucui camba almahuan, tucui camba yuyaihuan llaquina mangui.

(1 Juan 5:3) Yaya Diosta llaquinaga pai mandashcagunata pactachina man. Ña pai mandashcagunaga pactachinata ushanalla an.

(1 Tesalonicenses 5:17) Mana saquisha Dioshuan cuintasha causaichi.

(1 Corintios 15:58) Chasna acpi shayarishca shina sinzhita quirisha mana sambayasha tucui uras Yaya Diospa tarabanata raichi llaquishca huauquiguna. Señor Jesucristohuan shuglla tucushca ashami imatas paihuan racpihuas mana yanga tucungachu. Chitaga alita yachanguichimi.

(Colosenses 3:13) Cangunapura pariumanda ahuantanacuichi. Señor Jesus cangunata perdunasha alichishcacuinta canguna mana alita rimanacushaga pariumanda perdunasha alichinacuichi.