1 Kōrinto

Ki te ꞌAtua mau nō tātou ana haꞌamuri

10 E te taina, ꞌina ko rehu te meꞌe topa era ki te tātou tupuna: taꞌatoꞌa o te nuꞌu nei i haka tika rō e te ꞌAtua hai raŋi e tahi, taꞌatoꞌa i haka eꞌa rō ki te rua pāꞌiŋa o te vai era ko Vaikava Mea-mea. 2 Hai ŋā meꞌe nei i tuꞌu ai pa he meꞌe: ko ⸤papatito⸥ tahi ꞌana a rāua pa he nuꞌu hāpī ꞌa ⸤Mōtē⸥. 3 ꞌE taꞌatoꞌa i vaꞌai rō e te ꞌAtua hai meꞌe mo kai 4 ꞌe i haka unu rō hai vai haka eꞌa mai roto i te māꞌea. Te māꞌea nei ko Ietū hokorua i a rāua ꞌi te ara. 5 ꞌE, ka ai atu pē ira, ꞌina he ꞌAtua kai koa mo te rahi raꞌa o te nuꞌu nei ꞌi te meꞌe era he hara nō te aŋa o rāua. ꞌO ira i mā-mate ai ꞌi te kona ꞌone taꞌe noho taŋata.

6 Te meꞌe topa era ki a rāua e toꞌo pa he hāpī mo tātou, ꞌo haŋa ki te meꞌe taꞌe tano, pa he haŋa iŋa era o rāua. 7 ꞌIna ko haꞌamuri kōrua ki te ꞌītoro, pa he meꞌe i aŋa e rāua. E kī rō ꞌana, paꞌi, ꞌi ruŋa i te ⸤Pāpaꞌi Moꞌa⸥: «He noho ananake, he kai ꞌe he unu, ꞌe i oti era he eꞌa ki ruŋa, he haꞌamuri hai ꞌori ki te ꞌītoro». 8 ꞌIna tātou ko moe i te viꞌe i te taŋata taꞌe he viꞌe ꞌo he kenu hāipo-ipo, pa he meꞌe aŋa e te tētahi o te nuꞌu era. ꞌI te aŋa o rāua i te meꞌe nei i mā-mate ai e piti ꞌahuru mā toru taꞌutini taŋata ꞌi te mahana mau nō e tahi. 9 ꞌE ꞌina tātou ko haka ꞌatu i te ⸤Kiritō⸥, ꞌina ko uꞌi ꞌātā ki hē tōꞌona roa mo haꞌaoromaꞌi i te tātou hara, pa he meꞌe aŋa e te tētahi o te nuꞌu era. He aŋa i te meꞌe nei i mā-mate ai i ŋau e te kōreha veneno. 10 ꞌIna takoꞌa ko hēŋuꞌi-ŋuꞌi mo te ꞌAtua, pa he meꞌe aŋa e te tētahi o te nuꞌu era. He aŋa o te nuꞌu era i te meꞌe era i tiŋaꞌi ai e te merahi o te mate.

11 Te meꞌe taꞌatoꞌa topa era ki te tupuna e toꞌo pa he hāpī mo tātou. ꞌE te ŋā meꞌe nei ko pāpaꞌi ꞌana ꞌi ruŋa i te Pāpaꞌi Moꞌa mo ꞌite o te nuꞌu noho o te hora nei hāhine ki te paꞌo iŋa o te ao: te ꞌAtua e haka ūtuꞌa rō i te nuꞌu aŋa i te meꞌe tuꞌu pē nei. 12 ꞌO ira, te kope manaꞌu e haka moe riva-riva rō ꞌana a ia i te manaꞌu ꞌi ruŋa i a Ietū e uꞌi ꞌo hara. 13 E manaꞌu tātou: te meꞌe haka ꞌatu i a tātou mo hara ko te meꞌe ena ꞌā e haka ꞌatu ena i te taꞌatoꞌa nō taŋata mo hara. ꞌIna ko rehu ꞌi te hora o te haka ꞌatu: te ꞌAtua ꞌina e ko taꞌe haka tano i tāꞌana meꞌe kī. Ko kī ꞌana, paꞌi: ꞌina e ia e ko haꞌatiꞌa mo haka ꞌatu mai i a tātou hai meꞌe e ko ravaꞌa e tātou mo haꞌaoromaꞌi, ꞌe, takoꞌa, e vaꞌai rō mai e ia i te rāveꞌa mo eꞌa o tātou ꞌina kai hara mai rā meꞌe era mo haka ꞌatu mai.

14 ꞌO ira, e tōꞌoku taina haŋa rahi ē, e uꞌi kōrua ꞌo haꞌamuri ki te ꞌītoro. 15 A kōrua he nuꞌu ꞌite mo haka topa riva-riva i te manaꞌu; mo kōrua mau ꞌā e uꞌi hoki e tano rō ꞌā ꞌo e taꞌe tano rō ꞌā tāꞌaku vānaŋa pāpaꞌi atu ena. 16 Hora ena o tātou o te nuꞌu ⸤haka moe i te manaꞌu⸥ ꞌi ruŋa i a Ietū e piri ena mo haka manaꞌu o ruŋa i tōꞌona mate, e ai rō ꞌana te tātou meꞌe unu, ꞌe mo rā meꞌe e māuru-uru nei tātou ki te ꞌAtua. He tāpaꞌo ko maꞌitaki ꞌana tātou ꞌi te toto o te Kiritō. ꞌE te haraoa mo-more kai e tātou he tāpaꞌo pē nei ē: mo tātou takoꞌa te meꞌe riva-riva ravaꞌa hai mate era o te Kiritō. 17 Mai te haraoa mau nō e tahi e kai ena tātou taꞌatoꞌa, he tāpaꞌo pē nei ē: a tātou, te nuꞌu taꞌatoꞌa ꞌa Ietū, he hakari mau nō e tahi.

18 Te itaraera kai i te ꞌanimare tūtia ki te ꞌAtua, e haꞌamuri ꞌana ki te ꞌAtua. 19 Mo ai pē ira, ¿ko tū meꞌe ꞌana hō mo te nuꞌu kai i te kai tūtia ki te ꞌītoro? ꞌIna. Te ꞌītoro, paꞌi, ꞌe te kai tūtia ki a ia ꞌina e tahi ōꞌona hauhaꞌa. 20 Te ꞌati nō, hora ena e tūtia ena ki te ꞌītoro, e tūtia ꞌana ki te tātane, taꞌe ki te ꞌAtua, ꞌe ꞌina a au kai haŋa mo ai e tahi meꞌe o kōrua o te tātane. 21 E ko tano, paꞌi, a au mo unu ꞌe mo kai i te meꞌe haka manaꞌu i te mate o te tātou Pūꞌoko Haka Tere ko Ietū Kiritō ꞌe, ꞌi ruŋa ꞌā, mo unu ꞌe mo kai i te meꞌe tūtia ki te tātane. 22 ¿E haŋa ꞌana hō tātou mo haka mākota i te tātou Pūꞌoko Haka Tere? ꞌIna ko rehu: i hau rō atu a ia i te pūai ki a tātou.

Te kōrua meꞌe aŋa, e aŋa mo koa o te ꞌAtua

23 He parautiꞌa te vānaŋa ena e kī ena: «ꞌIna he meꞌe taꞌe haꞌatiꞌa i te taŋata mo aŋa i tāꞌana meꞌe haŋa». Ka ai atu pē ira, taꞌe taꞌatoꞌa meꞌe he meꞌe riva-riva mo te taŋata, ꞌe taꞌe taꞌatoꞌa meꞌe he meꞌe haka hio-hio i te manaꞌu ꞌi ruŋa i a Ietū. 24 ꞌIna koe ko manaꞌu ki te meꞌe mo te riva-riva mau nō ōꞌou; e manaꞌu ki te meꞌe mo te riva-riva o te tētahi.

25 E kai kōrua i te meꞌe taꞌatoꞌa nō hoꞌo o roto i te hare hoꞌo kiko ꞌina ko ꞌui hoki ko tūtia ꞌā ꞌo ꞌina kai tūtia ki te ꞌītoro, 26 ꞌi te meꞌe era te henua ꞌe te meꞌe taꞌatoꞌa o ruŋa o te ꞌAtua.

27 Mo kī atu o te kope e tahi taꞌe haka moe i te manaꞌu ꞌi ruŋa i a Ietū mo oho ōꞌou ki tōꞌona hare mo kai ꞌe he oho koe, e kai i te meꞌe nō era ka vaꞌai atu era, ꞌina ko ꞌui hoki he kai tūtia ki te ꞌītoro ꞌo he kai taꞌe tūtia. 28 ꞌE, mo kī atu e te kope e tahi o ira: «Te kiko nei ko tūtia ꞌā ki te ꞌītoro», mo te riva-riva o te kope era, ꞌina koe ko kai, koiꞌite mōꞌona ꞌe mo te tētahi nuꞌu o ira te kai i rā kiko he hara. 29 E kī atu ena a au i te meꞌe nei taꞌe o ruŋa i te manaꞌu o kōrua kī atu he aha te meꞌe tano ꞌo taꞌe tano mo aŋa, o ruŋa i te manaꞌu o tētahi a au e kī atu ena.

E kī rō pēaha te kope e tahi: «¿He aha a au ana taꞌe aŋa i te meꞌe e haꞌatiꞌa rō ꞌana mo aŋa ꞌo te ai nō mo te rua he hara, ꞌi te taꞌe aŋi-aŋi riva-riva i te meꞌe o te ꞌAtua?». 30 ꞌE e kī takoꞌa rō pēaha: «Mo māuru-uru a au i te kai ki te ꞌAtua, ¿he aha ia te nuꞌu ana tuhi mai i tōꞌoku hape ꞌo te kai ōꞌoku i te meꞌe ko māuru-uru era ꞌā e au ki te ꞌAtua?».

31 E te taina, te tano mau: te meꞌe taꞌatoꞌa ena o kōrua mo aŋa, ꞌātā mo kai ꞌe mo unu, e aŋa tahi mo koa o te ꞌAtua ꞌe mo ꞌata moꞌa o te taŋata i a ia. 32 ꞌIna kōrua ko aŋa i te meꞌe mo haka riri i te rua, ka ai he ⸤hūrio⸥, he taꞌe hūrio ꞌo he nuꞌu haka moe i te manaꞌu ꞌi ruŋa i a Ietū. 33 E meꞌe kōrua pē au. Te meꞌe aŋa, paꞌi, ꞌāꞌaku he uꞌi i te rāveꞌa mo haka koa i te taꞌatoꞌa. ꞌIna a au he uꞌi i te meꞌe mo tōꞌoku riva-riva nō, mo te riva-riva takoꞌa o te rua a au e uꞌi nei, mo eꞌa o rāua mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.