He Aŋa o te ꞌĀpōtoro
ꞌI Kōrinto a Pauro
18 I oti era he eꞌa a Pauro mai ꞌĀtena he oho ki Kōrinto. 2 ꞌI ira i māhani ai ki te taŋata ⸤hūrio⸥ te ꞌīŋoa ko ꞌĀkira o te kona ko Ponotō, tuꞌu iho mai ꞌĪtāria ararua ko tāꞌana viꞌe ko Pirisira. Mai ira a rāua i oho mai ai ꞌo te kī e te ꞌariki ko Karaurio mo eꞌa o te hūrio taꞌatoꞌa mai Roma. He oho ia a Pauro he uꞌi. 3 ꞌI te meꞌe era te aŋa ꞌa Pauro pa he aŋa ꞌā o rā nuꞌu, he aŋa karapā, he noho ꞌi muri mo aŋa ananake.
4 Paurō te ⸤mahana haka ora⸥ e oho era a Pauro ki te ⸤hare pure hūrio⸥. ꞌI ira e vānaŋa ꞌe e tātake era ananake ko te nuꞌu hūrio ꞌe taꞌe hūrio, he haŋa mo aŋi-aŋi e rā nuꞌu he parautiꞌa tāꞌana meꞌe hāpī o ruŋa i a Ietū.
5 I tuꞌu era a Tira ararua ko Timoteo mai Mātērōnia, he noho mau rō ꞌai a Pauro he haka ꞌite i te ⸤roŋo riva-riva o te ꞌAtua⸥ ꞌe he haka aŋi-aŋi ki te hūrio o Kōrinto: a Ietū he ⸤Kiritō⸥. 6 He haꞌamata rā nuꞌu he riri ꞌe he vā-vā i a Pauro. He tū-tū ia a Pauro i te puŋaꞌehu mai ruŋa i tōꞌona kahu mo haka ꞌite ki rā nuꞌu: taꞌe ōꞌona te hape mo haka ūtuꞌa i a rāua e te ꞌAtua, o rāua ꞌā. ꞌE he kī: mai rā hora pe muꞌa he oho a ia ki te nuꞌu taꞌe he hūrio.
7 He eꞌa ia a Pauro mai roto i te hare pure, he oho ki te hare o te taŋata taꞌe he hūrio te ꞌīŋoa ko Titio Huto, taŋata haꞌamuri ki te ꞌAtua, tōꞌona hare ꞌi muri i rā hare pure. 8 A Kīripo, pūꞌoko haka tere o te hare pure nei, kai roa, he ⸤haka moe i te manaꞌu⸥ ꞌi ruŋa i a Ietū ananake ko te nuꞌu taꞌatoꞌa o tōꞌona hare. ꞌE meꞌe rahi nuꞌu haka ꞌou o Kōrinto ŋaroꞌa i te roŋo riva-riva o te ꞌAtua he haka moe takoꞌa i te rāua manaꞌu ꞌi ruŋa i a Ietū, ꞌe he haka ⸤papatito⸥ i a rāua.
9 ꞌI te pō e tahi he kī e te ꞌAtua ki a Pauro ꞌi roto i te meꞌe haka takeꞌa e te ꞌAtua: «ꞌIna koe ko riꞌa-riꞌa ꞌe ꞌina koe ko mou. Ka haka ꞌite ka oho nō tāꞌaku roŋo. 10 ꞌĪ, paꞌi, a au ꞌi muri i a koe, ꞌe ꞌina e tahi kope mo tōtōā atu. Nuꞌu rahi, paꞌi, te nuꞌu o nei i haꞌataꞌa e au māꞌaku». 11 ꞌO ira a Pauro i noho ai e tahi matahiti ꞌe te ꞌafa ꞌi Kōrinto e hāpī e oho ꞌā i te roŋo riva-riva o te ꞌAtua ki te nuꞌu o ira.
12 ꞌI te hora ko Karione te suerekao o Ākāia, he ꞌa-ꞌaru i a Pauro e te nuꞌu hūrio taꞌe haka moe i te manaꞌu ꞌi ruŋa i a Ietū ꞌe he maꞌu ki te hare ture pa he meꞌe haꞌaꞌau e rāua. 13 He kī ki a Karione:
—Te kope nei e hāpī e oho ꞌana ki te taŋata mo haꞌamuri ki te ꞌAtua hai oho iŋa taꞌe tano ki te mātou haka tere iŋa.
14 Ka oho a Pauro mo vānaŋa ka kī e tū suerekao era ki te hūrio:
—ꞌĀhani te kōrua ture o ruŋa o te meꞌe taꞌe tano ꞌe o ruŋa o te meꞌe rake-rake aŋa e ia, ko haka roŋo atu ꞌā a au. 15 I ai ena he meꞌe o te haka tere iŋa o kōrua, o ruŋa o te vānaŋa ꞌe o te ꞌīŋoa, ka haka tī-tika e kōrua ꞌā. ꞌIna a au e ko ture i te kōrua meꞌe.
16 ꞌE he tū-tute e Karione i tū nuꞌu era mai roto i te hare ture. 17 He ꞌa-ꞌaru ia e te nuꞌu taka-taka o haho o rā kona i a Tōtene, he pūꞌoko haka tere e tahi o te hare pure hūrio, he tiŋaꞌi ki te piꞌi-piꞌi ꞌi muꞌa o tū hare ture mau era ꞌā, ꞌe kai tapa atu e te suerekao.
He hoki iŋa o Pauro ki Antiokia o Tīria
18 Ka ai atu pē ira, i noho nō a Pauro meꞌe rahi haka ꞌou atu mahana ꞌi Kōrinto. I tano era te mahana mo oho ōꞌona mai ira, he ꞌaroha ki te nuꞌu taina, ꞌe he oho ananake ko kuā ꞌĀkira ki Tenekerea mo eke ki ruŋa i te pahī mo oho ki Tīria. ꞌI ira i haka varu ai a Pauro i tōꞌona pūꞌoko ka māreŋo rō mo haka ꞌite ko oti ꞌā tāꞌana hōrea aŋa ki te ꞌAtua, ꞌai ka eke iho ki ruŋa i te pahī.
19 I tuꞌu era ki Ēfeto ꞌi tū ara era ki Tīria, he haka rē e Pauro i a Pirisira ararua ko ꞌĀkira ꞌi ira. ꞌE, ꞌi raꞌe ki tōꞌona reva haka ꞌou, he oho he vānaŋa ananake ko te nuꞌu hūrio ꞌi roto i te rāua hare pure. 20 He ani e rā nuꞌu mo ꞌata noho o Pauro ꞌe ꞌina kai haŋa. 21 He ꞌaroha he kī ki rā nuꞌu: «Mo haŋa o te ꞌAtua, e hoki haka ꞌou rō mai a au».
I oti era he eke ki ruŋa i te pahī he oho mai Ēfeto. 22 I tomo era te pahī ki Tētārea, he oho a Pauro ki Hērutarema mo ꞌaroha ki te nūnaꞌa taŋata o ira haka moe i te manaꞌu ꞌi ruŋa i a Ietū, ꞌe mai ira i oho ai ki Antiokia.
He eꞌa he oho haka ꞌou a Pauro mo haka haŋu i te nuꞌu taina
23 I oti era te noho ꞌi ira meꞌe rahi mahana, he eꞌa haka ꞌou he oho ki kona era ki kona era o Karatia ꞌe o Firihia, e haka haŋu e oho era i te nuꞌu taina taꞌatoꞌa o rā ŋā kona mo haka moe mo oho i te rāua manaꞌu ꞌi ruŋa i a Ietū.
He tātara iŋa o ꞌĀporo ꞌi Ēfeto
24 ꞌI rā ŋā mahana, he tuꞌu ki Ēfeto te taŋata hūrio e tahi te ꞌīŋoa ko ꞌĀporo o te kona ko Arehantāria. Te taŋata nei ko ꞌite riva-riva ꞌā mo vānaŋa ꞌe ko ꞌite riva-riva ꞌana i te meꞌe o ruŋa ꞌi te ⸤Pāpaꞌi Moꞌa⸥. 25 Ko hāpī ꞌā o ruŋa o te ara o te ꞌAtua. E vānaŋa era hai māhatu ꞌe hai tī-tika o ruŋa i a Ietū, ka ai atu tāꞌana meꞌe ꞌite ko te meꞌe hāpī nō era e ⸤Iovani⸥ hora papatito era i te taŋata.
26 He haꞌamata ia he vānaŋa a ꞌĀporo hai pūai ꞌi roto i te hare pure hūrio. He ŋaroꞌa ia e Pirisira ararua ko ꞌĀkira. I oti era tāꞌana tātara, he toꞌo a te tapa ꞌe he ꞌata haka aŋi-aŋi e kuā Pirisira o ruŋa i te ara o te ꞌAtua.
27 I haŋa era a ꞌĀporo mo oho ki Ākāia, he hāꞌūꞌū e te nuꞌu taina hai pāpaꞌi ki te nuꞌu haka moe i te manaꞌu ꞌi ruŋa i a Ietū o rā kona mo hāpaꞌo riva-riva. I tuꞌu era a ꞌĀporo ki Ākāia, hai hāpī ꞌāꞌana i ꞌata haka haŋu ai i te nuꞌu ko haka moe era ꞌana, hai riva rahi o te ꞌAtua, i te rāua manaꞌu ꞌi ruŋa i a Ietū. 28 ꞌI muꞌa i te nuꞌu taꞌatoꞌa, e haka ꞌite e oho era a ꞌĀporo i te hape o te meꞌe kī e te hūrio, ꞌe hai meꞌe pāpaꞌi ꞌi ruŋa i te Pāpaꞌi Moꞌa e haka takeꞌa era: he parautiꞌa a Ietū he Kiritō.