Māteo
Meꞌe rahi nō atu matahiti a tuꞌa ki te poreko iŋa o Ietū, o te ꞌariki era ko Tāvita te haka tere i te itaraera. Te nuꞌu nei he manaꞌu nō te aŋa ki a Tāvita pa he ꞌariki hopeꞌa o te riva-riva i ai o rāua, ꞌe he tiaki nō te aŋa ki te hora mo haka tano e te ꞌAtua i tāꞌana hōrea pē nei ē: nā e tuꞌu rō te mahana he haka ꞌariki e ia i te hakaara e tahi o Tāvita, ꞌe māꞌana e haka nui-nui haka ꞌou i a rāua i te itaraera. E kī era ki rā hakaara: he «⸤Mētia⸥» ꞌo he «⸤Kiritō⸥», te auraꞌa: «he ꞌariki haꞌataꞌa e te ꞌAtua».
ꞌI ruŋa i te ꞌevaneria nei, e haka ꞌite ꞌana i te roŋo riva-riva ki te itaraera: ko poreko ꞌana te Mētia (1–2), ꞌe rā Mētia ko Ietū era o Nātāreta, poki o te tāmuta era ko ⸤Kōsē⸥ ararua ko ⸤Māria⸥ (13.55). Te kī ꞌa Māteo: e ꞌite nei a tātou he aŋi mau ꞌana a Ietū he Kiritō era mo oho mai ꞌi te meꞌe era ꞌi ruŋa i a ia i haka tano tahi ai te meꞌe kī era e te ꞌAtua o ruŋa i te Kiritō haka pāpaꞌi era ki a ⸤Mōtē⸥ ꞌe ki te perofeta ꞌi ruŋa i te ⸤Pāpaꞌi Moꞌa⸥.
Te kī takoꞌa ꞌa Māteo: a Ietū taꞌe nō he Kiritō era mo tuꞌu mai, he Maꞌori hāpī hōnui takoꞌa. Hai ꞌaꞌamu haꞌaauraꞌa i hāpī ai a Ietū ki te nuꞌu o ruŋa i te meꞌe hauhaꞌa mo te ꞌAtua. O te rahi raꞌa o te meꞌe hāpī e Ietū, te meꞌe ꞌata pūai he meꞌe hāpī e ia ꞌi ruŋa i te maꞌuŋa (5–7), he hatu iŋa ōꞌona ki tāꞌana ꞌāpōtoro hora uŋa era i a rāua mo haka ꞌite i te roŋo riva-riva o ruŋa i a ia (10), he ŋā ꞌaꞌamu haꞌaauraꞌa era ꞌāꞌana o ruŋa i te ⸤haka tere iŋa ꞌāpī o te ꞌAtua⸥ (13), he haka ꞌite iŋa era ōꞌona o ruŋa i te haka tere iŋa tano mo te nuꞌu hāpī ꞌāꞌana (18), ꞌe he ŋā tātara hopeꞌa era ꞌāꞌana (23–25). Te meꞌe hōhonu mau o te ꞌevaneria nei ꞌa Māteo he vānaŋa pāhono era e Pētero: «A koe he Kiritō, he poki o te ꞌAtua ora» (16.15–16), ꞌi te hora ꞌui era e Ietū ki tāꞌana nuꞌu hāpī: «ki te kōrua kī, ¿ko ai a au?».
E tahi ꞌīŋoa haka ꞌou o Ietū ko ꞌEmanuera. Te auraꞌa o te ꞌīŋoa nei: «he ꞌAtua ꞌi muri i a tātou» (1.23). Ki te kī ꞌa Māteo he aŋi ꞌā te meꞌe nei; a Ietū mau ꞌā, paꞌi, i kī ki tāꞌana nuꞌu hāpī pē nei ē: «ꞌi muri i a kōrua a au paurō te mahana ꞌātā ki te hopeꞌa iŋa o te ao» (28.20).
He nuꞌu mai i a rāua i haka ara mai ai a Ietū
1 Te ŋā ꞌīŋoa nei o te hakaara o Ietū Kiritō, he kope mai i a Tāvita ꞌe mai i a ⸤ꞌAparahama⸥ i haka ara mai ai:
2 A ꞌAparahama he matuꞌa o Itaꞌata,
ꞌe a Itaꞌata o Hākovo,
ꞌe a Hākovo o Hūrā ananake ko tōꞌona taina.
3 A Hūrā he matuꞌa o Pare ꞌe o Tera (te rāua matuꞌa vahine ko Tāmara).
A Pare he matuꞌa o ꞌEterone,
ꞌe a ꞌEterone o ꞌĀrama.
4 A ꞌĀrama he matuꞌa tane o ꞌAminarava,
ꞌe a ꞌAminarava o Nātone,
ꞌe a Nātone o Taramono.
5 A Taramono he matuꞌa o Vō (te matuꞌa vahine ko Rāhava).
A Vō he matuꞌa o ꞌŌveti (te matuꞌa vahine ko Ruti).
A ꞌŌveti he matuꞌa tane o Hētē,
6 ꞌe a Hētē he matuꞌa o te ꞌariki era ko Tāvita.
Te ꞌariki era ko Tāvita he matuꞌa o Toromono (te matuꞌa vahine he viꞌe hāipo-ipo ꞌa ꞌŪria).
7 A Toromono he matuꞌa tane o Rovoama,
ꞌe a Rovoama o ꞌĀvia,
ꞌe a ꞌĀvia o ꞌĀtā.
8 A ꞌĀtā he matuꞌa o Hotafata,
ꞌe a Hotafata o Hōrama,
ꞌe a Hōrama o ꞌŌtia.
9 A ꞌŌtia he matuꞌa tane o Hoatana,
ꞌe a Hoatana o ꞌĀhasa,
ꞌe a ꞌĀhasa o Ēsēkia.
10 A Ēsēkia he matuꞌa o Manatē,
ꞌe a Manatē o ꞌĀmō,
ꞌe a ꞌĀmō o Hōtia.
11 A Hōtia he matuꞌa o Hēkōnia ꞌe o tōꞌona taina, ꞌi te noho iŋa maꞌu era i te itaraera ki ⸤Vāvīrōnia⸥.
12 A Hēkōnia he matuꞌa tane o Taratīere ꞌi te hora ko eꞌa ꞌana e te itaraera mai te rima o te nuꞌu o Vāvīrōnia,
ꞌe a Taratīere o Torovāvere.
13 A Torovāvere he matuꞌa o ꞌAviū,
ꞌe a ꞌAviū o Eriatime,
ꞌe a Eriatime o ꞌĀtoro.
14 A ꞌĀtoro he matuꞌa tane o Tāroko,
ꞌe a Tāroko o ꞌĀkimi,
ꞌe a ꞌĀkimi o ꞌEriū.
15 A ꞌEriū he matuꞌa o ꞌEreatara,
ꞌe a ꞌEreatara o Mātana,
ꞌe a Mātana o Hākovo.
16 A Hākovo he matuꞌa o Kōsē, kenu ꞌa ⸤Māria⸥, matuꞌa vahine o Ietū, kope kī e tātou he ⸤Kiritō⸥.
17 E hoꞌe ꞌahuru mā maha hakaara mai i a ꞌAparahama ki a Tāvita, e hoꞌe ꞌahuru mā maha mai i a Tāvita ki te maꞌu iŋa o te itaraera ki Vāvīrōnia, ꞌe e hoꞌe ꞌahuru mā maha haka ꞌou hakaara mai te noho iŋa ꞌi Vāvīrōnia ki te hora o te Kiritō.
He poreko iŋa o Ietū
18 Pē nei i topa ai te poreko iŋa o Ietū Kiritō: Te matuꞌa vahine ōꞌona ko Māria ko haꞌamoꞌa-moꞌa ꞌana mo hāipo-ipo ararua ko Kōsē. ꞌE kai moe hia ararua pa he kenu pa he viꞌe i ꞌite rō ai a Māria ko hānautama ꞌana a ia i haka tupu e te ⸤Vārua Maitai⸥. 19 ꞌE a Kōsē, ꞌo te ai he taŋata aŋa i te meꞌe tī-tika, kai haŋa mo haka haꞌamā i a Māria. He manaꞌu mo haꞌataꞌa kiva-kiva mai i a ia.
20 Ko manaꞌu ꞌā mo aŋa ꞌi rā meꞌe, i oꞌo rō ai e tahi merahi o te ꞌAtua ꞌi roto i tōꞌona moe vārua he kī: «E Kōsē, hakaara o te ꞌariki ko Tāvita ē, ꞌina koe ko riꞌa-riꞌa mo hāipo-ipo ki a Māria. Te poki ena ꞌāꞌana o te Vārua Maitai i haka tupu. 21 Nā e poreko rō poki tane, ꞌe he nape e koe i te ꞌīŋoa ko Ietū; māꞌana, paꞌi, e haka eꞌa i tōꞌona taŋata mai roto i te ūtuꞌa o te hara».
22 Te meꞌe taꞌatoꞌa nei i topa ai mo haka tano ki te vānaŋa o te ꞌAtua haka ꞌite e te perofeta pē nei ē:
23 «E tahi uka kai moe ꞌā e te taŋata
e tupu rō te poki ꞌe he poreko poki tane.
He nape i te ꞌīŋoa ko ꞌEmanuera».
Te haꞌaauraꞌa o te ꞌīŋoa nei: «He ꞌAtua ꞌi muri i a tātou».
24 I ꞌara era a Kōsē, he aŋa i tū meꞌe kī era e te merahi, he toꞌo i a Māria mo viꞌe ꞌāꞌana. 25 ꞌE kai moe hia ararua pa he kenu pa he viꞌe i poreko rō ai te poki ꞌe he nape e Kōsē i te ꞌīŋoa ko Ietū.