Jehovahua testigogunahua muntunda yachachisha cuiraccunaga mana pagriguna, pastorguna shina cullquita pagagllai yachachinaunzhu. Apostolguna punzhai shina, ali yachachishca huauquigunatami caran muntunbi churanaun, Diosta sirviccunata cuirangahua (Hechos 20:28). Chi cuiraccunaga Diospa munaita rasha causaccuna ashami, huin huauquigunata “amu quiquin munaimanda” cuirasha yanapanaun. Mana “mandashcacuinta”, “cullquita ganangahualla” cuiranaunzhu. “Shungunamanda munasha” Diosta sirviccunata cuiranaun (1 Pedro 5:​1-3). Imasata ñucanchita cuiranaun.

Ñucanchita cuiranaunmi. Cuiraccunaga Bibliahuan yachachishami, Diosmanda ama caruyanauchun nisha caran muntunda yanapanaun. Diosmi cuirangahua ñucanchita saquishca nishahuas muntunda cuiraccunaga mana amuyanaunzhu. Ñucanchi cushiyasha sirvingahuami yanapanaun (2 Corintios 1:24). Imasami ovejata cuiraccuna caranda alita ricun, sallatami muntunda cuiraccunahuas Diospa huibata shina tucui huauquigunata, panigunata ricusha cuiranaun (Proverbios 27:23).

Diosta cadsusha causangahuami yachachi tucunchi. Caran semanata muntunda cuiraccunaga tandanacuibi rimasha Diosta mas quiringahuami ñucanchita sinzhiyachinaun (Hechos 15:​32). Astahuanbas paigunaga Diospa Shimimanda cuintanata ñaupagma apanaun. Chiraicumi ñucanchihuan risha chican partigunaibi imasa cuintanata ricuchinaun.

Carandami sinzhiyachinaun. Muntunbi huingunata Bibliahuan sinzhiyachingahuaga, cuiraccunaga huauquigunata, panigunata huasibi ricugrinaun, sallata tandarina huasibi ñucanchihuan cuintanacunaun. Bibliaibi ricuchisha cuintacpiga ashcata cushiyanchi (Santiago 5:​14, 15).

Caran muntunbi ashcata yanapana ashahuas cadsi huin cuiraccunami tarbangahua, ailluta cuirangahua timputa surcunaun. Chi ashcata tarbac huauquigunata ashcata balichina manchi (1 Tesalonicenses 5:​12, 13).

• Muntunda cuiraccunaga imatata ranaun.

• Muntunbi huingunata yanapangahuaga imatata ranaun.

Diospa Shimiga ninmi caran muntunbiga ishcai sami huauquigunami tianaun: cuirasha “yachachic” huauquiguna, “yanapac” huauquigunas (Filipenses 1:​1). Caran muntunbiga chi sami huauquiguna ashcami tianaun. Chi yanapac huauquigunaga imatata ranaun.

Muntunda cuiraccunata yanapanaun. Yanapac huauquigunaga Jehovahuan ali amigoguna manaun. Paiguna malta asha, rucu ashahuas quiribaglla, alita dsaslla pactachiccuna manaun. Sallata, paigunaga muntunbi imaibihuas tarbanaun, caran tandanacuibi imatas rasha yanapanaun. Chasna racpimi cuiraccunaga huauquigunata, panigunata Bibliahuan cariyachingahua, yachachingahua lugarta surcunaun.

Alita tarbashami yanapanaun. Yanapac huauquigunaga, tandanacuima shamuccunata alitami shamushcangui nishami tiachinaun. Shuccunaga cantanagunata, microfonogunata churasha, quillcagunata cusha, cajumbi churashca cullquita yupasha yanapanaun. Sallata Diospa Shimimanda cuintangahua llucshingaraushaga, huauquiguna, paniguna maican partima rinata ricuchinaun. Astahuanbas, Tandarina Huasita alichingahuami yanapanaun. Muntunda cuirasha yachachiccuna nishcata uyashami rucu huauquigunatahuas yanapanaun. Muntunbi ima tarbaita cucpihuas, chi yanapac huauquiguna tucui shunguhuan pactachicpimi huinguna paigunata balichinchi (1 Timoteo 3:13).

Jesusta imasa catina ashcatami ricuchinaun. Jesusta ali catic huauquigunatami anllanaun muntunda yanapanauchun nisha. Tandarinaibi ñaupagma pasasha Diospa Shimihuan rimasha masta quiringahua yanapanaun. Bibliamanda cuintangahua llucshicpimi ñucanchihuas sallata ranata munanchi. Paiguna tucui munaihuan yanapashcamandami pariulla, cushi sintirinchi (Efesios 4:16). Unaimaga, paigunahuas muntunda cuirac tucunata ushangauna.

• Cuiraccunata yanapaccunaga ima sami runaguna tanaun.

• Cuiraccunata yanapac huauquigunaga imatata ranaun.

Diospa Shimiga ashca cutinmi Bernabeta Pablotahuas nin. Paigunaga muntungunata cuirasha puriccuna manaura. Imaraicuta paigunaga chasna pinsarinaura. Diosta ali quiriccunata shungumanda llaquishcamandami chasna pinsarinaura. Pabloga cutillata bulltianatami munara huauquiguna imasa aucta ricungahua. Caruta purina ashahuas, chi quiric huauquigunata alilla chaunguna nishami ricugric anaura (Hechos 15:36). Sallata sintishami cunanbas muntungunata cuirasha puric huauquigunaga yanapanaun.

Cushiyachingahua shamunaun. Caran huatata muntungunata cuirasha puric huauquiga caran muntunda ishcai cutin ricun. Ishcai chunga muntungunata cuirasha purin. Chi huauquimanda ashcatami yachanata ushanchi. Cadsarashca acpiga, pai huarmihuas ñucanchita yanapan. Chi huauquiga, huingunata ricsingahuami, Diospa Shimimanda cuintangahua, Diospa Shimita yachauccunata ricungahua ñucanchihuan rinata munan. Chasnallata, cuirasha puric huauquiga caran muntunda cuirac huauquindimi shuc huauquigunata panigunata Bibliahuan cariyachingahua ricugrinaun. Astahuanbas, ñucanchita cushiyachisha yanapangahuaga tandarinaibi, asambleaibi alita cunasha yachachin (Hechos 15:35).

Huingunatami yanapanata munanaun. Cuirasha puric huauquiga huinguna Diosta sirvisha catinauchun nishami munan. Paiga muntunda cuirac, yanapac huauquigunahuanmi tandarin. Chibiga chi muntun imasa aucta ricun, alita yanapasha catinauchun nisha cunan. Masta cuintaccuna ali yachachisha catinauchun nishami yanapan. Ñucanchihuan mushuc tandariuccuna Diosta cadsusha catiushcata ricushaga ashcatami cushiyan. Chi cuirasha puric huauquiga “ñucanchita yanapangahua” tucui shunguhuanmi imatas ran (2 Corintios 8:23). Pai shina, ñucanchihuas Diosta quirisha catina anchi (Hebreos 13:​7).

• Muntungunata cuirasha puriccunaga imasata yanapanaun.

• Paiguna shamushaga, imasata candahuas yanapai tucungui.

Sinzhi allpa cuyuiguna, shuc llaquigunas tiacpiga Jehovahua testigogunaga dsasllami llaquibi auc huauquigunata yanapanchi. Chita rashaga, ñucanchi huauquigunata shungumanda llaquishcatami ricuchinchi (Juan 13:​34, 35; 1 Juan 3:​17, 18). Imasata yanapanchi.

Ushashcagunahuan yanapanchi. Antioquia llactamanda Jesusta caticcunaga Judea llactaibi atun raicai tiacpimi, chibi huauquigunata yanapangahua cullquita cachanaura (Hechos 11:​27-30). Chasnallatami, shuc llactaibi huauquiguna llaquita pasaucta yachashaga ñucanchi muntunmanda ima yanapaitahuas cachanchi (2 Corintios 8:​13-15).

Ñucanchillata yanapangahua rinchi. Llaqui tiashca pistuibi muntungunata cuiraccunaga caran huauquigunata panigunata, alilla chaunguna nisha mascangahua rinaun. Imasaibiga huauquigunaga yanapangahua tandarinaun. Paigunaga micunata, yacuta, llachapata cumbirangahua alichinaun, doctorgunata cachanaun. Chasnallata puñuna pistuta mañachinaun. Huasita shayachinata yachac Testigogunaga paiguna cullquihuan rishami causana huasigunata, Tandarina Huasigunata alichingahua yanapanaun. Ñucanchipura tandalla, alita tarbanata yachashcamandami, llaquiguna ricuricpiga dsaslla yanapanata ushanchi. Huauquigunata mas yanapashahuas, ushashaga, shuc runagunata ima religion acpihuas yanapanchi (Galatas 6:10).

Ama yapacta llaquirinauchun nishami Diospa Shimihuan cariyachisha yanapanchi. Atun llaqui tiacpiga llaquirishcagunaga sinzhiyarinatami minishtinaun. Chibiga, Jehovami ‘tucuibi cushiyachisha sinzhiyachic’ an (2 Corintios 1:​3, 4). Chiraicumi, llaquibi auccunataga Diospa Shimibi sumac shimigunata ricuchisha cushiyachinchi. Diospa Mandaga nallami tucui llaquigunata tucuchinga ninchi (Apocalipsis 21:​4).

• Imaraicuta Testigogunaga atun llaquiguna tiacpiga dsaslla yanapanchi.

• Huañunamanda quishpiriccunataga imasata cushiyachinchi.

Jesus mana huañushallata, Pedrohuan, Santiagohuan, Juanhuan, Andreshuan cuintanacura. Cai pacha tucuriushcaibi, pai shamuna punzhaguna, ima tucunata rimasha casna nira: “Shuc amuga shuc ali yuyaiyuc runata japisha churara tucui ñucata sirbiccunata alita carangui nisha” (Mateo 24:​3, 45; Marcos 13:​3, 4). Caibi nishca shina Jesusca amu ashcamandami, tucurina punzhagunaibi shuc sirvic runata churasha nira. Chi runaga Jesusta caticcunama micunata cuc shina, Bibliamanda ali yachaigunata mana cungasha cuna mara. Chi ali yuyaiyuc runaga pi tan.

Dios anllashca ashilla huauquiguna manaun. Chi “runaga” ashilla muntun man. Chi muntunga Jehovahua testigogunata Tandachic Huauquiguna manaun. Chi ali yuyaiyuc runaga Bibliamanda ali yachaigunata minishtishca uraspi cun. “Micuna tuputa” apic shina, Bibliamanda yachangahuami chi ali yuyaiyuc runata minishtinchi (Lucas 12:42).

Diospa huasita cuiranaun (1 Timoteo 3:14, 15). Jesusca chi ali yuyaiyuc runata ashca tarbaitami saquira. Cai Allpaibi Jehovahua testigohua charishcagunata cuirana mara. Bibliamanda cuintanacunata ricusha pushana mara, caran muntunda yachachina mara. Chiraicumi, ñucanchi minishtishcata ali uraspi cungahuaga, “ali yuyaiyuc runaga” tandarinaibi, asambleaibis yachachinagunata cachan. Sallata, Diospa Shimihuan cuintangahua quillcagunata surcun.

Chi “runa” ali yuyaiyuc ashami, cai Allpaibi Jesus imata mingashcata alita ricusha cuiran. Cuti pactachic ashcamandaga, Diospa Shimi nishcallatami yachachin. Chasnallata Diospa Shimita cuintana urdindami pactachin (Hechos 10:42). Jehova chi sirvicta bindiciashcamandami ashca Testigoguna tianaun. Jehovata ricsingahua ashca yanapaiguna tianaun (Isaias 60:22; 65:13).

• Ali yuyaiyuc, pactachic runaga pi tan.

• Chi “runaga” imaraicuta ali yuyaiyuc an. Imaraicuta pactachic an.

Ñaupa timpuibiga apostolguna, Jerusalenbi tiac muntunda cuiraccunahuas, paigunapura cuintanacungahua tandaric anaura. Paigunaga Jesusta catic tucui anllashcagunata yanapangahuami, casnami rana anchi nic anaura (Hechos 15:​2). Shuc yuyaillata apingahuaga, Diospa Shimita ali leishami, Diospa samai intindichishcata catic anaura (Hechos 15:25). Cunanbas Jehovahua testigogunata Tandachic Huauquigunaga chillatatami ranaun.

Diosca pai munashcata rangahuaga chi huauquigunatami apishca. Chi Tandachic Huauquigunaga Bibliata ashcatami balichinaun. Chasnallata Dios partimanda yachachinata, chican sami tarbanagunatami yachanaun. Caran semanaibi tandarinaun, mundu intiruibi huauquiguna, paniguna imata minishtishcata ricungahua. Apostolgunahua punzhagunaibi shinami, Bibliaibi mascasha, casna rashun nisha yachachinaun. Chi yachachishcagunataga, cartahuan, cuirasha puriccunahuan, shuc huauquigunahuanmi cachanaun. Chasna racpimi, Jesusta caticcunaga pariulla, shuc yuyaillata charinchi (Hechos 16:​4, 5). Sallata, micunata yanuc shina, Diospa Shimimanda yachachinagunatami alichina anaun. Diospa Mandamanda cuintanata pundaibi churangahua yanapanaun. Chasnallata, ashcata yanapac huauquigunata ali anllangaraushcata ricunaun.

Diospa samaimi yanapai tucunaun. Tandachic Huauquigunaga Diospa, Jesuspa yanapaitami mascanaun. Jesusca Jehovahua testigoguna muntunda umacuinta Mandac man (1 Corintios 11:3; Efesios 5:23). Chi Tandachic Huauquigunaga mana shuccunata mandac tucunaunzhu. Dios anllashca shuc huauquiguna shinallata, Jesus “maita ricpihuas paihuan pariulla puriunguna” (Apocalipsis 14:​4). Tandachic Huauquigunata yanapai nisha ñucanchi Diosta mañacpiga, paigunaga pagrachu ningaunami.

• Jesus huañushca huashaga pigunata casna rashun nic anaura.

• Cunan punzhaibiga imasata Tandachic Huquigunaga Diospa yanapaita mascanaun.

Betel nishca shutiga hebreo shimibiga “Diospa huasi” man (Genesis 28:​17, 19). Chi shutiga mundu intiruibi Jehovahua testigogunahua oficinagunaraicu ali anllashca man. Chimandami Diospa Shimimanda cuintangahua ricusha yanapanaun. Chi Tandachic Huauquigunaga Nueva York (Estados Unidos) llactai Betelmandami shuc llactagunaibi tiac Betelgunata ricunaun. Betelbi tucui tarbaccunaga aillu shinami tandalla micusha, tarbasha, Bibliamanda yachasha sumacta causanaun (2 Corintios 13:​11).

Chi sumac pistuibi causaccunaga sinzhitami tarbanaun. Caran Betelbi tarbac huauquiguna, panigunaga Yaya Dios mandashca shina causaccuna manaun, Diospa Mandana mirarichun nisha punzha chishacta chibi tarbanaun (Mateo 6:33). Chasna ashahuas, mana pihuas paigunata paganzhu. Chibi tarbaccunataga minishtishcallata randinauchun nishami cusha yanapanaun, maibi puñunata, micunatas cunaun. Carangunami casna tarbanata charinaun: oficinaibi, imprentaibi, quillcagunata rana ucuibi tarbanaun. Shuccunaga cuartugunata pichasha, tacsasha, yanusha, micunata pasachisha, ima huaglirishcata alichisha tarbanaun.

Chi pistuibiga Diospa Mandanata cuintangahua sinzhita tarbanaun. Tucui partibi tiac Betelga Diospa Shimimanda sirtu shimita ashca runaguna uyanauchun nishami yanapaun. Camba maquibi chariushca quillcata ricui. Caitaga Tandachic Huauquigunami computadoraibi quillcachisha, mundu intiruibi tiac oficinagunama cachanaun, caran shimigunama pasachingahua. Shuc maquinaguna dsaslla copiagunata surcushami, 110 mil yali muntungunama cachanaun. Chi tucui tarbanagunata rangahuaga, Betelbi aillu shina causaccunaga Diospa Shimita huaira shinalla yachachingahua sumacta yanapanaun (Marcos 13:10).

• Pigunata Betelbi yanapanaun. Paigunataga imatata cunaun.

• Caran Betelbi tarbaccunaga imatata huaira shinalla rangahua yanapanaun.

Betelbi aillu shina causaccunaga tucui sami tarbanatami ranaun. Chi oficinagunaibiga caran llactagunaibi Bibliamanda cuintanata pushanaun. Quillcagunata rasha, shuc shimima pasachinaun. Quillcagunata surcusha, chigunata muntunasha charinaun. Sallata, uyangahua, ricungahua grabanaun, chasnallata shuc tarbanagunatas ranaun.

Oficinata ricuc huauquiguna. Tandachic Huauquigunaga alita cuirac quimsa yali huauquigunata anllasha ricunauchun nishami saquinaun. Paiguna causaushca llactai imasa riucta, ima llaquiguna tiangaraushcata yachasha Tandachic Huauquigunata cuintanaun. Chita yachashami chi Tandachic Huauquigunaga mushuc llucshingarauc quillcagunata, tandarinaibi, asambleaibi imata yachachingaraushcata ricunaun. Caran timpuibimi Tandachic Huauquigunaga shuc huauquita anllasha paigunamanda shuc llacta oficinagunama cachanaun, paiguna tarbanata alita pactachinauchun nisha yanapangahua (Proverbios 11:14). Chi huauqui shuc llacta oficinama pactacpiga shuc atun tandarinami tian. Chi cachashca huauquiga Diospa Shimihuan rimashami chi llactaibi causaccunata cariyachin.

Caran muntungunata yanapanaun. Chi oficinaibiga ninaunmi maicanguna ña shuc muntun tucungaraushcata. Sallata, masta cuintaccunata, shuc llactamanda shamuccunata, cuirasha puriccunata ima ranata ninaun. Asambleagunata alichinaun, tandarina huasigunata maibi, imasa huasinata ninaun, caran muntunma quillcagunata cachanaun. Ñucanchi oficinagunaibi tucui tarbanagunaga, Diospa Shimimanda tucui partibi ali cuintangahuami yanapanaun (1 Corintios 14:​33, 40).

• Oficinata ricuc huauquigunaga imasata yanapanaun Tandachic Huauquigunata.

• Jehovahua testigogunahua oficinaibiga imatata ranaun.

Diospa Shimita “caran tunu shimita rimaccunamas, tucui llactagunamahuas” yachachingahuaga, Jehovahua testigogunaga 750 yali shimigunaibi quillcasha tarbanchi (Apocalipsis 14:​6). Imasata chi sinzhi tarbanata ranchi. Chican llactamanda quillcac huauquiguna, sallata ashca shuc shimima pasachic sinzhita tarabac muntunguna yanapanaun. Huinguna Jehovahua testigo anaun.

Pundaga inglespimi quillcanaun. Tandachic Huauquigunaga Quillcana oficinata ricunaun. Chi oficinaga chillaita manashaga shuc llactaibi quillcaccunataga imata quillcanatami nin. Chican llactamanda quillcaccuna tarbashcamandaga, chican llactamanda tucui sami runagunaga ñucanchi quillcashcagunata leinata munanaun.

Quillcashcagunataga shuc shimima pasachiccunama cachanaun. Chi quillcashcaguna ali acpimi, computadoraibi quillcasha shuc llactagunama cachanaun shuc shimima pasachingahua. Shuc shimima pasachiccunaga paiguna tarbashcaguna ali anagamami riparasha alichinaun. Astahuanbas, ‘sirtu shimigunata’ anllasha inglespi quillcashcagunallatami pasachinaun (Apocalipsis 21:5).

Computadoragunami ashcata yanapanaun. Computadoragunaga mana quillcaccuna shina, shuc shimima pasachic runaguna shina chanaun. Chasna ashahuas, diccionarioguna, quillcaguna, computadoraibi programagunaga yanapanmi dsaslla tarbangahua. Jehovahua testigogunaga MEPS nishca computadora programata rashcanchi. Chi programaga ashca ashca shimigunaibi quillcangahua, quillcashcagunaibi dibujugunata churangahua, shuc maquinaibi copiata surcungahuami yanapan.

Imaraicuta sinzhita tarbanchi ashca shimigunama pasachingahua. Jehova Diosca munanmi ‘tucui runaguna quishpirinauchun, chasnallata paihua sirtu shimita yachanauchun nisha’ (1 Timoteo 2:​3, 4).

• Ñucanchi quillcagunaga imasa quillcashca tanaun.

• Imaraicuta chi quillcashcagunataga ashca shimima pasachinchi.

Caran huatatami Testigogunaga ashca Bibliagunata, ashca quillcagunata rasha cumbiranchi. Sallata Tandarina Huasigunata, Betel huasigunata rasha, alichisha charinchi. Betelbi tarbaccuna, shuc llactamanda cachashca huauquiguna gastashcata pagasha yanapanchi. Atun llaqui tiashca pistuma ima yanapaitas cachanchi. Chigunata rangahuaga maimandata cullquiga llucshin.

Limosnata, diezmota mana cobranchichu. Diospa Shimimanda yachachingahua ashca cullquita minishtishca acpihuas, mana runagunata cullquita tapunchichu. Ashca huata huashama llucshishca Atalaya quillcaibiga nirami, Diospa yanapaita charishcata. Chibimi nira: “[Ñucanchiga] mana ima urashuas runagunata cullquita tapusha purishunzhu” nisha. Chiga sirtu mashca (Mateo 10:​8).

Shungumanda cushca cullquigunahuanmi yanapanchi. Ashcagunami ñucanchi Diospa Shimimanda yachachishcataga balichinaun. Chiraicumi imasaibiga cullquita cumbiranaun. Jehovahua testigogunallatami ñucanchi charishcagunata, ursata, timputa surcusha Diospa munai tucui partibi pactarichun nisha yanapanchi (Hebreos 13:​16). Tandarina Huasibiga cullquita churasha yanapana munaccunaraicu, ichilla cajungunami tian. Chasna yanapaccunaga cadsi huinguna ashilla cullquita charishas, ñaupa timpuibi tiac huaccha huarmi shina yanapanaun. Manashaga jw.org pistuma yaicusha cachana ushan. Paiga pugri ashahuas shungumanda cucpimi Jesusca ashcata balichira (Lucas 21:​1-4). Maicanbas munashaga “caran amu munaimandalla” Diosma cumbirangahua ashilla ashilla tandasha churanata ushanaun (1 Corintios 16:2; 2 Corintios 9:​7).

Diospa Mandanaraicu tarbaigunata ñaupagma apangahuaga, Jehova Diosmi runaguna shungüibi cumbirana yuyaita cusha catinga. Chasnami Dios munashca shina pactaringa (Proverbios 3:​9).

• Jehovahua testigogunaga shuc religiongunahuanga imahuata chican an.

• Cajunbi churashca cullquitaga imaibita gastanaun.

Ñucanchi Tandarina Huasiga Jesus yachachishca shina, Diospa Mandanamanda yachana huasi man (Lucas 8:​1).

Diosta alabangahua pistu man. Ñucanchi Tandarina Huasimandami Diospa Shimita cuintangahua imata ranata ricunaun (Mateo 24:14). Chi huasigunaga chican samiguna ashahuas, mana yapacta atun, mana ashca balic huasiguna chanaun. Tandarina Huasigunaibiga shuc, ishcai, quimsa muntungunami tandarinaun. Mas runaguna tandaringahua shamucpimi, pasac huatagunaibiga mundu intiruibi ashca huaranga Tandarina Huasigunata rashcanchi. Chitaga imasata pactachishcanchi (Mateo 19:26).

Cumbirashca cullquita tandachishami Tandarina Huasigunata ranchi. Chi cullquitaga shuc llactaibi oficinagunama cachanaun. Chiguna randiga Tandarina Huasita rangahua, alichingahua shuc muntun huauquiguna cullquita minishticpi cusha yanapanaun.

Tucui sami tarbanata yachaccunami mana cobrasha tarbanaun. Ashca llactaibimi, Tandarina Huasigunata Shayachiccuna tianaun. Chi huauquiguna shuc yanapaccunahuanmi paiguna llactallaita caru partima rinaun. Paigunaga chibi auc muntungunata yanapanaun, paiguna Tandarina Huasita shayachingahua. Shuc llactaibiga, huasinata yachac testigogunatami anllashcauna, Tandarina Huasigunata imasa shayachinata, alichinatas ricunauchun nisha. Ali huasinata yachac huauquiguna yanapacpihuas, chi Tandarina Huasibi tandaringarauccunallatami shungumanda tarbasha yanapanaun. Jehovahua yanapaihuan paita sirviccuna sinzhita tarbashcamandami chi sumac Tandarina Huasiguna tianaun (Salmo 127:1; Efesios 6:6).

• Mundu intiruibiga imasata Tandarina Huasigunata ranchi.

Jehovahua testigoguna Tandarina Huasiga Diosta alabana huasi man, chiraicumi huinguna ali pichasha, cuirasha yanapana anchi. Chi sumac tarbaitas rashami Diosta alabanchi.

Tandarina tucurishca huashaga pichangahua yanapana anchi. Caran tandarina tucurishca huashaga, huauquiguna, panigunaga Tandarina Huasita pichangahua paigunallata dsaslla yanapanaun. Sallata caran semanaibi shuc punzha mas alita pichanaun. Muntunda cuirac huauqui manashaga yanapac huauquiga imaibi pichanatami ricuchin. Chibiga caitami tarbanaun: pichasha tandarina huasi pambata maillanaun, pulbuta anchuchinaun, bancugunatas alichinaun, ishpana pistuta maillanaun, ventanagunata, espejogunatas pichanaun, basuragunatas ichunaun, canzhatas pichanaun. Caran huataibimi huinda pichangahua shuc punzhata surcunchi. Pichasha yanapanauchun nisha huahuagunatas churacpiga, paigunahuas ichillamanda Diospa huasitaga ashcatami balichingauna (Eclesiastes 5:​1).

Alichingahua yanapashunchi. Caran huataibimi Tandarina Huasi ucuta, canzhata ima huaglirishcagunata ali ricunaun. Sa rashami huashama mana ashca cullquita gastashun, Tandarina Huasi ali achun nisha cuirashun (2 Cronicas 24:13; 34:10). Jehova Diosta alabana huasitaga sumac alichishami charina anchi. Tandarina Huasita sumacta cuirasha charishaga, Jehovata ashcata llaquishcata, paihua huasita balichishcatami ricuchinchi (Salmo 122:​1). Astahuanbas shuc runaguna ricushaga, ima sumac huasi tan ningaunami (2 Corintios 6:​3).

• Imaraicuta ñucanchi Yaya Diosta alabana huasita pichanata mana cungarina anchi.

• Tandarina Huasita cuirangahuaga imatata ranchi.

Diospa shimimanda astahuan yachanata munanguichu. Diospa Shimibi shuc partimanda, ñaupa runagunamanda, shuc llactamanda masta yachanata munanguimachu. Canga tapurishcanguichu, ñuca causaibi llaquigunata alichingahua Bibliaga yanapahuangachu nisha. Indá nishaga, Tandarina Huasibi quillcagunata huacaichina pistuga yanapai tucunguimi.

Chi pistuibiga masta yachangahua ashca yanapaigunami tian. Jehovahua testigogunahua huin quillcagunata charinguichu. Ashilla quillcagunata charishaga, ñucanchi Tandarina Huasibiga cadsi tucui, cunanlla llucshishca quillcagunatami tupangui. Chibiga ashca Bibliagunata, shuc ali diccionariota, shuc quillcagunatahuas tupanguimi. Tandarina mana callarigllaita, tucurishca huashahuas chi quillcaguna tiana pistuma rinalla mangui. Shuc computadora tiacpiga, imasaibiga Watchtower Library nishca programa tianga. Chibiga, ashca quillcagunatami tupangui. Sallata masta yachangahua Bibliaibi can munashca partita, can munashca shimigunata computadoraibi churasha huaira shina tupanata ushangui.

Jesus shina causashun, yachachishun nishca tandarinaibi yachauccunata yanapan. Canga chi tandarinaibi partita charishaga bibliotecaibi estudiagringui. Jesus shina causashun, yachachishun nishca tandarinata pushac huauqui Bibliotecata cuiran. Chi huauquiga bibliotecaibi mushuc quillcaguna tiachun nisha alichin. Chi partita yachachisha cuirac huauquiga huacaichina pistuibi mushuc quillcaguna tianauchun nishami alichin. Chi huauqui, manashaga canda yachachiuc huauquimi can minishtishcata yachangahua yanapai tucungui. Chi ñaupa quillcagunataga cuirasha, mana rayana changui. Chigunata ama apanguichu.

Bibliaibi nishca shinaga, “Diospa quiquin yachaitas” tupangahuaga, “pacashca curigunata shina” mascana anchi (Proverbios 2:​1-5). Tandarina Huasibi tiac quillcagunata huacaichina pistuibiga chasna mascangahua shuc sumac yanapai man.

• Tandarina Huasibi quillcagunata huacaichina pistuibiga ima yanapaigunata tianaun.

• Chi pistu masta yanapai tucungahuaga pita candaga yanapanga.

Jesusca nirami: “Bilacuinta cangunahuas runagunahuacpi canguna ali rashcagunata ricuchinguichi. Chasna rasha causaupimi shuccuna ricusha canguna jahuapachaibi tiyac Yayata” balichingauna nisha (Mateo 5:16). Chita pactachingahuaga Internetpi shuc pistutas charinchi. Jehovahua testigoguna quiquin pistuibi jw.org nishcaibiga, ñucanchi quirishcagunata, ñucanchi imata rashcagunatami cuintan. Chibiga imatata tupangui

Ali tapuigunata Diospa Shimihuan cutichin. Ashca runaguna tapushcatami chibiga tupanata ushangui. Sucta tapuigunata cutichingahuaga. Llaquirisha causanaga tucuringachu, Huañushcagunaga causaringaunachu, imashi nishca quillcagunata ñucanchi Internet pistumanda 600 yali shimigunaibi surcunata ushangui. Sallata Traducción del Nuevo Mundo nishca Bibliata 130 yali shimigunaibi tupangui. ¿Qué enseña realmente la Biblia? nishca quillcata, cunannayalla llucshishca La Atalaya, ¡Despertad! quillcagunata, shuc quillcagunatas tupanguimi. Ñucanchi Internet pistullaibi leinata, uyanatas ushangui. Chasnallata chi quillcagunata MP3, PDF, EPUB nishcaibi surcunata ushangui leingahua computadorama pasachinalla mangui. Shuc shimita rimaccuna Diospa Shimita yachanata munacpiga, paigunahua quiquin shimibi quillcashcagunata Internetmanda copiata surcusha leichinata ushangui. Chican llactamanda mana uyanata ushaccunaraicuga ashca videogunami tian. Chasnallata Bibliamanda cuintashcagunata, gustu uyaric tucashcagunatas uyanata ushangui.

Jehovahua testigogunamanda sirtuta yachai. Ñucanchi Internet pistuibiga mushuc cuintaigunata, mundu intiruibi imasa Diospa Shimimanda cuintaushcatami nin. Jehovahua testigoguna ima llaquigunata charishcata, imasa shuccunatas yanapashcatami ricuchin. Astahuanbas, yachachinmi asambleaguna pactariucta. Sallata ñucanchi oficinagunama cayasha imasa cuintanacunatami ricuchin.

Ñucanchi Internet pistuga yanapanmi bilacuinta Diospa Shimimanda yachaigunata mundu intiruibi tiac runagunama yachachingahua. Antártida nishca caru, chiri llactamas pactanchi. Diosta balichinauchun nisha, “Jehovahua shimi dsaslla mirarisha catichun” nishami caran punzha Jehovata mañasha catinchi (2 Tesalonicenses 3:​1).

• Imasata jw.org pistuga mas runagunata yanapan.

• Ñucanchi Internet pistuibiga imatata yachanata munanguima.