Génesis
3 ꞌE o roto o te rauhuru manu tere henua taꞌatoꞌa aŋa era e te ꞌAtua ko Iehoha, ko te kōreha te manu ꞌata mārama-rama mo hāpaꞌo i a ia ꞌo topa rō te ꞌati. I tano era te mahana he ꞌui tū kōreha era ki te viꞌe: “¿He aŋi ꞌā ko kī atu ꞌā e te ꞌAtua e ko riva kōrua mo kai mai ruŋa i te tumu taꞌatoꞌa o ruŋa i te henua nehe-nehe?”. 2 ꞌE he pāhono e te viꞌe: “O te rauhuru tumu kai o ruŋa i te henua nehe-nehe e riva nō māua mo kai. 3 ꞌE o te tumu era o vāeŋa tini o te henua nehe-nehe ko kī ꞌā e te ꞌAtua: ʻꞌIna kōrua ko kai mai ruŋa, ꞌina, ꞌina ko haka puā ꞌo mate rō kōruaʼ”. 4 Hai meꞌe nei he kī e te kōreha ki te viꞌe: “ꞌIna mau ꞌā kōrua e ko mate. 5 ꞌO te ai ko ꞌite riva-riva ꞌā e te ꞌAtua ꞌi te mahana era mo kai o kōrua mai ruŋa i rā tumu, ꞌi rā mahana ꞌā he ꞌara te kōrua mata ꞌe he tuꞌu kōrua pē te ꞌAtua ꞌā, i te aŋi-aŋi i te meꞌe riva-riva ꞌe i te meꞌe rake-rake”. 6 I oti era he noho te viꞌe he pupura i te mau o rā tumu ꞌe he manaꞌu rā mau he meꞌe riva mo kai ꞌe he meꞌe pohe mau ꞌā ki te mata. ꞌĒ-ē, rā tumu he meꞌe pohe mau ꞌā mo mataꞌitaꞌi. ꞌE he rou ia te mau mai ruŋa i rā tumu ꞌe he kai. ꞌE i oho era he piri ki tāꞌana kenu he vaꞌai tāꞌana o rā mau ꞌe he kai takoꞌa. 15 He haka riri au i a kōrua, i a koe ararua ko te viꞌe ꞌe ki tuꞌu hakaara ꞌe ki te hakaara era ōꞌona. Māꞌana e rei tuꞌu pūꞌoko ꞌe māꞌau e ŋau tōꞌona reke”. 19 Hai paꞌahia o tuꞌu ꞌāriŋa ka kai ena koe i te kai ki tuꞌu hoki iŋa ki roto i te ꞌōꞌone, ꞌo te ai mai ira a koe i toꞌo mai ai. ꞌO te ai he puŋaꞌehu ꞌōꞌone koe, ꞌe ki te puŋaꞌehu ꞌōꞌone koe ka hoki ena”. 23 I oho era, he toꞌo mai e te ꞌAtua he tute mai roto i te henua nehe-nehe, ko ꞌĒden tōꞌona ꞌīŋoa, mo oho mo ꞌoka i te henua, te ꞌōꞌone era, mai ira i toꞌo mai ai i a ia. 24 ꞌE he tute i te taŋata, he haka noho i te merahi, a te aro era e eꞌa mai era te raꞌā o te henua nehe-nehe ko ꞌĒden, ꞌe e tahi hoe roa-roa ꞌi ruŋa ꞌā te ahi e teka-teka e oho era. Pē ira i puru ai te ara o te tumu vaꞌai i te ora ꞌāpī ꞌina he hopeꞌa raꞌa.