1 Kōrinto

He hāpī mo te nuꞌu hāipo-ipo

7 Hora nei he pāhono atu au i te meꞌe pāpaꞌi ꞌui mai era e kōrua. I hau rō atu i te tano mo taꞌe ⸤hāipo-ipo⸥. 2 Te ꞌati nō, ꞌo hara i te hara he moe i te viꞌe i te kenu taꞌe o kōrua, e ai te kōrua viꞌe ꞌe te kōrua kenu. 3 Te nuꞌu hāipo-ipo e moe i te rāua kenu ꞌo i te rāua viꞌe. E ko tano mo taꞌe moe e te kenu i tāꞌana viꞌe ꞌe e te viꞌe i tāꞌana kenu. 4 Te hakari o te viꞌe hāipo-ipo taꞌe ōꞌona nō, o tāꞌana kenu takoꞌa, ꞌe te hakari o te kenu o tāꞌana viꞌe. 5 ꞌO ira, ꞌina e tahi o rāua mo kī ki te rua ꞌina he haŋa mo piri tane, mo taꞌe ai ꞌi raꞌe i haꞌaꞌau ai ararua mo taꞌe piri ꞌi te tētahi mahana mo pure ki te ꞌAtua. Ki oti rā ŋā mahana he piri haka ꞌou, ꞌo taꞌe ravaꞌa rō mo haka noho i te hakari ꞌe he haka hara e Rukifero.

6 Taꞌe e kī atu ꞌā ka tapu kōrua. Tāꞌaku kī: mo haŋa o kōrua mo tapu e tano nō mo aŋa pē ira. 7 ꞌĀhani ꞌō kōrua pē au ꞌā takoꞌa: ꞌina he viꞌe. ꞌE, ka ai atu pē ira, e ꞌite rō ꞌana a au: te ꞌAtua i aŋa ai i te taŋata taꞌe pē tū huru tahi ꞌā: tētahi i aŋa ai mo hāipo-ipo ꞌe tētahi mo taꞌe hāipo-ipo.

He hāpī mo te tētahi nuꞌu

8 He kī atu a au ki te nuꞌu taureꞌa-reꞌa ꞌe ki te nuꞌu hove: i hau rō atu i te tano mo taꞌe hāipo-ipo o kōrua pē au. 9 ꞌE, mo taꞌe ravaꞌa mo haka noho i te meꞌe pohe e te hakari, e hāipo-ipo. I hau rō atu, paꞌi, i te tano mo hāipo-ipo ki te noho pa he taureꞌa-reꞌa pohe nō te aŋa ki te viꞌe ꞌo ki te taŋata.

10 Ki te nuꞌu hāipo-ipo he kī atu a au i te roŋo nei o te tātou Pūꞌoko Haka Tere: ꞌina he viꞌe hāipo-ipo ko haꞌataꞌa mai tāꞌana kenu. 11 ꞌE, mo haꞌataꞌa, ꞌina ko hāipo-ipo haka ꞌou ki te rua taŋata, ꞌo, mo haŋa ōꞌona, he hoki ki tāꞌana kenu. Pē ira takoꞌa ꞌana te kenu, ꞌina ko haꞌataꞌa mai tāꞌana viꞌe.

12 ꞌE ki te tētahi nuꞌu he kī atu a au, pa he meꞌe ꞌāꞌaku, taꞌe pa he vānaŋa o te tātou Pūꞌoko Haka Tere ko Ietū Kiritō: mo ai e tahi taina o roto i a kōrua tāꞌana viꞌe ꞌina he haka moe i tōꞌona manaꞌu ꞌi ruŋa i a Ietū, ꞌe ko te haŋa iŋa ꞌana rā viꞌe mo noho mo oho nō ararua, ꞌina rā taina ko haꞌataꞌa mai rā viꞌe. 13 ꞌE mo ai he viꞌe ko hāipo-ipo ꞌā ki te taŋata ꞌina he haka moe i tōꞌona manaꞌu ꞌi ruŋa i a Ietū, ꞌe ko te haŋa iŋa ꞌana rā taŋata mo noho mo oho nō ararua, ꞌina rā viꞌe ko haꞌataꞌa mai rā taŋata. 14 Te taŋata taꞌe haka moe i tōꞌona manaꞌu ꞌi ruŋa i a Ietū hāipo-ipo ki te viꞌe e haka moe rō ꞌā i te manaꞌu ꞌi ruŋa i a Ietū, he hāpaꞌo takoꞌa e te ꞌAtua ꞌo te ai ko hāipo-ipo ꞌā ki rā viꞌe; ꞌe te viꞌe taꞌe haka moe i tōꞌona manaꞌu ꞌi ruŋa i a Ietū he hāpaꞌo takoꞌa e te ꞌAtua ꞌo te ai ko hāipo-ipo ꞌana ki te taŋata e haka moe rō ꞌana i te manaꞌu ꞌi ruŋa i a Ietū. ꞌE he hāpaꞌo takoꞌa e te ꞌAtua i te rāua ŋā poki pa he ŋā poki ꞌāꞌana ꞌo te ai e tahi o rā ŋā matuꞌa o te ꞌAtua.

15 Te taŋata ꞌe te viꞌe taꞌe ⸤haka moe i te manaꞌu⸥ ꞌi ruŋa i a Ietū taꞌe haŋa mo noho mo oho nō ararua ko tāꞌana viꞌe ꞌo ko tāꞌana kenu haka moe i te manaꞌu ꞌi ruŋa i a Ietū, e haka rē mo oho. Mo topa o te meꞌe nei ki a kōrua ꞌina he ꞌati. Te meꞌe haŋa, paꞌi, o te ꞌAtua, he haumārū ꞌi roto i a kōrua. 16 Ka ai atu pē ira, te tano mau: ꞌina ko haꞌataꞌa mai te viꞌe mai te kenu, koiꞌite hai rā viꞌe ꞌo hai rā kenu haka moe era i te manaꞌu ꞌi ruŋa i a Ietū he eꞌa mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa.

17 Huru kē huru kē te tātou noho iŋa i vaꞌai mai ai e te tātou Pūꞌoko Haka Tere ko Ietū Kiritō: kē mo taureꞌa-reꞌa, kē mo hāipo-ipo, kē mo ꞌekaravo, mo taꞌe ꞌekaravo, mo ⸤hūrio⸥ ꞌe mo taꞌe hūrio. ꞌE tāꞌana meꞌe haŋa: he noho he oho taꞌatoꞌa o tātou pa he hora kī mai era e ia ꞌi roto i te tātou māhatu mo haka moe i te manaꞌu ꞌi ruŋa i a Ietū. Ko te meꞌe nei te meꞌe hāpī e au ꞌi roto i te nūnaꞌa taꞌatoꞌa o te taŋata haka moe i te manaꞌu ꞌi ruŋa i a Ietū.

18 Pē nei te auraꞌa: te kope ko hore ꞌā te kiri o te kinoŋa ꞌi te hora kī e te ꞌAtua mo haka moe i tōꞌona manaꞌu ꞌi ruŋa i a Ietū, ꞌina ko kimi i te rāveꞌa mo naꞌa i rā meꞌe. ꞌE te kope kai hore te kiri o te kinoŋa ꞌi te hora kī e te ꞌAtua mo haka moe i tōꞌona manaꞌu ꞌi ruŋa i a Ietū, ꞌina te kope nei ko uꞌi mo hore i te kiri o tōꞌona kinoŋa. 19 Te meꞌe hauhaꞌa, paꞌi, mo te ꞌAtua, taꞌe he hore ꞌo he taꞌe hore o te kiri o te kinoŋa; he haꞌatura ki tāꞌana roŋo te meꞌe hauhaꞌa. 20 ꞌO ira, e noho e oho a tātou taꞌatoꞌa pa he hora kī mai era e te ꞌAtua ꞌi roto i te tātou māhatu mo haka moe i te manaꞌu ꞌi ruŋa i a Ietū.

21 Mo ai ōꞌou he ꞌekaravo ꞌi te hora haka moe i tuꞌu manaꞌu ꞌi ruŋa i a Ietū, nōatu. ꞌE, mo ai tāꞌue o te rāveꞌa mo eꞌa ōꞌou mai te rima o te taŋata haka aŋa atu, e eꞌa. 22 Te kope, paꞌi, he ꞌekaravo ꞌi te hora haka moe i te manaꞌu ꞌi ruŋa i a Ietū, hora nei, ko eꞌa ꞌana mai te pūai o te hara mo tāvini takoꞌa ki a Ietū, Pūꞌoko Haka Tere o tātou. ꞌE te kope taꞌe he ꞌekaravo ꞌi te hora haka moe i te manaꞌu ꞌi ruŋa i a Ietū, hora nei pa he ꞌekaravo o te ⸤Kiritō⸥. 23 Te ꞌAtua, paꞌi, hai mate iŋa era o tāꞌana Poki ko Ietū Kiritō ꞌi ruŋa i te tātaurō i ꞌauhau ai i a tātou māꞌana. ꞌO ira, ꞌina ko haꞌatiꞌa mo haka riro i a kōrua e te taŋata he ꞌekaravo o rāua. 24 E te taina, e noho e oho nō kōrua ꞌi muꞌa o te ꞌAtua pa he hora kī mau atu era ꞌā e ia ꞌi roto i te kōrua māhatu mo haka moe i te manaꞌu ꞌi ruŋa i a Ietū.

25 ꞌE, te nuꞌu taꞌe hāipo-ipo, ꞌina e tahi ꞌāꞌaku roŋo mo haka ꞌite ki a rāua vaꞌai mai e Ietū, Pūꞌoko Haka Tere o tātou. ꞌE, ka ai atu pē ira, a au pa he taŋata aŋa i tāꞌana meꞌe kī hai riva rahi o te ꞌAtua, he kī atu au i tōꞌoku manaꞌu. 26 Mōꞌoku, ꞌi te taꞌe au o te noho iŋa o te hora nei, i hau rō atu i te riva mo taꞌe hāipo-ipo o kōrua. 27 Te kope ai o tāꞌana viꞌe, ꞌina ko haꞌataꞌa mai muri i a ia. ꞌE mo taꞌe ai o tāꞌana viꞌe, ꞌina ko hāipo-ipo. 28 ꞌE, mo hāipo-ipo, taꞌe e hara ꞌā; ꞌe mo hāipo-ipo te viꞌe taureꞌa-reꞌa e tahi, taꞌe takoꞌa e hara ꞌā. Te meꞌe nō, mo hāipo-ipo he ꞌati taŋata te rāua meꞌe ka ꞌamo era, he meꞌe taꞌe haŋa ꞌāꞌaku mo topa atu ki a kōrua.

He manaꞌu tano mau mo te nuꞌu ⸤kiritiano⸥

29 E te taina, tāꞌaku meꞌe haŋa mo kī atu: hora taꞌe rahi te hora toe o tātou mo aŋa ki te ꞌAtua. ꞌO ira, te nuꞌu hāipo-ipo e haka topa te hora mo aŋa ki te ꞌAtua, ka ai atu he nuꞌu hāipo-ipo a rāua. 30 Pē ira takoꞌa ꞌana te nuꞌu ꞌamo i te ꞌati, te nuꞌu koa ꞌi te rāua noho iŋa, te nuꞌu haꞌaputu i te taoꞌa mo rāua, 31 ꞌe te nuꞌu aŋa oho mo ravaꞌa moni ꞌi te ao nei. Taꞌe hai ŋā meꞌe taꞌatoꞌa nei o te ao ana taꞌe topa te kōrua hora mo aŋa ki te ꞌAtua. Te ŋā meꞌe taꞌatoꞌa nei, paꞌi, e ŋaro tahi rō koia ko te ao.

32 Te meꞌe haŋa ꞌāꞌaku: ꞌina ko ai te meꞌe o te ao nei mo manaꞌu rahi o kōrua. Te taŋata taureꞌa-reꞌa, ꞌi te ai hoko tahi nō, ꞌina e tahi meꞌe taꞌe haꞌatiꞌa i a ia mo aŋa ki te tātou Pūꞌoko Haka Tere, ꞌe, takoꞌa, mo haka koa. 33 ꞌE, te taŋata hāipo-ipo, te meꞌe manaꞌu rahi he meꞌe o te ao nei, ꞌe pē hē a ia ana haka koa i tāꞌana viꞌe. 34 Tōꞌona manaꞌu taꞌe e tahi mau nō he aŋa ki te ꞌAtua. Te viꞌe taureꞌa-reꞌa, ꞌi te ai takoꞌa ōꞌona hoko tahi nō, te meꞌe manaꞌu mau nō he vaꞌai i tōꞌona hakari ꞌe i tōꞌona vārua mo aŋa ki te ꞌAtua. ꞌE te viꞌe hāipo-ipo, he meꞌe o te ao te meꞌe manaꞌu rahi ꞌe pē hē a ia ana haka koa i tāꞌana kenu.

35 Taꞌe a au e kī atu ꞌā ꞌina kōrua ko hāipo-ipo. E kī atu ena a au i te meꞌe nei mo hāꞌūꞌū atu mo aŋa o kōrua i te meꞌe tī-tika ꞌe mo tano o kōrua mo tāvini ki te tātou Pūꞌoko Haka Tere hai manaꞌu mau nō e tahi.

36 Nā ꞌi roto i a kōrua te ŋāŋata ꞌina he aŋi-aŋi he aha te rāua meꞌe tano mo aŋa, ꞌi te meꞌe era ko haꞌamoꞌa-moꞌa era ꞌā i a rāua e te rāua matuꞌa e ŋā poki nō ꞌana. Mo manaꞌu e tahi o te ŋā nuꞌu nei: te meꞌe tano ꞌāꞌana mo aŋa he hāipo-ipo ki te viꞌe haka haꞌamoꞌa-moꞌa era ki a ia, ꞌo aŋa a ia i te meꞌe taꞌe tano ki rā viꞌe, ꞌe rā viꞌe ia ko tano ꞌā tōꞌona matahiti mo hāipo-ipo, e hāipo-ipo; taꞌe e hara ꞌana. 37 ꞌE mo ꞌite e tahi o te nuꞌu nei mo haka noho i te meꞌe pohe o te hakari, ꞌe he manaꞌu: tāꞌana meꞌe tano mo aŋa he taꞌe hāipo-ipo ꞌo te ai ꞌina a ia kai haŋa, ꞌe mo te viꞌe haka haꞌamoꞌa-moꞌa era ki a ia taꞌe he ꞌati te taꞌe hāipo-ipo o rāua, e tano nō ꞌā mo taꞌe hāipo-ipo. 38 Tāꞌaku kī: te taŋata manaꞌu mo hāipo-ipo ki tāꞌana viꞌe haka haꞌamoꞌa-moꞌa, e aŋa ꞌā i te meꞌe riva-riva, ꞌe te kope manaꞌu mo taꞌe hāipo-ipo, ꞌata hau te riva-riva.

39 Te viꞌe hāipo-ipo o tāꞌana kenu ꞌi te hora e ora nō ꞌā. ꞌE, mo mate o rā kenu, e tano nō rā viꞌe mo hāipo-ipo haka ꞌou. Te meꞌe nō, e hāipo-ipo ki te taŋata haka moe takoꞌa i tōꞌona manaꞌu ꞌi ruŋa i a Ietū. 40 Ka ai atu pē ira, ki tōꞌoku manaꞌu, i hau rō atu a ia ꞌi te koa mo taꞌe hāipo-ipo. E manaꞌu rō ꞌana a au: te meꞌe nei he meꞌe i haka manaꞌu mai e te ⸤Vārua Maitai⸥.