He Aŋa o te ꞌĀpōtoro
23 He uꞌi riva-riva ia a Pauro a ruŋa i tū nuꞌu era ꞌe he kī:
—E kuā taina ē, ki ꞌaŋarīnā he uꞌi nō tāꞌaku aŋa mo tano o tōꞌoku noho iŋa ki te mata o te ꞌAtua, ꞌe ki tōꞌoku manaꞌu, ꞌina a au kai hape.
2 He kī ia e te ⸤oromatuꞌa hopeꞌa o te ra-rahi⸥ ko ꞌĀnānia ki te nuꞌu hāhine ki a Pauro mo haka eke hai rima ki te ŋutu. 3 He kī e Pauro:
—¡He ꞌōꞌotu koe ꞌi te ꞌAtua, e te taŋata riva a te haho ē! Mo ai a koe e noho mai ena ꞌi te kona ena mo ture mai hai haka tere iŋa o te hūrio, ¿he aha ia koe i haka poteko ai i nā haka tere iŋa hai kī ōꞌou mo puꞌa mai i a au?
4 He pohi e te nuꞌu o tū kona era:
—¿Pē nā koe e vānaŋa ena ki te oromatuꞌa hopeꞌa o te ra-rahi?
5 He kī e Pauro:
—E te taina, ꞌina a au kai ꞌite: a ia ꞌō he oromatuꞌa hopeꞌa o te ra-rahi; nā, paꞌi, e kī rō ꞌana ꞌi ruŋa i te ⸤Pāpaꞌi Moꞌa⸥: «ꞌIna koe ko kī i te vānaŋa taꞌe tano mo te taŋata ko ia te pūꞌoko haka tere o te kōrua henua».
6 I aŋi-aŋi era e Pauro: ꞌi roto i tū nuꞌu ra-rahi era te nuꞌu ⸤saruseo⸥ ꞌe te nuꞌu ⸤fariseo⸥, he kī haka ꞌou i haka pūai i te reꞌo:
—E te taina, he fariseo a au, pa he oho iŋa o tōꞌoku tupuna. Te māroa atu ōꞌoku ꞌi muꞌa o kōrua ꞌi ꞌaŋarīnā ꞌo te ai he parautiꞌa mau ꞌā mōꞌoku te ꞌAtua e haka ora rō i te taŋata mai te mate pe muꞌa ka oho ena.
7 I kī era a Pauro i te meꞌe nei, he haꞌamata te saruseo ananake ko te fariseo he tātake ki a rāua ꞌā, ꞌe he topa kē-kē rō ꞌai te manaꞌu o tū nuꞌu taꞌatoꞌa era. 8 Te kī o te saruseo: ꞌina he taŋata he ora haka ꞌou mai te mate, ꞌina he meꞌe he merahi, ꞌe ꞌina takoꞌa te meꞌe he vārua; ꞌe te kī o te fariseo: e ai tahi rō ꞌā te ŋā meꞌe nei. 9 Taꞌatoꞌa e pōŋeha era. He māroa ia te tētahi ⸤maꞌori o te haka tere hūrio⸥, he fariseo, he kī: «Te taŋata nei ꞌina kai aŋa e tahi meꞌe rake-rake; o te vārua ꞌo o te merahi pēaha i vānaŋa ki a ia».
10 I ꞌata pūai era te ture, he riꞌa-riꞌa te kōmana ꞌo tiŋaꞌi e te nuꞌu i a Pauro ki te piꞌi-piꞌi. ꞌO ira i kī ai ki te vaꞌehau mo toꞌo i a Pauro ꞌe mo maꞌu haka ꞌou ki tū kona hare era o rāua.
11 ꞌI te pō o rā mahana, he haka takeꞌa a Ietū i a ia ki a Pauro ꞌe he kī: «Ka haka hio-hio koe. Pa he mataꞌite iŋa ena ꞌā ōꞌou i a au ꞌi nei ꞌi Hērutarema, pē ira takoꞌa ꞌana koe ka mataꞌite ena o ruŋa i a au ꞌi Roma».
He haꞌaꞌau iŋa mo tiŋaꞌi i a Pauro
12 ꞌI te rua mahana he haꞌaꞌau te tētahi ⸤hūrio⸥ mo tiŋaꞌi mo haka mate i a Pauro, ꞌe he hōrea mo taꞌe kai ꞌe mo taꞌe unu haka ꞌou o rāua ꞌātā ka ravaꞌa rō mo tiŋaꞌi. 13 E maha ꞌahuru tūmaꞌa taŋata i hōrea ai. 14 He oho ia mo vānaŋa ki te nuꞌu oromatuꞌa ra-rahi ꞌe ki te nuꞌu pūꞌoko haka tere o te hūrio ꞌe he kī:
—Ko hōrea ꞌā a mātou mo taꞌe kai haka ꞌou e tahi meꞌe ꞌātā ka tiŋaꞌi rō e mātou i a Pauro. 15 Hora ena, ka kī e kōrua e te nuꞌu i a rāua te kī iŋa hopeꞌa o te haka tere hūrio, ki te kōmana mo maꞌu mai āpō i a Pauro ki muꞌa o kōrua; te ꞌōtohe mo uꞌi mo haka tī-tika riva-riva i te ture. Ki hāhine mai ki nei, he tiŋaꞌi e mātou ꞌi te ara.
16 He ŋaroꞌa tū vānaŋa era e te poki o te viꞌe taina o Pauro, he oho ki te kona noho o te vaꞌehau he hāꞌaki ki a Pauro. 17 He raŋi ia e Pauro ki te kape e tahi o te vaꞌehau he kī:
—Ka maꞌu koe i te poki ena ki te kōmana; nā e ai rō ꞌā tāꞌana meꞌe mo kī.
18 He maꞌu ia e tū kape era i rā poki ki te kōmana ꞌe he kī:
—O te taŋata puru era te ꞌīŋoa ko Pauro i kī mai mo maꞌu mai ōꞌoku i te poki nei; nā e ai rō ꞌana tāꞌana meꞌe mo kī atu.
19 He ꞌa-ꞌaru ia i te rima o tū poki era e te kōmana, he maꞌu a te tapa, he ꞌui:
—¿He aha taꞌa meꞌe mo kī mai?
20 He kī e tū poki era:
—Ko haꞌaꞌau ꞌana te nuꞌu hūrio mo kī atu ki a koe mo maꞌu haka ꞌou ōꞌou āpō i a Pauro ki muꞌa i te ⸤nūnaꞌa taŋata i a rāua te kī iŋa hopeꞌa o te haka tere hūrio⸥, hai ꞌōtohe mo uꞌi mo haka tī-tika riva-riva i te ture. 21 ꞌIna koe ko haka roŋo. E maha ꞌahuru tūmaꞌa taŋata o rāua e piko mai era ko hōrea ꞌana mo taꞌe kai ꞌe mo taꞌe unu ꞌātā ka ravaꞌa ka tiŋaꞌi ka haka mate rō e rāua i a Pauro, ꞌe ꞌai e tiaki era; te meꞌe toe nō he ꞌē-ē ōꞌou.
22 He haka oho i tū poki era e te kōmana, he kī mo taꞌe vānaŋa ki te nuꞌu o ruŋa o tū meꞌe ꞌaꞌamu era ki a ia.
He haka maꞌu iŋa i a Pauro ki te suerekao
23 He raŋi ia e te kōmana ki te kape e rua o te vaꞌehau, ꞌe he uŋa mo haka riva-riva e piti hānere vaꞌehau a raro ꞌā, e hitu ꞌahuru a ruŋa i te hoi ꞌe e piti hānere haka ꞌou e maꞌu-maꞌu rō ꞌana i te ransa, mo oho ꞌi te hora iva o te pō ki Tētārea. 24 I uŋa i haka riva-riva takoꞌa rō hai hoi mo eke o Pauro, ꞌe he kī mo maꞌu ki te suerekao ko Fēriki ꞌe mo hāpaꞌo ꞌo topa ki a ia e tahi ꞌati. 25 I haka maꞌu takoꞌa rō e tahi parau ki a Fēriki e hāꞌaki rō ꞌā pē nei ē:
26 «ꞌA Karaurio Rītia mo te suerekao ko Fēriki: ꞌIorana.
27 »Te taŋata ena ko ꞌa-ꞌaru ꞌana e te hūrio mo tiŋaꞌi mo haka mate. I ꞌite era a au he rōmano, he oho a au ananake ko te nuꞌu vaꞌehau ꞌāꞌaku he toꞌo mai mai i a rāua. 28 ꞌI te haŋa ōꞌoku mo ꞌite he aha te tumu o te rāua ture, he maꞌu e au ki muꞌa o te nūnaꞌa taŋata i a rāua te kī iŋa hopeꞌa o te haka tere hūrio. 29 Te ture mōꞌona o ruŋa o te rāua haka tere iŋa. ꞌIna he hape i ravaꞌa ki tano ai mo haka ūtuꞌa hai mate, ꞌe korohaŋa mo puru ꞌi roto i te hare maꞌuꞌaurī. 30 I haka maꞌu atu ena e au ꞌo te ꞌite ōꞌoku ko haꞌaꞌau ꞌā te hūrio mo tiŋaꞌi mo haka mate i a ia, ꞌe, ko kī ꞌā a au ki te nuꞌu o rāua i haka tumu i te ture mo horo atu ki a koe».
31 Pē ira te vaꞌehau i maꞌu ai i a Pauro ꞌi te pō ki Anatipatari, pe he meꞌe kī era mo aŋa. 32 ꞌI te rua mahana, he hoki tū ŋā vaꞌehau oho era a raro ꞌā ki te kona noho o rāua ꞌi Hērutarema. ꞌE o te vaꞌehau oho ꞌi ruŋa i te hoi i maꞌu i a Pauro ki Tētārea.
33 I tuꞌu era he vaꞌai i tū parau era ki te suerekao ꞌe he vaꞌai takoꞌa i a Pauro. 34 I oti era te taiꞌo i rā parau, he ꞌui e te suerekao o kona hē a Pauro. I ꞌite era o Tiritia, 35 he kī: «Ki tuꞌu mai te nuꞌu horo i a koe, ka haka roŋo ena a au i te rāua ture mōꞌou».
He kī ia mo puru i a Pauro ꞌi roto i te hare aŋa e ⸤ꞌErore⸥ ꞌe mo ꞌauario.