¿Imamantatac Jehová Diosca yacu juizhuta cachasha nirca?

Noepac punzhacunapica gentecunaca yallita millaillatami ruhuaccuna carca (Génesis 6:5)

Allpapi Adán Eva huahuacunata charicpica achcacunami tucurca. Chai puzhacunapimi maijan angelcunapish Diablo shina Diospac contra tucurcacuna.

Paicunami huarmicunahuan cazaranata munashpa cielomanta uricurca. Ña allpapi cashpaca runacuna shina aichayuc tulluyuc tucushpa, huarmicunahuan cazarashpaca huahuacunata charirca. Chai huahuacunaca shuccunata yalli millai, sinchicunami carca.

Bibliapica ninmi millai gentecunami yallita cai allpapica jundarca. Paicunapac shungupica punzhanta millaita ruhuanallatami yuyacurcacuna.

Jehová Diosta cazushpami Noeca huambuna huasita ruhuarca (Génesis 6:13, 14, 19, 22; 7:13)

Noeca shuc alli runa cacpimi, Jehová Diosca huillarca millai gentecunataca yallita tamyachishpami yacuhuan tucuchigrini nishpa.

Diosmi Noeta mandarca caspimanta shuc jatun huambuna huasita ruhuai. Chaipi cambac familiandi, shinallatac tucuilaya animalcunandi yaicungui nishpa.

Noeca gentecunaman huillarcami, Diosca yallita tamyachishpa millai gentecunata tucuchigrinmi nishpa. Shina huillacpipish mana uyasha nishpami shuccunaca asircacuna, piñarircacunapish.

Noeca huambuna huasita tucuchishpaca animalcunata yaicuchirca.