Éxodo
3 I oho era a Mōtē he riro he taŋata hāpaꞌo māmoe o tōꞌona huŋavai ko Jetró, te oromatuꞌa o Madián. E tahi mahana, e maꞌu era te nuku-nuku māmoe a te pāꞌeŋa topa era te raꞌā o te henua paka-paka, he tuꞌu ki Horeb, te maꞌuŋa o te ꞌAtua mau. 2 ꞌE he takeꞌa te merahi a Iehoha ꞌi roto i te ahi-ahi ura-ura ꞌi vāeŋa o te tumu ꞌiti-ꞌiti e tahi. E uꞌi riva-riva era e Mōtē he takeꞌa tū tumu era e ura-ura rō ꞌā i te ahi ꞌe ꞌina he vera. 3 He kī e Mōtē ki a ia mau ꞌā: “ꞌĪ au he ꞌata hāhine mo uꞌi riva-riva te meꞌe huru kē nei mo aŋi-aŋi mai ꞌo te aha te tumu ꞌiti-ꞌiti nei e taꞌe vera ena”. 4 I takeꞌa era e Iehoha e hāhine ꞌā mo mataꞌitaꞌi he raŋi ia e te ꞌAtua mai roto i tū tumu ꞌiti-ꞌiti era ꞌe he kī: “¡E Mōtē! ¡E Mōtē! ꞌE he pāhono e ia: “ꞌĪ au”. 5 He kī e te ꞌAtua: “ꞌIna koe ko ꞌata hāhine mai. Ka patu tuꞌu kirivaꞌe ena, nā koe e rei ꞌā i te kona haꞌamoꞌa”. 6 ꞌE ki oti he kī: “Ko au te ꞌAtua o tuꞌu matuꞌa tane, te ꞌAtua o ꞌAparahama, te ꞌAtua o Itaꞌata, ꞌe te ꞌAtua o Jacob”. I oho era he puru a Mōtē i tōꞌona ꞌāriŋa ꞌi te riꞌa-riꞌa mo uꞌi ki te ꞌAtua mau. 7 ꞌE he kī haka ꞌou e Iehoha: “Ko takeꞌa ꞌā au te mamae o tāꞌaku nūnaꞌa i Egipto ꞌe ko ŋaroꞌa ꞌā au te rāua taŋi-taŋi ꞌo te tōtōā e te nuꞌu haka tāvini era i a rāua. Ko aŋi-aŋi riva-riva ꞌā au te rāua mamae. 8 ꞌO ira ꞌī au he topa mo haka eꞌa i a rāua mai Egipto ꞌe mo toꞌo mai mai rā henua mo maꞌu ki te henua riva-riva ꞌe nui-nui, henua era e ko pau te ū ꞌe te meri, te kona o te cananeo, o te hitita, o te amorreo, te perizita, o te heveo o te jebuseo. 9 ꞌE ka uꞌi, ko tuꞌu tahi mai ꞌā ki a au te taŋi-taŋi o tāꞌaku nūnaꞌa o itaraera. Ko takeꞌa takoꞌa ꞌā au te tōtōā o te nūnaꞌa egipcio ꞌi ruŋa i a rāua. 10 ꞌI te hora nei, ꞌī au he uŋa i a koe ki muꞌa o te faraón. Māꞌau e toꞌo mai mai Egipto i tāꞌaku nūnaꞌa te itaraera. 14 ꞌE he pāhono e te ꞌAtua ki a Mōtē: “He Riro a Au ko te Meꞌe Haŋa era ꞌĀꞌaku mo Riro”. ꞌE he kī haka ꞌou: ʻHe Riro a Au ko uŋa mai ꞌā ki a kōruaʼ”. 15 ꞌE he kī haka ꞌou e te ꞌAtua ki a Mōtē: “ꞌĪ te meꞌe mo kī ki te itaraera: ʻKo Iehoha te ꞌAtua o toꞌu tupuna, te ꞌAtua o ꞌAparahama, te ꞌAtua o Itaꞌata ꞌe te ꞌAtua o Jacob, ko uŋa mai ꞌā ki a kōruaʼ. ꞌĪ tōꞌoku ꞌīŋoa ki te hopeꞌa raꞌa, ꞌe taꞌe mo rehu mai te hakaara nei ki te hakaara taꞌatoꞌa.