Karatia

Te parau nei ꞌa Pauro mo te nuꞌu ⸤haka moe i te manaꞌu⸥ ꞌi ruŋa i a Ietū o te kona taꞌatoꞌa o Karatia. E vānaŋa ꞌana o ruŋa o te eꞌa iŋa o te ⸤kiritiano⸥ mai te pūai o te hara ꞌe o te haka rē iŋa i te manaꞌu pē nei ē: hai haꞌatura ki te ⸤haka tere iŋa ꞌa Mōtē⸥ he tano ki te mata o te ꞌAtua.

I haka ꞌite ai a Pauro i te parau ꞌāpī riva-riva o ruŋa i a Ietū Kiritō ꞌi te kona taꞌatoꞌa o Karatia ꞌi te rua ara oho ōꞌona haka ꞌite ki te nuꞌu i te roŋo o te ꞌAtua (Aŋa o te ꞌĀpōtoro 16.6). Meꞌe rahi nō atu nuꞌu o Karatia i haka moe i te rāua manaꞌu ꞌi ruŋa i a Ietū, ꞌe i toꞌo mo pūꞌoko haka tere o rāua. Te meꞌe nō, i tuꞌu rō ki rā ŋā kona te tētahi atu nuꞌu kī he kiritiano a rāua ꞌe he hāpī ki te taina o rā ŋā kona pē nei ē: mo tano ki te mata o te ꞌAtua, e ꞌāmui ki te haka moe iŋa o te manaꞌu ꞌi ruŋa i a Ietū te haꞌatura ki te haka tere iŋa ꞌa Mōtē (1.6–9). He ture e Pauro ꞌo te haka tapa mai te hāpī parautiꞌa hāpī e ia (3.1–5).

He haka aŋi-aŋi e Pauro ki te taina o Karatia pē hē te haka tere iŋa tano o te taŋata haka moe i te manaꞌu ꞌi ruŋa i a Ietū hai ꞌaꞌamu ꞌiti-ꞌiti o ruŋa i te hōrea aŋa e te ꞌAtua ki a ⸤ꞌAparahama⸥, ꞌe pē hē a ꞌAparahama i haka moe ai i tōꞌona manaꞌu ꞌi ruŋa i te ꞌAtua. I oti era he haka ꞌite e Pauro: te haka tere iŋa ꞌa Mōtē taꞌe he meꞌe rake-rake, he meꞌe riva-riva. Ka ai atu pē ira, i vaꞌai mai ai e te ꞌAtua i rā haka tere iŋa taꞌe mo haka tano i a tātou ki tōꞌona mata, mo te meꞌe kē (3.21): mo maꞌori hāpī haka tika i te tātou manaꞌu ki a Ietū mo haka moe o tātou i te manaꞌu ꞌi ruŋa i a ia (3.24). Te kī ꞌa Pauro: mo te ꞌAtua, a tātou, te nuꞌu taꞌatoꞌa ꞌa Ietū Kiritō, pē tū hauhaꞌa tahi ꞌā, ka viꞌe ka taŋata, ka ⸤hūrio⸥ ka ⸤kirieko⸥, ka ꞌekaravo ꞌo ka taꞌe ꞌekaravo (3.28), ꞌe te haka tere iŋa era ꞌa Mōtē taꞌe toe he meꞌe haꞌataꞌa i a tātou.

Te kī takoꞌa ꞌa Pauro: te taꞌe ai haka ꞌou o tātou he ꞌekaravo o te haka tere iŋa era ꞌa Mōtē taꞌe he ꞌōtohe mo aŋa i te meꞌe taꞌe tano pohe nō e te hakari (5.13). Te meꞌe mo aŋa he haka rē i a tātou mo haka tere e te ⸤Vārua Maitai⸥. Ki oti he haka aŋi-aŋi mai e Pauro i te huru o te kiritiano parautiꞌa (5.22–24), ꞌe he kī mai: te tātou noho iŋa ꞌāpī nei o te Vārua Maitai i vaꞌai mai. ꞌO ira, ki haka rē i a tātou māꞌana e haka tika mai (5.25).

He ꞌaroha

1 A au, a Pauro, haꞌataꞌa mo te aŋa he ꞌāpōtoro, tōroꞌa taꞌe o te taŋata i vaꞌai mai, ꞌa Ietū Kiritō, ꞌe o te ꞌAtua Matuꞌa haka ora i a ia mai te mate, 2 he ꞌaroha atu mātou ananake ko te taina taꞌatoꞌa o nei ki a kōrua ki te nuꞌu taꞌatoꞌa ⸤haka moe i te manaꞌu⸥ ꞌi ruŋa i a Ietū o Karatia. 3 Ka ai ꞌi ruŋa i a kōrua te riva rahi ꞌe te haumārū o te ꞌAtua Matuꞌa ꞌe o Ietū Kiritō, he Pūꞌoko Haka Tere o tātou.

4 A Ietū i vaꞌai ai i a ia mo mate mo haka kore e te ꞌAtua i te tātou hara ꞌe mo haka eꞌa i a tātou mai roto i te noho iŋa taꞌe tano o te ao, ꞌi te meꞌe era ko haŋa ꞌā e te ꞌAtua, Matuꞌa o tātou. 5 ¡Ki haꞌahana-hana tātou ki a ia ꞌātā ki te hopeꞌa raꞌa! ⸤ꞌĀmene⸥.

He māere iŋa o Pauro ꞌi te nuꞌu o Karatia

6 Ko māere riva-riva ꞌana a au ꞌi te hōrou o kōrua mo hārui hai tuaꞌivi i te ꞌAtua ꞌe i tāꞌana hāpī parautiꞌa. O te ꞌAtua, paꞌi, i haꞌataꞌa i a kōrua māꞌana hai riva rahi mau nō o te ⸤Kiritō⸥, mo eꞌa o kōrua mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. ꞌE nā kōrua e haka roŋo mai ena ki te hāpī kē manaꞌu e kōrua he ⸤roŋo riva-riva o te ꞌAtua⸥. 7 ꞌE te parautiꞌa, ꞌina he rua roŋo riva-riva o te ꞌAtua. Te meꞌe nō, e ai rō ꞌana te nuꞌu nā e haka mira-mira ꞌana i te kōrua manaꞌu. E haŋa ꞌā mo haka poteko i te ⸤roŋo riva-riva o ruŋa i a Ietū⸥. 8 ꞌĪ a au he kī atu: ka ai atu ko mātou mau nei ꞌā ꞌo he merahi e tahi o te raŋi hāpī atu i te rua meꞌe, taꞌe he roŋo riva-riva hāpī atu era e mātou ꞌi muꞌa ꞌā, ka topa ꞌi ruŋa te ūtuꞌa o te ꞌAtua. 9 Ko kī atu era ꞌā e mātou i te meꞌe nei ꞌe ꞌī e au he kī haka ꞌou atu: mo ai o te kope haka ꞌite atu i te rua roŋo, taꞌe he roŋo riva-riva hāpī atu era e mātou, ka topa ꞌi ruŋa i a ia te ūtuꞌa o te ꞌAtua.

Mai i a Ietū i ꞌite ai a Pauro i te roŋo o te ꞌAtua

10 Ki te kōrua manaꞌu, ¿e aŋa nei a au mo koa o te taŋata ꞌo mo koa o te ꞌAtua? ꞌĀhani mo koa o te taŋata, taꞌe ia a au he tāvini o te Kiritō.

11 E ꞌite kōrua, e te taina ē: te roŋo riva-riva o te ꞌAtua haka ꞌite e au taꞌe he meꞌe poreko mai te manaꞌu taŋata. 12 ꞌE taꞌe o te taŋata i hāpī mai; a Ietū Kiritō mau ꞌā i haka ꞌite mai.

13 Ko ŋaroꞌa ꞌana e kōrua o ruŋa i tāꞌaku meꞌe aŋa ꞌi muꞌa ꞌā, pē hē a au e tute era mo tōtōā i te nuꞌu haka moe i te manaꞌu ꞌi ruŋa i a Ietū hora era ōꞌoku e maꞌu nō ꞌana i te haka tere iŋa hūrio. Te manaꞌu ōꞌoku ꞌi rā hora mo haka kore i a rāua. 14 ꞌI rā noho iŋa, i hau rō atu a au ꞌi te haka kē ki te tētahi nuꞌu o tōꞌoku taŋa mo maꞌu i te hāpī haka rē mai e te mātou tupuna. 15 ꞌE, ka ai atu i tute rō a au mo tōtōā i te nuꞌu haka moe i te manaꞌu ꞌi ruŋa i a Ietū, te ꞌAtua, kai poreko hia ꞌana a au, i haꞌataꞌa rō ai i a au māꞌana ꞌe, hai riva rahi ōꞌona, i haka ꞌite mai ai ko ai a Ietū, mo haka moe ōꞌoku i te manaꞌu ꞌi ruŋa i a ia. Te haŋa ōꞌona: mo haka ꞌite mo oho ōꞌoku i te roŋo riva-riva o ruŋa i a Ietū ki te nuꞌu taꞌe he hūrio. Hora topa mai era o te meꞌe nei, ꞌina a au kai oho kai kimi e tahi kope mo haka ꞌite mai o ruŋa i te roŋo o te ꞌAtua, 16 — 17 ꞌe ꞌina takoꞌa a au kai oho ki Hērutarema kai ꞌui ki te nuꞌu era ko rāua te ꞌāpōtoro raꞌe ki a au. Te meꞌe raꞌe ꞌāꞌaku i aŋa, he oho a au ki te henua era ko Aravia, ꞌe i tano era tōꞌoku hora ꞌi ira, he eꞌa a au he hoki ki Rāmako.

He māhani iŋa o Pauro ki a Pētero

18 Ka toru matahiti mai te hora haka moe ōꞌoku i te manaꞌu ꞌi ruŋa i a Ietū i oho iho ai a au ki Hērutarema mo māhani ki a Pētero, ꞌe e hoꞌe ꞌahuru mā pae mahana i noho ai a au ꞌi muri i a ia. 19 ꞌIna he rua ꞌāpōtoro i takeꞌa e au; te kope haka ꞌou nō ꞌāꞌaku i māhani ko Tanatiako, taina o Ietū. 20 ꞌE ꞌī a au he kī atu ꞌi muꞌa i te ꞌAtua: te meꞌe taꞌatoꞌa nei e au e pāpaꞌi atu ena he parautiꞌa.

21 Mai ira a au i oho ai ki te ŋā kona era o Tīria ꞌe o Tiritia. 22 Te taina haka moe i te manaꞌu ꞌi ruŋa i a Ietū o Hūrea kai takeꞌa hia ꞌana i a au. 23 Te meꞌe nō o rāua i ŋaroꞌa o ruŋa i a au: «Te kope tute era i a tātou mo tōtōā hora nei e haka ꞌite e oho ꞌā i te roŋo riva-riva o te ꞌAtua, roŋo haŋa era e ia mo haka kore ꞌi muꞌa ꞌā». 24 ꞌE ꞌi te parau ꞌāpī era o ruŋa i a au, i haꞌahana-hana ai rā nuꞌu ki te ꞌAtua.