2 Kōrinto

13 He toru ara nei ōꞌoku ka oho atu ena uꞌi i a kōrua. ꞌIna ko rehu: mo ai tāꞌue o te tātake ꞌi roto i a kōrua i te taina mo haka tī-tika ka tuꞌu atu ena a au, e ai e rua ꞌo e toru mataꞌite, pa he meꞌe kī ꞌi ruŋa i te ⸤Pāpaꞌi Moꞌa⸥. 2 ꞌI tōꞌoku rua oho iŋa atu era, i kī rō au ki te nuꞌu o roto i a kōrua noho ꞌi roto i te hara ꞌe ki te taꞌatoꞌa pē nei ē: e uꞌi e eꞌa mai roto i te meꞌe taꞌe tano ꞌo haka ūtuꞌa. ꞌE hora nei, ꞌi raꞌe ki tōꞌoku tuꞌu iŋa haka ꞌou atu, he haka ꞌite atu a au: ka tuꞌu atu ena a au, ꞌina a au e ko taꞌe haka ūtuꞌa i te nuꞌu ko te noho iŋa ꞌana ꞌi roto i te hara. 3 Pē ira ka ꞌite ena e kōrua: hai parau mau ꞌā o te ⸤Kiritō⸥ a au e vānaŋa atu ena. A ia, paꞌi, kope taꞌe haka rehe-rehe i a ia ꞌi te hora haka tī-tika i a kōrua; kope haka takeꞌa i tōꞌona pūai ꞌi roto i a kōrua. 4 Ka ai atu i tuꞌu rō a ia pa he kope ꞌina e tahi pūai hora veo era ꞌi ruŋa i te tātaurō, hora nei, hai pūai o te ꞌAtua Matuꞌa e ora ena. Pē ira ꞌana a mātou. E tuꞌu rō ꞌana pa he nuꞌu pūai kore, ꞌe, ꞌi te ai o mātou o te ꞌAtua, hai pūai ōꞌona mātou e ora nei mo tāvini atu ki a kōrua.

5 E uꞌi kōrua hoki e haka moe parautiꞌa mau rō ꞌana kōrua i te manaꞌu ꞌi ruŋa i a Ietū. Mo ŋaroꞌa e kōrua nā a Ietū Kiritō ꞌi roto i a kōrua, e haka moe parautiꞌa rō ꞌā ia kōrua i te manaꞌu ꞌi ruŋa i a ia ꞌe, takoꞌa, e tano rō ꞌana kōrua ki te mata o te ꞌAtua. 6 ꞌE, pē hiva ꞌā, ana aŋi-aŋi kōrua: a mātou e tano rō ꞌā ki te mata o te ꞌAtua, ꞌe he ⸤ꞌāpōtoro⸥ parautiꞌa ꞌāꞌana. 7 E ani rō ꞌana a mātou ki te ꞌAtua ꞌo aŋa a kōrua i te meꞌe taꞌe tano. Te tumu o mātou e ani nei mo aŋa o kōrua i te meꞌe riva-riva taꞌe ꞌō pē nei ē: mo takeꞌa e te nuꞌu e tano rō ꞌana ꞌō te mātou aŋa pa he ꞌāpōtoro. E ani nei mo aŋa o kōrua i te meꞌe riva-riva ka ai atu mo te nuꞌu taꞌe a mātou he ꞌāpōtoro parautiꞌa o te Kiritō. 8 Mo haꞌatura o kōrua ki te meꞌe parautiꞌa, ꞌina e tahi mātou meꞌe mo ture atu pa he ꞌāpōtoro. Te meꞌe mau nō mo aŋa he hāꞌūꞌū atu. 9 He koa a mātou mo pūai o kōrua ꞌi te ara parautiꞌa o te ꞌAtua ka ai atu e ai rō ꞌana te nuꞌu manaꞌu ꞌina mātou pūai pa he ꞌāpōtoro. ꞌE he pure he oho a mātou mo kōrua mo tuꞌu ki te roa ena ꞌina e tahi hape.

10 E pāpaꞌi atu ena a au i te parau nei ꞌi raꞌe ki tōꞌoku oho iŋa atu, ꞌo ai, hora ena ōꞌoku ka tuꞌu atu ena, he haka ūtuꞌa atu au i a kōrua hai parau vaꞌai mai e te tātou Pūꞌoko Haka Tere, parau vaꞌai mai mo haka pūai i te nuꞌu haka moe i te manaꞌu ꞌi ruŋa i a ia, taꞌe ꞌō mo haꞌataꞌa i a rāua mai muri i a ia.

11 Mo haka mao atu, e kuā taina ē, e koa kōrua ꞌe e noho ꞌina e tahi hape. E haka haŋu kōrua i a kōrua ꞌā, e ai kōrua e tahi mau nō manaꞌu ꞌe e noho ꞌi roto i te haumārū. Pē ira te ꞌAtua, vaꞌai i te haŋa ꞌe i te haumārū, ka haꞌamaitai ena i a kōrua. 12 E ꞌaroha kōrua ki a kōrua ꞌā hai haŋa. Te taina taꞌatoꞌa ⸤haka moe i te manaꞌu⸥ ꞌi ruŋa i a Ietū ꞌī e ꞌaroha atu ena.

13 Ka ai ꞌi ruŋa i a kōrua te haŋa o te ꞌAtua ꞌe te riva rahi o te tātou Pūꞌoko Haka Tere ko Ietū Kiritō ꞌi te hora taꞌatoꞌa. ꞌE ka hokorua ka oho nō atu i a kōrua taꞌatoꞌa e te ⸤Vārua Maitai⸥.

14 —.