Iglesiaguna Diospa Shimita mana alita intindichicpi, mana cariyachicpimi, ashca runagunaga iglesiama rinata saquishcauna. Chasna acpiga, imaraicuta Jehovahua testigogunahuan tandarina angui. Chibiga imasata yanapai tucungui.

Ali shunguyuc, llaquic runagunahuan tupanacushami cushi sintiringui. Jesusta punda caticcunaga Yaya Diosta sirvingahua, paihua Shimita yachasha sinzhiyanacungahuami tandaric anaura (Hebreos 10:​24, 25). Diosta cadsuccunahuan llaquinacusha tandarishami, quiquin aillupura shina sintirinaura (2 Tesalonicenses 1:3; 3 Juan 14). Ñucanchihuas sallata tandarishami cushi causanchi.

Diospa Shimi nishcata pactachingahuami yachachi tucungui. Callari timpuibi rashca shinami, cariguna, huarmiguna, huahuagunas tandarinchi, alita yachachic huauqui Diospa Shimimanda rimashcata uyangahua. Chibimi Diospa Shimi nishcata ñucanchi causaibi imasa pactachinata yachanchi (Deuteronomio 31:12; Hechos 15:​30-32). Chibi tapucpi maicanhuas maquita alsasha rimanata ushanaun. Diosta alabangahua cantanaun. Chibimi camba shungüibi imata quirishcata cuintanata ushangui (Hebreos 13:15).

Diospi sinzhita quiringahua yanapai tucungui. Apostol Pabloga paiba punzhai tiac huauquigunata nirami: ‘Cangunata yapa ricunata munani, ñucahuas, cangunahuas Diosta quirisha pariumanda sinzhiyachinacushunchi’ nira (Romanos 1:​11, 12). Huauquigunahuan, panigunahuan tandarinaibi tupanacushaga sinzhita quiringahuami yanapanacunchi. Chimi Dios munashca shina causangahua yanapanga.

Imahuata mana cai semanaibi ñucanchi tandarinama shamusha canllata chita ricsingui. Candaga alitami shamushcangui nishunmi. Chibiga mana cullquita tapunchichu.

• Ñaupa punzhaibiga pigunata ñucanchi shina tandarinaura.

• Ñucanchi tandarinagunaga imasata yanapai tucunchi.

Sinzhita tamiacpihuas, caru sacha ñambita purina ashahuas, Jehovahua testigogunaga tandarinama rinataga mana saquinchichu. Imahuata llaquigunata charishahuas, tarbanamanda sambayashca shamushahuas tandarinama rinata mana saquinchi.

Ñucanchi ali angahua yanapan. Tandarinama rina anguichi nishaga, apostol Pabloga nirami: “Pariumanda yanapanata yuyarinacushunchi” nisha (Hebreos 10:24). Yuyarinacushunchi nishaga “alita tapunacusha ricsinacunatami” nin. Pablohua shimigunaga, ñucanchipura alita ricsinacusha, shuccunatas llaquisha causangahuami yanapan. Tandarina Huasibiga maicangunaga ñucanchi shinallatami llaquigunata charishcauna. Paigunata ricsicpiga, ñucanchitahuas llaquigunata binsingahuami yanapai tucunchi.

Ali amigogunatami tupanchi. Tandarinaibiga shungumanda llaquic amigogunahuan maunchi. Imasaibiga micusha, cushi pasangahuami shuc huauquihua huasibi tandarinchi. Chibis tandaricpiga imasata yanapai tucunchi. Chi amigogunahuan pariulla balichinacushaga astahuan mas llaquinacusha causashun. Huauquiguna llaquita charicpiga, ñucanchi quiquin aillu shina ashcamandami, huaira shina paigunata yanapanchi (1 Pedro 3:8). Huin huauquigunahuan, panigunahuan ricsinacushaga ‘pariu cuirarisha yanapanacushcatami’ ricuchinchi (1 Corintios 12:​25, 26).

Ali amigogunata charinata munashaga Dios munashcata rac runagunata mascangui. Jehovahua testigoguna muntunbimi, ali amigogunata tupangui. Ñucanchi tandarinama shamuupi, saquiri nicpis, ama saquiringuichu.

• Imaraicuta Jehovahua testigogunahuan tandarina angui.

• Ima punzha tandarinaibita huauquigunata panigunata ricsinata munangui.

Jesusta punda caticcunaga cantangahua, Diosta mañangahua, Diospa Shimita leisha yachangahuami tandaric anaura (1 Corintios 14:26). Ñucanchi tandarinama rishaga chasnallata raushcatami ricungui.

Tandarinaibiga sumacta causangahuami Diospa Shimimanda yachachin. Sabado, domingo punzha Tandarina Huasibimi, punda 30 minututa shuc huauqui Bibliamanda Rimashcata Uyana partihuan callarin. Chibiga yachanchimi, cai punzhamanda, ñucanchi causaimanda imata Biblia yachachishcata. Chibi yachachic huauquiga ninmi, canguna quiquin Bibliaibi mascaichi nisha. Chi huashaga shuc urata Atalayata Yachana tian. Chibiga Atalaya quillcaibi ricusha, Biblia nishcata ñucanchi causaibi imasa pactachinata yachanchi. Chibi auccunata ninmi, cuintanata munashaga maquita alsaichi nisha. Mundu intiruibi 110.000 yali muntun huauquiguna panigunaga chillatata yachangahua tandarinaun.

Tandarinagunaga mas alita yachachingahuami yanapan. Sallata caran semanaibi shuc tuta tandarinchi quimsa partita yachangahua. Chi tandarinaga Jesus shina Causashun, Yachachishun nishca man. Chi tandarinata charingahua Guía de actividades para la reunión Vida y Ministerio Cristianos nishca quillca caran quilla llucshin. Pundaga “Bibliamanda curi shina yuyaiguna” nishca partihuan callarin. Cai partiga caran semanaibi Bibliata leishcata ali intindingahua yanapan. Chi huasha “Ali yachachiccuna ashunchi” nishca partibi, imasna shuc runagunata yachachina ashcata ricuchinaun. Shuc cunac huauqui huingunata ali leic, yachachic anauchun nisha yanapan (1 Timoteo 4:13). “Jesus shina causashunchi” nishca tucuri partibi imasa ñucanchi causaibi Biblia nishcata pactachingahua yachanchi. Cai partibiga tapuigunata cutichisha Bibliata pasacta intindinchi.

Ñucanchi tandarinaibi Bibliamanda sumac yachachishcagunata uyashami canga ashcata cushiyangui (Juan 6:45).

• Jehovahua testigoguna tandarinama ricpiga imatata yachachi tucungui.

• Maican tandarinamata rinata munangui.

Cai quillcaibi runagunata ricushcanguichu. Chibi auc Jehovahua testigogunaga alita churarishami tantarinama riunguna. Imaraicuta alita alichirinchi.

Ñucanchi Yaya Diosta balichishcamanda. Yaya Diosca mana ahua alichirishcallata ricunzhu. Shungutami ricun (Lucas 16:15). Chasna acpihuas, paita alabangahua tandarishaga, Yaya Diosta, ñucanchi huauquigunatas balichishcatami ricuchinchi. Yuyari, gubirnu oficinama yaicungahuaga imasata alichiringuima. Mandac gubirnuta balichishcamandaga, manachu alita alichiringuima. Sallatami, “Tucuita mandac” Jehova Diosta balichishcamanda, chasnallata paita alabana huasita balichishcamandaga, tandarinama riushaga alita alichirisha rinchi (1 Timoteo 1:17).

Diospa Shimita yachashcamandami alita alichirinchi. Diospa Shimiga ninmi, “ali tuputa churarinauchun”, ‘ama churarinauchun balirishca tucungahua’ (1 Timoteo 2:​9, 10). “Ali tuputa churarinauchun” nishaga ninmi, alita churarisha, mana irus ricuric llachapagunata churarinata. Astahuanbas, ‘ama balirishca tucungahua’ churaringuichichu nishaga, mana cullquiyuc mani ningahualla churarinatami nin. Munanayacta, pinganayacta, sipicta llachapagunata mana churarinatasmi nin. Cai mandashcagunata cadsushahuas, chican ali llachapagunata anllangahuami saquitucunchi. Ñucanchi runagunama mana imatas rimashallata, alita alichiricpiga, ‘shuccunahuas, Diospa Shimiga ali man ningaunami’ (Tito 2:10; 1 Pedro 2:12). Ñucanchi tandarinagunama alita alichirisha ricpiga, shuccunaga Jehovata sirviccunamandaga alitami rimangauna.

Alita alichirishca angahuaga, mana minishtinchichu balic llachapagunata. Chasna acpiga, ali llachapata mana charinichu nishaga, tandarinama rinata ama saquinguichu.

• Imaraicuta Diosta sirvicccunaga alita alichirisha tandarinama rina anchi.

• Imasa alichirinata yachangahuaga, Diospa Shimiga imatata nin.

Can Jehovahua testigogunahuan Diospa Shimimanda yachaushaga, yachangaraushca quillcata ñaupata ricurangui chari. Masta yachangahuaga, chasnallatami rana angui tandarinama ringahua. Chasna rangahuaga, imasata yachasha nisha pinsarina angui.

Maibi, ima uraspi yachanata mascana angui. Punzhaga ima urastata cungailla, can sapalla yachanata ushangui. Tutamanda tarbanama mana rishallata, tuta, huahuaguna puñuushcaibi yachanata ushangui. Ansa timputa charishahuas, masna urasta yachangaraushcata yuyarina angui. Chi uraspi yachanataga mana cungarina changui. Radiota, televisionda, telefonota huanchisha chunlla, cungailla pistuta mascangui yachangahua. Mana yachangahua callarishallata, Diosta mañacpiga yanapai tucunguimi, camba llaquigunata cungasha Diospa Shimillai pinsaringahua (Filipenses 4:​6, 7).

Cuintaibaglla shimigunata rayasha maquita alsasha cuintangahua alita uyaungui. Imata yachangaraushcata ricusha callaringui. 1) Yachangaraushca punda panga ahuaibi atun quillcashcata ricungui. 2) Chi huasha atun naya quillcashcagunata ricusha yuyai, chigunaga imatata yachachin nisha. 3) Dibujugunata ricungui. 4) Imallata yachangaraushcata ricungahuaga, yuyaringahua nishca tapuigunatas leingui. 5) Numerohuan quillcashca tapuigunata cutichingahuaga chi numerohuan quillcashca partigunata leingui. 6) Bibliaibi leinaguna mana pasachishca acpiga, chigunata mascasha yuyangui, imaraicuta caibi quillcashca tianaun nisha (Hechos 17:11). Tapuigunata imasa cutichinata tupashaga, cuintaibaglla ashilla shimigunata rayangui. Chasna rashami, tandarinaibi, can munashaga, maquita alsasha camba quiquin shimibi rimanata ushangui.

Caran semana tandarinaibi imallata yachangaraushcata ñaupata ricushaga, curicuinta, mushuc, ali yuyaigunatami Bibliaibi tupangui (Mateo 13:​51, 52).

• Tandarinaibi yachangaraushca quillcata yachangahuaga, imatata mascana ashcangui.

• Maquita alsasha rimangahuaga, imasata yachana angui.

Callari timpumandami Jehovaga munashca, tucui ailluguna paihuagma caillayangahua, mas llaquinacungahua shuc ratuta pariulla pasanauchun nisha (Deuteronomio 6:​6,7). Chiraicumi Jehovahua testigogunaga caran semanata shuc timputa surcunchi Diosta ñucanchi ailluhuan alabangahua. Chibimi Diospa Shimimanda cushiyasha cuintanacunchi, ñucanchi aillu minishtishcagunata yachachingahua. Sallata sapalla causaccunahuas chi timputa surcuna manaun, paiguna minishtishcata Diospa Shimibi yachangahua.

Jehovama mas caillayangui. ‘Diospagma caillayaichi. Pai cangunahuagma caillayangami.’ (Santiago 4:​8.) Diospa Shimita leishami Jehova ima yuyaigunata charishcata, ñaupa timpumanda imata rasha riucta yachashun. Camba ailluhuan tandarisha yachanaga mana sinzhi chan. Diospa Shimita huin ailluguna uyanauchun nisha sinzhita leinata ushanguichi. Jesus shina causashun, yachachishun nishca tandarinaibi yachangaraushcata leinata ushanguichi. Carangunami Bibliamanda shuc partita leinata ushanguichi. Chi huashaga imata yachashcata cuintanacunata ushanguichi.

Ailluibi mas llaquinacunguichi. Cariguna paihua huarmihuan, yayaguna huahuagunahuan Diospa Shimita yachashaga mas llaquinacungauna. Ailluhuan tandarina uraspi cushi, cungailla pasashaga, huingunami tandarinata munasha chapangauna. Imasaibi yayagunaga huahuagunata yanapacpiga, La Atalaya, ¡Despertad! quillcagunamanda, jw.org nishca pistumanda yachachinata ushanaun. Huahuaguna escuelaibi, colegioibi ima llaquigunata charicpiga imasa alichinatami yayagunaga yachachina anaun. Chasnallata, tandarinaibi cantangaraushcatami huasibi cantasha yachanata ushanaun. Chi huashaga micunatas ushanguichi. JW Broadcasting (tv.jw.org) programata ricunaga ali manma. Ricushca huashaga aillupura cuintanacunata ushanguichi.

Caran semanata ailluhuan Diosta alabangahua tandarishaga, huingunaga gustutami Diospa Shimimanda yachanata munangauna. Chasna rasha caticpiga, Yaya Diosca ashcatami bindisianga (Apocalipsis 1:3).

• Imaraicuta caran semanata shuc timputa surcunchi ailluhuan Diosta alabangahua.

• Yayagunaga imatata rana anaun, chi tandarina uras huinguna cushi anauchun nisha.

Caibi cushi auccunata ricunguichu. Paigunaga asambleaibi maunguna. Ñaupa timpuibi Diosta alabaccunataga huataibi quimsa cutin tandarinauchun nishami saquira. Ñucanchihuas sallata tandarishami cushiyanchi (Deuteronomio 16:16). Caran huataibimi quimsa asambleagunata charinchi: ishcaigunaga shuc punzha asamblea manaun, randi shucca quimsa punzha asamblea man. Chibiga imasata yanapai tucunchi.

Huauquigunahuan mas ali ricsinacunchi. Israelitagunaga Jehovata alabangahua ashcapura tandarisha, ashcatami cushiyac anaura. Ñucanchihuas ashcagunahuan tandarishami, Diosta alabasha cushiyanchi (Salmo 26:12; 111:​1). Chi asambleaibiga chican partimanda, chican llactamanda Testigogunahuanmi ricsinacunchi. Chaupi punzhaibiga chillaita ñucanchi apashca micunata micunchi. Chasnami shuccunahuan chibi mas ali amigo tucunchi (Hechos 2:42). Chasnallata ‘Jesucristota quiric runaguna llaquinacushcatami’ ricunchi (1 Pedro 2:17).

Diosta alita cadsusha catingahuami sinzhiyanchi. Diospa Shimimanda yachachishcata intindishaga israelitagunataga ashcatami yanapai tucuc anaura (Nehemias 8:8, 12). Ñucanchihuas ashcatami balichinchi asambleaibi yachachishcagunata. Caran asambleaibimi Diospa Shimimanda surcushca shuc yuyaillatami yachachinaun. Chibi yachachiuccunaga, sumacta cunasha, imata rana, imata mana ranata ricuchishami yachachinaun, imasa Dios munashcata pactachingahua. Chasnallata, maicanguna llaquigunata binsishcata cuintacpimi cushiyanchi. Astahuanbas Diosta sirvinata munaccunaga bautisarinaunmi. Quimsa punzha asambleaibiga, shuc partibiga callari timpuibi shina churarisha, Biblia nishcacuinta rashami sumacta yachachi tucunchi.

• Imaraicuta asambleagunaibiga ashcata cushiyanchi.

• Ñucanchi asambleama shamushaga, imasata yanapai tucungui.

Jesus mana huañushallata nira: ‘Diospa ali mandanamanda cuintasha paimi quishpichinata munan nishami, tucui mundui chi cushi shimita camachishca tucungami, tucui runaguna chita uyanauchun nisha, chi huasha cai pacha tucurina uras pactarimungami’ (Mateo 24:14). Imasata mundu intiruibi Diospa Shimimanda cuintanaga pactarina ara. Jesus rashcata catishami chitaga pactachishun (Lucas 8:​1).

Runagunataga caran huasibi Diospa Shimimanda cuintanchi. Jesusca paita caticcunataga yachachirami, huasi huasibi gustu cuintaigunata cuintanauchun nisha (Mateo 10:​11-13; Hechos 5:42; 20:20). Chi punda caticcunataga carandami, caimanda chigama ringuichi nisha, shuc pistuta cuc ara (Mateo 10:​5, 6; 2 Corintios 10:13). Chasnallata Bibliamanda cuintangahuami ñucanchihuas shuc pistuta charinchi. Caran muntunga Diospa Shimimanda cuintangahua maimanda, maigama rinatami yachanchi. Chasnami Jesus, Diospa Shimimanda “tucui runagunata” cuintanguichi nisha mandashcata pactachinata ushanchi (Hechos 10:42).

Runaguna mai aushcaibihuas pactanchi. Jesusca yacu mayambi, yacu pugruibi, runagunata maibi tupashahuas Diosmanda cuintac mara (Marcos 4:1; Juan 4:​5-15). Chasnallatami ñucanchihuas runagunata Diospa Shimihuan cuintanchi. Ñambigunaibi, mercadogunaibi, parquegunaibi, telefonohuanbas Bibliamanda cuintanchi. Astahuanbas, ñucanchi mayambi causaccunata, tarbanaibi, escuelaibi compañerogunata, aillugunatas cuintana lugar ricuricpi, Bibliamanda cuintanchi. Chasna racpimi, mundu intiruibi ashca huaranga runagunaga ‘quishpichic shimita’ uyashcauna (Efesios 1:​13).

Canga pitata cuintanata munanguima, Diospa Mandana cai Allpama ali causaita apamunga nisha. Chi shimiguna ama cambi saquirichun nishaga, punda ushashcallaita chita dsaslla cuintangui.

• Ima ali shimigunatata cuintana anchi.

• Jesus rashca shina Diospa Shimimanda cuintangahuaga, imatata Jehovahua testigogunaga ranchi.

Diospa Shimimanda masta cuintaccunaga ñambic runa shina manaun. Ñambic runaga shuccunata pushangahua punda ñambingahua rin. Chasnallatami Jesusca punda ñambic shina cai Allpama shamushaga, causaima apac ñambibi ñucanchita pushasha yanapara (Mateo 20:28). Ñucanchihuas Jesus shinami runagunata Bibliahuan yanapangahua timputa surcunchi (Mateo 28:​19, 20). Chasna acpihuas shuccunaga ñambic shinami masta cuintangahua timputa surcunaun.a

Shungumanda munashami ashca urasta Bibliamanda cuintanaun. Huin Jehovahua testigogunami Bibliamanda cuintanchi. Chasna acpihuas, maicangunaga timputa surcushcamanda 70 urata caran quillaibi cuintangahuami quillcata undachinaun. Chiraicumi ashcagunaga chaupi punzha tarbanata mascanaun. Shuccunataga anllanaun ashilla huauquiguna tiashca partima cachangahua. Chibi caran quillaibi 130 urata manashaga yalita cuintanaun. Chi tucui huauquigunaga, Jehovami ñucanchi minishtishcata cui tucushun nisha, mana ashca cullquita charinaibi pinsarinaunzhu (Mateo 6:​31​-33; 1 Timoteo 6:​6-8). Chi 70, 130 urata mana cuintanata ushaccunaga 30, 50 urata caran quillaibi Bibliamanda cuintangahuami quillcata undachinaun.

Yaya Diosta, runagunatas ashcata llaquishcamandami Bibliamanda masta cuintanaun. Jesus shinallatami musiarinchi, ashca runaguna Diosmanda caruyasha causaushcata (Marcos 6:34). Sallata, alita causangahuaga paiguna imata rana ashcatami ñucanchiga alita yachanchi. Runagunata llaquishcamandami masta cuintaccunaga timputa, ursatahuas cusha Diospagma caillayanauchun nisha yanapanaun (Mateo 22:39; 1 Tesalonicenses 2:​8). Chasna rashami Diosta mas quiringahua, paima caillayangahua yanapai tucunaun. Chiraicumi cushi causanaun (Hechos 20:35).

• Diospa Shimimanda masta cuintaccunaga piguna tanaun.

• Imaraicuta maicangunaga munanaun ashca urasta Bibliamanda cuintangahua.

Jehovahua testigogunaga Diospa Shimimanda yachanata ashcata balichinaun. Chiraicumi ashca urasta cuintaccunataga alita yachachinaun. Chasnami, Diospa Shimimanda alita cuintanata yachanaun (2 Timoteo 4:​5).

Masta Cuintaccunata Yachachina. Caibiga masta cuintaccunami sucta punzhata Tandarina Huasibi yachanaun. Quillcata undachishca punzhamanda shuc huata huashami cai yachachinama rinata ushanaun. Cai yachachinaibiga yachachinaunmi, Jehovama mas caillayangahua, Diospa Shimimanda alita cuintangahua, sallata tucui uras Diosta sirvisha catingahua yanapan.

Diospa Mandanamanda Rimaccunata Yachachina. Cai yachanamaga masta cuintac musuguna, sultiraguna, cadsarashcagunahuas ishcai quillata rinaun. Chima rinaunmi 23manda 65 huatata chariccuna. Bibliamanda alita yachana manaun. Maita cachashcama rina manaun. Jesus cai Allpaibi yapa ali yachachic acpimi pai shina ninaun, “ñuca caibi mauni, ñucata cachahuai” nishca (Isaias 6:​8; Juan 7:29). Paigunaga maibis causangahua yacharinalla manaun. Ima tunu causai, chiri, rupac acpi, tamiacpis, paihua llactamanda micuna mana tiacpis chibi yacharinalla manaun. Imasaibiga shuc mushuc shimita yachana anaun. Cai yachanaibiga ali shunguyuc angahuami yachachinaun, maita cachacpihuas alita yanapanauchun. Paigunata yachachishami, Jehovata, tucui huauquigunata, panigunata yanapangahua yachachinaun.

Galaadpi Yachana. 1943 huatamandaga, Galaadma 8 mil yalli huauquiguna, paniguna rishcauna. Chi huasha shuc llactama cachashcauna. Mundu intiruibi Diospa Shimimanda cuintasha ashca runagunata yanapashcauna (Hechos 13:47). Chi huauquiguna Perú llactama punda pactashcaibiga, Jehovahua testigogunaga mana shuc muntunllahuas tiarachu. Cunanga huaranga yali muntungunami tian. Cuti Japonma pactashcaibiga, chunga Testigogunallahuas mana tiarachu. Cunanga chibiga 200 mil yali Testigogunami tian. Pichca quillagunata Diospa Shimita alita intindisha yachanaun. Mundu intiruibi Diospa Shimita cuintaccunata sinzhiyachisha mirachingahua yanapanaun. Galaadpi yachangahuaga 130 urasta cuintaccunata, shuc llactama cachashcagunata, muntungunata cuirasha puric huauquigunata, Jehovahua testigogunahua oficinaibi tarbaccunatahuas cayanaun.

• Masta Cuintaccunata Yachachinaga imaraicu tan.

• Diospa Mandanamanda Rimaccunata Yachachinamaga pigunata rinata ushanaun.