Diospac Mandanaca ¿imatac can?

1. Diospac Mandanaca ¿imatac can?

Diospac Mandanaca shuc gobiernomi can. Cai gobiernomi, gentecunapac mandanata tucuchishpa jahua cielopipish, cai allpapipish Diospac munaita ruhuanga. Cai allpapi causac gentecunaca Diospac Mandana mandachunmi nesitanchic. Chai Mandanami tucui gentecuna sumacta causachun tandachinga. ¿Manchu caica shuc alli noticia can? Daniel 2:44; Mateo 6:9, 10; 24:14-ta liyi.

Tucui gobiernocunami shuc dirigenteta charin. Chai shinallatacmi Jehová Diospish paipac Mandanapi mandachunca paipac Churi Jesusta churashca. Apocalipsis 11:15-ta liyi.

Cai videota ricui Diospac Mandanaca ¿imatac can?

2. ¿Imamantatac Jesusca shuc alli mandac can?

Jesusca cuyac, cashcata ruhuac cashcamantami shuc alli mandac can (Mateo 11:28-30). Shinallatac gentecunata ayudangapacmi poderta charin. Chai poderhuanmi jahua cielomanta cai allpata alli mandanga. Jesús causarishpaca jahua cielopimi Diospac alli ladoman tiyaringapac rirca. Chaipimi mandana poderta cungacaman shuyacurca (Hebreos 10:12, 13). Taita Diosca ñami mandana poderta Jesusmanca curca. Daniel 7:13, 14-ta liyi.

3. Jesusca ¿paillachu mandanga?

Mana. Jehová Diosca ashalla gentecunatami jahua cielomanta Jesushuan mandachun acllashca (Apocalipsis 5:10). Jesusca cai allpapi cashpaca, ashalla gentecunatami paita caticcuna cachun acllashca. Paicunataca apostolcuna nishpami shutichirca. Paicunami cielopi mandachun punta acllashcacuna can. Diosca cunan punzhacunapipish maijan caricuna, huarmicunata Jesushuan mandachun acllashpami caticun. Jesús shinallatacmi paicunapish huañushpaca espiritupi causachishca canga. Juan 14:1-3; 1 Corintios 15:42-44-ta liyi.

¿Mashnacunashi cielomanca ringa? Bibliaca ashacunallami ringa ninmi. Paicunataca “ashalla ovejacuna” nishpami Jesusca shutichirca (Lucas 12:32). Chairicumi 144.000-cunalla cielomanta Jesushuan cai allpata mandangacuna. Apocalipsis 14:1-ta liyi.

4. Jesús mandac tucucpica ¿imatac tucurca?

Jesusca 1914 huatapimi Mandac tucurca. Ña mandac tucushcahuanmi cielomanta Diablotapish, supaicunatapish cai allpaman llucchishpa shitarca.a Chairicumi Diabloca imamundota rabiarishpaca cai allpapica llaquicunata ruhuai callarirca (Apocalipsis 12:7-10, 12). Chai punzhamanta pachami yarcaipish, macanacuipish, allpa chucchuipish, unguicunapish gentecunataca llaquichicushca. Chaicunata ricushpami Diospac Mandanaca ñalla chai llaquicunata tucuchinata yachanchic. Lucas 21:7, 10, 11, 31-ta liyi.

5. Diospac Mandanaca cunanpica ¿imatatac ruhuacun? Quipa punzhacunapipish ¿imatatac ruhuanga?

Cunan punzhacunaca tucui muyundi allpapimi Diospac Mandanamanta huillashpa, tucui llactacunamanta “mana yupaipac gentecunata” tandachishpa catinchic. Achca alli shungu gentecunami Jesús mandachun shuyacuncuna. Diospac Mandana mana allicunata tucuchicucpica paicunami salvaringa. Chaimantami ñucanchicpish salvarisha nishpaca, Jesusta cazuna canchic. Apocalipsis 7:9, 14, 16, 17-ta liyi.

Jesús 1.000 huatacunata mandacushpami, puntapi Dios munashca shina cai allpataca shuc paraisota ruhuanga. Chaita ruhuashpami, Jesusca pai mandanataca Taita Diosman cutichinga (1 Corintios 15:24-26). Cai jahuaca ¿maijanmantac parlanata munanguiman? Salmo 37:10, 11, 29-ta liyi.