1 Tētārōnika

ꞌI te rua ara oho haka ꞌite o Pauro i te roŋo o te ꞌAtua i tuꞌu ai ki Tētārōnika, kona hopeꞌa o te nui-nui o Mātērōnia. He haka ꞌite ki te nuꞌu o ira i te parau ꞌāpī riva-riva o ruŋa i a Ietū. I ŋaroꞌa era e te nuꞌu nei, he toꞌo hai koa i te hāpī nei ꞌe he ⸤haka moe i te manaꞌu⸥ ꞌi ruŋa i a Ietū. Pē ira i poreko ai te nūnaꞌa taina o te kona nei ko Tētārōnika (Aŋa o te ꞌĀpōtoro 17.1–9). Ko ꞌāvaꞌe atu ꞌā he manaꞌu a Pauro mo hoki mo uꞌi i te taina ⸤kiritiano⸥ o ira (1.2–4). ꞌI te taꞌe ravaꞌa i te hora mo oho he uŋa i a Timoteo. I hoki era a Timoteo e maꞌu rō ꞌana i te parau ꞌāpī o ruŋa i rā ŋā taina, he manaꞌu a Pauro mo pāpaꞌi i te parau nei.

ꞌI te haꞌamata iŋa he ꞌaroha a Pauro koia ko māuru-uru ki te ꞌAtua mo te ŋā taina nei o Tētārōnika. Hai rāua, paꞌi, i ꞌite i oho ai o ruŋa i a Ietū a te meꞌe rahi nō atu kona o ira (1.8). He māuru-uru a Pauro ꞌo te toꞌo o te ŋā taina nei o Tētārōnika i te roŋo o ruŋa i a Ietū pa he meꞌe o te ꞌAtua, ꞌe taꞌe ꞌō pa he meꞌe o te taŋata (2.13). ꞌI te ꞌite ia e Pauro pē nei ē: te noho iŋa o te taina o Tētārōnika noho iŋa tano ki te mata o te ꞌAtua, he haka pūai he oho e Pauro i te rāua manaꞌu, ꞌe he kī he aha he aha te rāua meꞌe mo aŋa ki noho ki oho nō ai a rāua pē ira (4.1–12). Te meꞌe haka nui-nui e Pauro ꞌi ruŋa i te parau nei he koa iŋa ōꞌona ꞌo te takeꞌa i te pūai o te ⸤roŋo riva-riva o ruŋa i a Ietū⸥ i te taina o Tētārōnika, ka ai atu e rahi rō ꞌā te ꞌati topa ꞌi ruŋa i a rāua.

Te nuꞌu taꞌatoꞌa kiritiano o Tētārōnika ko ꞌite riva-riva ꞌana: a Ietū i mate rō ꞌe i ora haka ꞌou rō mai te mate, ꞌe e tiaki ꞌana ki tōꞌona hoki iŋa mai. He haka haŋu e Pauro i te nuꞌu nei mo haka noho mo oho nō i te rāua manaꞌu ꞌi ruŋa i a Ietū ꞌātā ki tōꞌona hoki iŋa mai. ꞌE he haka manaꞌu e Pauro pē nei ē: ꞌina e tahi nuꞌu i ꞌite a hē ka hoki mai a Ietū. Ka tuꞌu mai ena, paꞌi, ꞌi te mahana ꞌina e tahi taŋata i ꞌite, pa he tuꞌu iŋa o te toke-toke ꞌi te pō (5.2). ꞌO ira i hatu ai e Pauro ki te nuꞌu o Tētārōnika mo ꞌara o te mata ꞌe mo noho ꞌi te ara tano haŋa e te ꞌAtua, ꞌe taꞌe ꞌō pa he tētahi nuꞌu taꞌe manaꞌu ki te hoki iŋa mai o te ⸤Kiritō⸥ (5.6).

He ꞌaroha ia a Pauro ki te nuꞌu o Tētārōnika koia ko kī pē nei ē: «ꞌI te taꞌatoꞌa nō hora, e koa ꞌe e pure kōrua» (5.16–17).

He ꞌaroha

1 A au, a Pauro, a Tirivano ꞌe a Timoteo he ꞌaroha atu ki a kōrua ki te nuꞌu taꞌatoꞌa o Tētārōnika haꞌamuri ki te ꞌAtua Matuꞌa ꞌe ki te Pūꞌoko Haka Tere ko Ietū Kiritō. Ka ai ꞌi ruŋa i a kōrua te riva rahi ꞌe te haumārū o te ꞌAtua.

He māuru-uru

2 He māuru-uru nō te mātou aŋa ki te ꞌAtua mo kōrua ꞌe, ꞌi roto i te mātou pure, e no-noꞌi takoꞌa rō ꞌā mo kōrua. 3 E māuru-uru nei ꞌi te meꞌe era he manaꞌu nō te mātou aŋa pē hē kōrua e aŋa ena ki te ꞌAtua, ꞌo te ⸤haka moe i te manaꞌu⸥ ꞌi ruŋa i a Ietū, pē hē e hāꞌūꞌū ena ki te rua, ꞌo te rahi o te kōrua haŋa mo rāua, ꞌe pē hē e haꞌaoromaꞌi ena hai pūai ꞌi te hora o te ꞌati, ꞌo te ai e tiaki e oho rō ꞌā kōrua ki te hoki iŋa mai o te tātou Pūꞌoko Haka Tere ko Ietū Kiritō. 4 Ko ꞌite ꞌana e mātou, e kuā taina haŋa o te ꞌAtua ē, ko haꞌataꞌa ꞌana kōrua e te ꞌAtua māꞌana. 5 I haka ꞌite atu era, paꞌi, mātou i te ⸤roŋo riva-riva o ruŋa i a Ietū Kiritō⸥, he haka moe rō ꞌai kōrua i te manaꞌu ꞌi ruŋa i a ia, ꞌe taꞌe nō ꞌo te ŋaroꞌa e kōrua i te mātou vānaŋa, ꞌo te takeꞌa takoꞌa, hai meꞌe aŋa e mātou hai pūai o te ⸤Vārua Maitai⸥, te pūai o te ꞌAtua ꞌi ruŋa i a mātou, ꞌe ꞌo te ꞌite e kōrua: mo mātou te meꞌe vānaŋa atu era he parautiꞌa mau ꞌā, he takeꞌa e kōrua pē hē mātou e noho era ꞌi roto i a kōrua mo hāꞌūꞌū atu.

6 ꞌE a kōrua ko haka tano ꞌana i te kōrua noho iŋa pa he noho iŋa ꞌana o mātou, ꞌe pa he noho iŋa takoꞌa o te tātou Pūꞌoko Haka Tere ko Ietū Kiritō. ꞌE, ka ai atu e topa rō atu ꞌana te ꞌati ꞌi ruŋa i a kōrua, i toꞌo nō kōrua i te roŋo nei mo kōrua hai koa vaꞌai atu e te Vārua Maitai. 7 Pē ira te kōrua noho iŋa i ai ai he meꞌe mo aŋi-aŋi pē hē te noho iŋa tano ki te mata o te ꞌAtua mo te nuꞌu taꞌatoꞌa haka moe i te manaꞌu ꞌi ruŋa i a Ietū o te ŋā kona era o Mātērōnia ꞌe o Ākāia. 8 Hai kōrua te roŋo riva-riva o ruŋa i a Ietū Kiritō i ꞌite i oho ai a te kona taꞌatoꞌa o Mātērōnia ꞌe o Ākāia, ꞌe taꞌe nō a te ŋā kona nei, a te kona taꞌatoꞌa. Te nuꞌu o te ŋā kona nei e ꞌite rō ꞌana pē nei ē: e haka moe rō ꞌana kōrua i te manaꞌu ꞌi ruŋa i te ꞌAtua. ¿Mo aha ia a mātou ana vānaŋa haka ꞌou o ruŋa i a kōrua ki a rāua? Taꞌe he parau ꞌāpī mo te nuꞌu era. 9 Kona nō era, paꞌi, o mātou e tuꞌu era, e ꞌaꞌamu rō ꞌā te nuꞌu he aha te meꞌe i topa ki a kōrua hora tuꞌu atu era o mātou, pē hē kōrua i hārui ai hai tuaꞌivi i te ꞌītoro mo haꞌamuri mau nō ki te ꞌAtua ora ꞌe parautiꞌa. 10 ꞌE e ꞌaꞌamu takoꞌa rō ꞌana rā nuꞌu pē hē kōrua e tiaki ena ki te hoki iŋa mai mai te raŋi o tāꞌana Poki ko Ietū, kope haka ora e te ꞌAtua mai te mate, ꞌe kope haka eꞌa i a tātou mai te ūtuꞌa taparahi-taꞌata, ūtuꞌa nā e tuꞌu rō mai.