Tucui uras alita rasha causashun

Tucui runagunami, alita rac amigogunata charinata munanaun. Jehovahuas, paiba amigoguna chasnallata anauchun munan. Chasna acpihuas, cai munduibi shuccunata umac runaguna tiashcamanda, tucui uras alita ranaga sinzhi man. Tucuibi alita ranata ushanchichu. Alita ranaga imaibita yanapaitucunchi.

1. Imahuata tucuibi alita rasha causana anchi

Shuc runagunata alita rashaga, Jehovata llaquisha balichishcata ricuchinchi. Jehovaga tucui ñucanchi shungüibi yuyashcatami yachan. Chasnallata, tucui ñucanchi rashcagunaga paiba ñaupacpi pagllaibi maun (Hebreos 4:13). Diosca ñucanchi amu munasha alita rashcata ricun. Ñucanchi ali rashcagunahuan paita cushiyachinchi. Paiba Shimi nin: “Jehovaga mana alita rac runagunata mana ricunayanzhu, randi alita rac runagunahuan alita apanacun” (Proverbios 3:32).

2. Imashinata caran punzha alita rasha causanata ushanchi

Jehova munashca shina, “mana llullasha sirtu shimita cuintanacuna anchi” (Efesios 4:25). Chiraicu, aillugunata, tarabanaibi compañerogunata, congregacionbi huauquigunata, apugunatahuas mana llullashachu rimanchi. Alita rac runaguna mana shuhuanaunzhu, shuccunata umasha mana cullquita surcunaunzhu (Efesios 4:28 y Colosenses 3:9​ta leipai). Chimandas, impuestogunata paganaun (Romanos 13:5-7). “Ñucanchi tucui uras alita rasha” causanata munanchi (Hebreos 13:18).

3. Alita ranaga imaibita yanapaitucunchi

Mana llullasha, mana shuhuasha causacpiga, shuccuna ñucanchita quiringauna. Chasna alita rashcamanda, congregacionbi huauquigunaga, cungailla, aillu shina sintiringauna. Chasna ali conciencia yuyaita charisha cushi sintirishun. Ñucanchi chasna alita rasha causacpiga, runaguna “ñucanchita quishpichic Diospa Shimi ali man nishami rimangauna”. Chasnallata, shuccunahuas Jehovata sirvinauchun nisha yanapashun (Tito 2:10).

CAIMANDA MASTA YACHAI

4. Jehovaga alita rac runagunatami gustan

Salmo 44:21 y Hebreos 4:13​ta leichi, huasha cai tapuigunamanda cuintanacuichi:

• Jehovata imatas pacanata ushanchichu. Imahuata chasna yuyangui.

• Sinzhi acpihuas sirtuta rimacpi, Jehovaga imasashi sintiringa.

5. Tucui uras alita rasha causashun

VIDEO: Cushi causangahua imata yanapaitucushun: Ali concienciata charina (2:32)

Hebreos 13:18​ta leichi, huasha imasa alita rasha causanata cuintanacuichi...

• ... ailluibi.

• ... tarabanaibi o escuelaibi.

• ... maibi aushahuas.

6. Alita rasha causanaga yanapaitucunchi

Imasaibi alita rashcamanda turmintugunata charishun. Pero, tucuibi alita rashca huasha, cungailla cushilla sintirishun. 1 Pedro 3:10-12​ta leichi, huasha cai tapuimanda cuintanacuichi:

• Alita ranaga, sumacta causangahua imasata yanapaitucushun.

1. Cazarashcaguna mana pacasha sirtuta cuintanacushaga, cushilla causangauna.

2. Tarabaccuna mana llullasha mana shuhuacpiga, amuguna paigunata quiringauna.

3. Runaguna mana umasha rimacpiga, autoridadguna paigunata alita ricungauna.

IMATA YACHASHCANGUI

Jehovaga paiba amigoguna mana llullasha, mana shuhuasha, alita rasha causanauchun munan.

Yachashcata cuintai

• Imagunaibita alita rana anchi.

• Jehovata imatas pacanata ushanchichu. Imahuata chasna yuyangui.

• Canga, imangahuata tucui uras alita rasha causana angui.

CANLLATA MASTA YACHAI

Imasata yayagunaga paiguna huahuagunata alita rangahua yachachinata ushanaun.

Ama llullaichu (1:44)

Paiguna rimashcata pactachiccunaga imatata charingauna.

Can rimashcata pactachicpiga Jehova canda bendicianga (9:09)

Maican gobiernoguna cullquita mana alita gastanaucpihuas, impuestogunata pagana manchi.

“Canga impuestogunata pagana changui” (La Atalaya, 1 de septiembre de 2011)

Shuc runa shuccunata umasha cullquita shuhuara. Paiba causaita alichingahua imata yanapara.

“Jehova ali shungu, perdonac ashcata yacharani” (La Atalaya, 1 de mayo de 2015)