1 Pētero

Te nuꞌu haka moe raꞌe era i te manaꞌu ꞌi ruŋa i a Ietū o Itaraera i tute rō mo tōtōā e te nuꞌu taꞌe ⸤haka moe i te manaꞌu⸥ ꞌi ruŋa i a ia. ꞌO ira e noho era e maraŋa rō ꞌana ꞌi te tētahi atu henua haka tere e te rōmano. Ki te nuꞌu maraŋa ki Ponotō, ki Karatia, ki Kāpārōtia, ki ꞌĀtia ꞌe ki Vītīnia i pāpaꞌi ai te ꞌāpōtoro era ko Pētero i te parau nei (1.1).

Meꞌe rahi te ꞌati i ꞌamo e te nuꞌu nei ꞌi te rāua kona noho ꞌo te ai o rāua ꞌa Ietū Kiritō. ꞌO ira, ꞌi ruŋa i te parau nei, he haka pūai e Pētero i te manaꞌu ꞌe he hatu mo haꞌahana-hana mo oho nō ki te ꞌAtua, kope vaꞌai mai «i te ora ꞌe i te noho iŋa ꞌāpī, he rahi o tōꞌona haka ꞌaroha mo tātou» (1.3). He hatu takoꞌa e Pētero pē nei ē: te meꞌe mo takeꞌa ꞌi ruŋa i a rāua ꞌo te ai i a rāua te noho iŋa ꞌāpī nei he haka tapa iŋa mai roto i te hara (1.15–16), ꞌe he koa, ka ai atu e topa rō ꞌana ꞌi ruŋa i a rāua te ꞌati (1.6–9). Te ⸤kiritiano⸥ taꞌatoꞌa, paꞌi, he huaꞌai o te ꞌAtua ꞌe he ⸤oromatuꞌa⸥ aŋa ki a ia (2.9).

Te meꞌe vānaŋa rahi ꞌi ruŋa i te parau nei: pē hē te noho iŋa tano mo te nuꞌu kiritiano. Ki te kī ꞌa Pētero: te nuꞌu kiritiano e haꞌatura ki te nuꞌu ra-rahi ꞌe ki te nuꞌu pūꞌoko haka tere o te henua ꞌo te ai he meꞌe haŋa e te tātou Pūꞌoko Haka Tere ko Ietū Kiritō (2.13–15).

ꞌE ki te kī takoꞌa ꞌa Pētero: te paꞌo iŋa o te ao nā ko hāhine mai ꞌana (4.7). ꞌO ira, e haŋa te taina ki te rua, e toꞌo e hāpaꞌo i te nuꞌu kiritiano tuꞌu atu ki te hare, ꞌe e koa ꞌo te topa atu o te ꞌati ꞌo te ai ōꞌou ꞌa Ietū Kiritō (4.8–9, 12–16).

He ꞌaroha

1 A au, a Pētero, ⸤ꞌāpōtoro⸥ ꞌa Ietū Kiritō, he ꞌaroha atu ki a kōrua ki te nuꞌu taꞌatoꞌa haꞌataꞌa e te ꞌAtua māꞌana noho ꞌi te henua kē, taꞌe ꞌi te rāua henua mau era, ꞌi te ŋā kona era ko Ponotō, ko Karatia, ko Kāpārōtia, ko ꞌĀtia ꞌe ko Vītīnia. 2 Te manaꞌu o te ꞌAtua Matuꞌa i haꞌataꞌa ai i a kōrua: mo haka riro i a kōrua he nuꞌu ꞌina e tahi hara haꞌataꞌa māꞌana hai Vārua Maitai ꞌe haꞌatura ki a Ietū ꞌi te haka kore e te ꞌAtua i te kōrua hara hai toto tehe era o Ietū ꞌi ruŋa i te tātaurō. Ka rahi ka oho nō te riva rahi ꞌe te haumārū o te ꞌAtua ꞌi ruŋa i a kōrua.

He haꞌahana-hana ki te ꞌAtua

3 Ki haꞌahana-hana tātou i te ꞌAtua, Matuꞌa o te tātou Pūꞌoko Haka Tere ko Ietū Kiritō. A ia, paꞌi, ko vaꞌai mai ꞌana i te ora ꞌe i te noho iŋa ꞌāpī, he rahi o tōꞌona haka ꞌaroha mo tātou. ꞌE, ꞌi te ai ko haka ora ꞌana e ia i a Ietū mai te mate, e ꞌite nei a tātou e haka ora takoꞌa rō mai i a tātou mai te mate pe muꞌa ka oho ena, 4 ꞌe e vaꞌai rō mai i te meꞌe hāpaꞌo mo tātou ꞌi ruŋa i te raŋi, he meꞌe e ko kore, e ko tāpau ꞌe e ko mae-mae ki te hora hopeꞌa. 5 ꞌO te haka moe o tātou i te manaꞌu ꞌi ruŋa i a Ietū, te ꞌAtua e hāpaꞌo e oho mai ena i a tātou hai pūai nui-nui ōꞌona, ki ravaꞌa ai e tātou, ꞌi te mahana hopeꞌa, i te ora ꞌina he hopeꞌa raꞌa hāpaꞌo mo tātou. 6 ꞌO ira a tātou e koa nei, ka ai atu e ꞌamo rō ꞌā a tātou, mo te hora ꞌiti-ꞌiti, rauhuru atu ꞌati.

7 Te ꞌAtua, paꞌi, e haꞌatiꞌa rō ꞌā mo topa mai o te ꞌati mo ꞌite hoki te haka moe iŋa nei o tātou i te manaꞌu ꞌi ruŋa i a Ietū e hio-hio rō ꞌā ꞌo ꞌina, pa he piru e tunu ena ꞌi roto i te ahi. ꞌE mo te ꞌAtua te haka moe iŋa o tātou i te manaꞌu ꞌi ruŋa i a Ietū i hau rō atu i te hauhaꞌa ki te piru, he meꞌe e ŋaro nō. Mo hio-hio mo oho nō o te tātou manaꞌu ꞌi ruŋa i a Ietū ka ai atu e rahi rō ꞌā te ꞌati topa mai, ꞌi te hora o te hoki iŋa mai o Ietū Kiritō, he koa te ꞌAtua ꞌe he haka paka he haka nui-nui i a tātou.

8 A kōrua e haŋa rō ꞌana ki a Ietū Kiritō ka ai atu kai takeꞌa hia i a ia. ꞌE ꞌi te hora nei, ka ai atu ꞌina he takeꞌa, e haka moe rō ꞌana kōrua i te manaꞌu ꞌi ruŋa i a ia, ꞌe e rahi rō ꞌana te kōrua koa, he koa ꞌina he vānaŋa mo haꞌaauraꞌa. 9 Ko ravaꞌa ꞌana, paꞌi, e kōrua i te meꞌe haŋa mo ravaꞌa hai haka moe o kōrua i te manaꞌu ꞌi ruŋa i a Ietū: he eꞌa mai roto i te ūtuꞌa o te hara ꞌe he ravaꞌa i te ora ꞌāpī ꞌina he hopeꞌa raꞌa.

10 Te perofeta o muꞌa ꞌā i haka ꞌite rō ki te taŋata i te roŋo haka vānaŋa e te ꞌAtua o ruŋa i te haka eꞌa iŋa i te taŋata mai roto i te ūtuꞌa o te hara hai riva rahi ōꞌona ꞌe, ꞌi te taꞌe aŋi-aŋi e te perofeta i nei roŋo, he rara he oho o ruŋa. 11 Te meꞌe o rāua i haŋa mo aŋi-aŋi o rā roŋo: a hē ꞌe pē hē ka tano te meꞌe kī era ki a rāua e te Vārua o te ⸤Kiritō⸥ pē nei ē: e topa rō te ꞌati ꞌi ruŋa i te Kiritō ꞌe ki oti he haka nui-nui. 12 ꞌE te ꞌAtua i haka ꞌite rō ki rā ŋā perofeta pē nei ē: te roŋo haka ꞌite oho era e rāua he meꞌe mo topa pe muꞌa ka oho era, te auraꞌa, ꞌi te noho iŋa nei o tātou, ꞌe taꞌe ꞌō ꞌi te rāua noho iŋa era. ꞌE ko rā roŋo te meꞌe i haka ꞌite atu ki a kōrua e te nuꞌu haka ꞌite oho i te roŋo riva-riva nei o ruŋa i a Ietū hai pūai o te ⸤Vārua Maitai⸥ uŋa mai mai te raŋi. ꞌE ꞌātā te merahi e haŋa rō ꞌana mo aŋi-aŋi o ruŋa i te roŋo nei o te haka eꞌa iŋa o te taŋata mai roto i te ūtuꞌa o te hara.

Te noho iŋa tano mo te nuꞌu ⸤kiritiano⸥

13 E te taina, e ꞌara te kōrua mata ꞌe e ꞌite i te hāito i te kōrua meꞌe kī ꞌe i te kōrua meꞌe aŋa. E haka hio-hio te kōrua manaꞌu ꞌi ruŋa i te meꞌe o te ꞌAtua ka vaꞌai atu ena hai riva rahi ōꞌona ꞌi te hora o te hoki iŋa mai o Ietū Kiritō.

14 Pa he ŋā poki haꞌatura ki te ꞌAtua, ꞌina ko haka tano haka ꞌou te kōrua noho iŋa ki te meꞌe taꞌe tano haka tere atu i a kōrua ꞌi muꞌa ꞌā, ꞌi te hora kai ꞌite ꞌana o ruŋa i te ꞌAtua. 15 Te tī-tika mau: e noho kōrua ꞌina e tahi hape ꞌi te meꞌe era te ꞌAtua haꞌataꞌa era i a kōrua māꞌana ꞌina e tahi ōꞌona hape. 16 Pē nei e kī ena ꞌi ruŋa i te ⸤Pāpaꞌi Moꞌa⸥: «E ai kōrua he nuꞌu ꞌina e tahi hape, pē au ꞌā».

17 A kōrua e kī rō ꞌana: te ꞌAtua he Matuꞌa o kōrua. ꞌO ira, e moꞌa ꞌe e haꞌatura ki a ia ꞌi te taꞌatoꞌa nō hora o te noho iŋa ꞌi te ao nei. ꞌĀꞌana, paꞌi, te kī i te tano ꞌe i te taꞌe tano o te taŋata hai huru o te rāua meꞌe aŋa, ꞌe mōꞌona te taŋata pē tū huru tahi ꞌā. 18 Te ꞌAtua ko toꞌo ꞌana i a kōrua mai roto i te noho iŋa hauhaꞌa kore ravaꞌa e kōrua mai te kōrua tupuna. ꞌE ko ꞌite riva-riva ꞌana e kōrua: taꞌe hai meꞌe pa he piru, meꞌe tōꞌona hauhaꞌa mo te ao nō nei, i ꞌauhau ai mo toꞌo i a kōrua mai te noho iŋa nei, 19 hai toto hauhaꞌa era o te Kiritō, kope pa he māmoe mo tūtia ꞌina e tahi ōꞌona hape, i toꞌo ai i a kōrua.

20 ꞌI te hora kai aŋa hia ꞌā i te ao, i haꞌataꞌa rō ai e te ꞌAtua i te Kiritō mo te meꞌe nei; ꞌe ꞌi te ŋā hora hopeꞌa nei, i tuꞌu mai ai mo te riva-riva o kōrua. 21 Hai Kiritō kōrua e haka moe ena i te manaꞌu ꞌi ruŋa i te ꞌAtua. ꞌE, ꞌo te haka ora e te ꞌAtua i te Kiritō mai te mate ꞌe ꞌo te haka nui-nui, e taꞌe haka tapa ena te kōrua manaꞌu mai ruŋa i te ꞌAtua ꞌe e ꞌite ena e kōrua e aŋa tahi rō e ia i tāꞌana meꞌe hōrea era.

ꞌE nei vānaŋa he ⸤roŋo riva-riva o ruŋa i a Ietū Kiritō⸥ haka ꞌite atu ki a kōrua.