Diosca cai allpataca ¿imatashi ruhuanga?

1. Diosca ¿imapactac cai allpataca crearca?

Jehová Diosca gentecuna causachunmi cai allpataca crearca. Cai allpata ruhuashpaca Adán y Eva chaipi causachunmi ruhuarca, mana jahua cielopi causachunchu ruhuarca. Cielopi causachunca angelcunatami ruhuarca (Job 38:4, 7). Jehová Diosca punta runata ruhuashpaca, Edén nishca alaja huertapimi churarca (Génesis 2:15-17). Ashtahuanpish, paipac huahuacunahuan cushilla para siempre causana oportunidadtami curca. Salmo 37:29; 115:16-ta liyi.

Chai alaja huertaca shuc pushtullapimi carca. Adán y Eva huahuacunata charishpa ashancaman ashancamanmi chai huertata mirachina carca (Génesis 1:28). Cai allpaca gentecuna causana huasi shinami can, mana tucuchingapacchu. Salmo 104:5-ta liyi.

Cai videota ricui Diosca ¿imapactac cai allpataca crearca?

2. Cunanpica ¿imamantatac allpaca mana Edén huerta shina can?

Adán y Evaca Diosta mana cazurcacunachu, chairicumi Edén huertamanta Diosca llucchishpa cacharca. Chaimantami cunan punzhaca cai allpaca mana chai shina can. Chaitaca pipish mana allichi valishcachu. Bibliapica cai allpataca mana alli gentecunamanmi cushca ninmi (Job 9:24). Génesis 3:23, 24-ta liyi.

Shinashpaca Jehová Dios imata gentecunaman munashcaca ¿chaipichu saquirirca? Mana. Paica tucui podertami charin, pai munashcaca pactangatacmi (Isaías 45:18). Adán y Eva ima shinami chai huertapi cushilla causarca, chai shinallatacmi quipa punzhacunapi Diosca cutin cushilla causachun ruhuanga. Salmo 37:11, 34-ta liyi.

3. ¿Ima shinatac allpaca puntapi cashca shina tucunga?

Chaitaca Diospac Mandanapi Jesús mandacushpami puntapi cashca shina cai allpataca ruhuanga. Shina ruhuangapacca, Armagedón nishca jatun macanacuipimi paipac angelcunahuan tucushpa, tucui Diosta piñaccunataca tucuchinga. Chaimantaca Adán y Evata pandachic Diablotaca 1.000 huatacunacamanmi huichcashpa churanga. Jesusmi Diosta alli serviccunataca chai macanacuipi mana tucurichun tucuimanta jarcashpa cuidanga. Chaimantami mana huañushpa unai unaicaman cai sumac allpapi causangacuna. Apocalipsis 20:1-3; 21:3, 4-ta liyi.

4. ¿Ima horastac llaqui causaica tucuringa?

¿Ima horascamantac Diosca llaquicunataca tucuchinga? Jesusmi ima tucuna cashcataca ña huillarca. Cunan punzhacunapi ima llaquicuna tucucucta ricushpami tucurimui punzhacunapi causacushcata yachanchic. Mateo 24:3, 7-14, 21, 22-ta liyi.

Jesusca 1.000 huatacunata cai allpata mandacushpami cai llaquicunataca tucuchinga (Isaías 9:6, 7; 11:9). Paica mana jatun mandacllachu can. Sumo Sacerdotepishmi can. Chaimantami Diosta cazuc gentecunataca juchacunamanta anchuchinga. Shinaca Jesusmantami Diosca unguicunata, huañuicunata, mayoryanatapish tucuchinga. Isaías 25:8; 33:24-ta liyi.

5. ¿Picunatac allpapica causashpa catinga?

Cai allpapica Diosta cazuc gentecunallami causashpa catinga (1 Juan 2:17). Jesusca paita caticcunamanca, alli shungu gentecunata mashcashpa, Dios munashca shina causanata, yachachichunmi mandarca. Cunan punzhacunapica achca gentecunatami Jehová Diosca mushuc allpapi ima shina causanata yachachicun (Sofonías 2:3). Cunanpica maijan familiacunaca, Jehová Diosmanta Huillaccunapac Tandanacuna Huasicunapimi juntulla Diosta servicuncuna. Paicunami cai alli noticiacunata uyashpa alli cusa, alli huarmi, alli taita mama cangapac yachacuncuna. Miqueas 4:1-4-ta liyi.