¿Huañushcacunaca causaringachu?

1. Huañushcacunamanca ¿ima esperanzatac tiyan?

Jesús cai allpapi cacpimi, paipac amigo Lazaroca huañushcarca. Paica Betania llactapimi causarca. Jesús ña chaiman chayacpica, Lazaroca ñami chuscu punzhata huañushca carca. Chairicumi Jesusca Martahuan, Mariahuan Lázaro enterrashca pushtuman rircacuna. Chaipimi gentecunaca jin tandarirca. Martapish Mariapish Jesús paicunapac turita causachishcata ricushpaca imamundotami cushirishcangacuna. Juan 11:21-24, 38-44-ta liyi.

Huañushcacunamanta causarina alli noticiataca Bibliapimi huillan. Martaca ñami yacharca, Jehová Dios huañushcacunata cutin cai allpapi causachun causachina cashcata. Isaías 26:19-ta liyi.

2. Huañushca quipaca ¿imatac tucun?

Gentecunaca allpamanta ruhuashcami canchic (Génesis 2:7; 3:19). Ñucanchicca aichayuc, tulluyucmi canchic. Shuc alma o espíritu ñucanchic cuerpo ucupi causactaca mana charinchicchu. Huañushpaca chaipimi tucurinchic, mana causashpa catinchicchu. Ña uma ñutcu huañucpica, tucui yuyaicunami borrarin. Chairicumi huañushcacunaca imata mana sintin, ni maipipish mana padecicun. Lázaro cutin causarishpaca pai maipi cashcataca mana parlarcachu. Eclesiastés 9:5, 6, 10-ta liyi.

Maijancunaca crinmi Taita Diosca infiernopimi almacunataca rupachicun nishpa. Pero chaica mana ciertochu can. Ima shinami ña yachacushcanchic, huañushcacunaca imata mana sintinchu, ni mana yuyanchu. Infierno jahua yachachishcacunaca llullami can, Jehová Diostami mana allipi saquincuna. Gentecunata ninapi rupachina yuyaitaca Diosca mana charinchu, chaitaca jinmi piñan. Jeremías 7:31-ta liyi.

Cai videota ricui Huañushpaca ¿imatac tucun?

3. ¿Huañushcacunahuan parlanacui pudinchicchu?

Huañushcacunaca uyanatapish, parlanatapish mana pudinchu (Salmo 115:17). Shinapish millai supaicunami huañushcacuna parlanacuclaya tucushpa gentecunahuan parlancuna (2 Pedro 2:4). Chairicumi Jehová Diosca huañushcacunahuan parlacunataca jin piñan. Deuteronomio 18:10, 11-ta liyi.

4. ¿Picunallatac cutin causaringa?

Achca huañushcacunami cai allpapi causangapac causaringa. Maijancunacarin Jehová Diosta mana ricsishcamanta mana allita ruhuaccunapish causaringami. Hechos 24:15, QCA, 1996-ta liyi.

Chai causariccunaca Diosmanta yachacui callarishpami, Jesuspi feta churashpa pai mandashcacunata cazunata charinga (Apocalipsis 20:11-13). Chashna cazushpaca para siempremi cai allpapi cushilla causangacuna. Juan 5:28, 29-ta liyi.

5. Causarina jahua yachacushpaca Jehová Diosmantaca ¿imatatac yachacunchic?

Huañushcacunata causachina jahua yachacushpaca Jehová Diosca imamundo cuyac cashcatami yachacunchic. Paipac cuyashca Churita ñucanchicta salvachun cachashcamantami, huañushca familiataca cutin ricuna esperanzata charinchic. Huañushcacuna causaricpica quiquinca ¿maijantatac ricunata munanguiman? Juan 3:16; Romanos 6:23-ta liyi.