Diosca ¿imamantatac llaquicuna tiyachun saquishca?

1. Llaquicunaca ¿ima shinatac tiyai callarirca?

Diablo llullacpimi cai allpapica llaquicunaca tiyai callarirca. Chai angelca jucha illacmi carca. Shinapish paica cashcata ninata saquishpami llullai callarirca (Juan 8:44). Tucuita Ruhuac Diosta adoranapac randica, paita adorachun munashpami, chai yuyaitaca asha asha paipac shungupi mirachishpa catirca. Diabloca Taita Diosta cazunapac randica paita cazuchun munashpami jatun llullata nishpa Evata pandachirca. Adanpish paipac huarmi nishcata uyashpami Diosta mana cazurca. Chaimantami huañuipish, llaquicunapish tiyai callarirca. Génesis 3:1-6, 19-ta liyi.

Evata pandachishcamantami Diabloca Taita Diospac contra tucui callarirca. Jehová Dios mandachunmi Diabloca mana munarca. Achca gentecunapish Diosta mana cazushpami Diablopac parte tucushcacuna. Chaimantami millai Diabloca cai mundopac mandac tucushca. Juan 14:30; 1 Juan 5:19-ta liyi.

2. ¿Diospac creashcacunachu imapi mana alli cashcanga?

Mana. Jehová Diospac creashcacunaca tucuimi alli. Angelcunapish, Adán Evapish Taita Diosta cazunallami carca (Deuteronomio 32:4, 5). Taita Diosca paicunamanca allita, mana allita acllana yuyaitami curca. Chairicumi ñucanchicpish Diosta cuyanata acllai pudinchic. Santiago 1:13-15; 1 Juan 5:3-ta liyi.

3. Diosca ¿imamantatac llaquicuna tiyachun saquishca?

Diablo ima shina mandacta ricungapacmi asha tiempota mandachun saquishca. ¿Imamantatac chaita ruhuashca? Pi mandacpish Jehovapac apoyota mana charishpaca gentecunaman cushi causaitaca mana cushcachu. Chaitaca ricunallami can (Eclesiastés 7:29; 8:9). Cai tucui 6.000 huatacunapica ni pi mandacpish tucuilaya llaquicunata, macanacuicunata, unguicunatapish mana tucuchi pudishcachu. Jeremías 10:23; Romanos 9:17-ta liyi.

Jehová Dios ñucanchicta mandachun saquishpaca achca bendicioncunatami chasquishun (Isaías 48:17, 18). Ñallami Jehová Diosca tucui mandaccunata tucuchishpa, paipac Mandanata apoyac gentecunallata cai allpapi causachun saquinga (Isaías 11:9). Daniel 2:44-ta liyi.

Cai videota ricui Diosca ¿Imamantatac llaquicuna tiyachun saquishca?

4. Dios pacienciata charishcamantaca ¿ima oportunidadtatac charinchic?

Diabloca ninmi gentecunaca tucui alli ricllapimi Diostaca servin nishpa. Dios pacienciata charishcamantami pai munashca shina causashpaca, Diabloca llulla cashcata ricuchinchic. Diospac Mandanata apoyashcatapish ricuchinchic. Job 1:8-12; Proverbios 27:11-ta liyi.

5. Diospac lado tucungapacca ¿imatatac ruhuana canchic?

Dios ima shina adorachun munashcatami yachacuna canchic. Shinallatac Bibliapi yachachishcacunata cazushpami alli religionta catina canchic (Juan 4:23). Jesuspac ejemplota catishpaca macanacuicunapi, politicacunapi mana chapurinachu canchic. Chashnami mana Diablopac lado tucushcata ricuchishun. Juan 17:14-ta liyi.

Diablomi gentecunataca tucuilaya mana allicunata ruhuachicun (1 Pedro 4:3, 4). Mana allita ruhuanata saquicpica maijan familiacunaca quiquinta juriashpa llaquichisha ningacunami. Chashna tucucpica Jehovata serviccunahuan tandanacushpa paipac mandashcacunata cazungui. Ima llaquicuna ricuricpipish Dios munashca shina causashpami Diablo llulla cashcata ricuchishun. 1 Corintios 6:9, 10; 15:33-ta liyi.

Dios cuyac cashcata ricushpami llaquicunata ñalla tucuchina cashcata yachanchic. Maijanpish Diospi crishpa, paipac lado tucushpaca cai allpapica para siempremi causanga. Juan 3:16-ta liyi.