Meꞌe Haka Takeꞌa
22 He haka takeꞌa mai ia e tū merahi era i te rio maꞌitaki e tahi mai ira e eꞌa era te vai vaꞌai i te ora ꞌāpī ꞌina he hopeꞌa raꞌa. Rā vai pa he hiꞌo ꞌā te māꞌeha, ꞌe mai te kona pepe noho ꞌariki o te ꞌAtua ꞌe o te Māmoe e eꞌa era. 2 Te vai nei a te vāeŋa o te ara nui-nui o rā kona e tehe era. ꞌE ꞌi te tapa o rā rio e tupu rō ꞌā te tumu vaꞌai i te ora. E hua era paurō te ꞌāvaꞌe, te auraꞌa, e hoꞌe ꞌahuru mā piti ꞌāvaꞌe e hua era ꞌi roto i te matahiti, ꞌe te raupā o rā tumu he rāꞌau.
3 ꞌIna e tahi meꞌe taꞌe tano ki te mata o te ꞌAtua mo oꞌo ki te ao ꞌāpī nei. Te pepe noho ꞌariki o te ꞌAtua ꞌe o te Māmoe ꞌi Hērutarema ꞌāpī nei e noho ena, ꞌe te rāua tāvini ki a rāua e haꞌamuri ena. 4 He takeꞌa e te nuꞌu nei i te ꞌāriŋa o te ꞌAtua, ꞌe ꞌi ruŋa i te rāua tira ka maꞌu era i tōꞌona ꞌīŋoa. 5 ꞌIna he pō rā kona. ¿Mo aha atu ꞌā te hakariꞌi ꞌe te raꞌā o rā nuꞌu? O te ꞌAtua, paꞌi, he Pūꞌoko Haka Tere, te haka māꞌeha i a rāua, ꞌe ananake ka haka tere ena ꞌātā ki te hopeꞌa raꞌa.
Ko hāhine ꞌā te hoki iŋa mai o Ietū
6 He kī mai e te merahi: «Te meꞌe haka takeꞌa ꞌe haka ꞌite atu era he parautiꞌa ꞌe e ko taꞌe haka tano. O te Pūꞌoko Haka Tere mau ꞌā, he ꞌAtua, kope haka ꞌite ki te perofeta i te rāua meꞌe mo haka ꞌite, i uŋa i tāꞌana merahi mo haka takeꞌa ki tōꞌona tāvini i te meꞌe e ko roa ka topa rō ena».
7 He ŋaroꞌa ia e au i a Ietū e kī ꞌana:
«¡E ko roa hia a au ka tuꞌu atu ena! ¡Ko te koa i te nuꞌu haꞌatura ki te roŋo o ruŋa i te meꞌe mo topa pe muꞌa ka oho ena hāꞌaki ꞌi ruŋa i te puka nei!».
8 I takeꞌa rō ꞌe i ŋaroꞌa rō e au e ⸤Iovani⸥ i te ŋā meꞌe taꞌatoꞌa nei. I takeꞌa era ꞌe i ŋaroꞌa era e au, he tū-turi a au a te vaꞌe o te merahi haka takeꞌa mai era i rā ŋā meꞌe, mo haꞌamuri ki a ia. 9 ꞌE he kī mai e rā merahi: «ꞌIna koe ko aŋa i te meꞌe ena; ki te ꞌAtua koe ana haꞌamuri. He tāvini nō, paꞌi, a au o te ꞌAtua pē koe ꞌana, ꞌe pa he ŋā taina ena ōꞌou he perofeta, ꞌe pa he nuꞌu taꞌatoꞌa haka roŋo i te meꞌe pāpaꞌi o ruŋa i te puka nei».
10 ꞌE he kī takoꞌa mai: «ꞌIna koe ko naꞌa i te vānaŋa haka ꞌite atu o ruŋa i te meꞌe mo topa pe muꞌa ka oho ena. Ko hāhine ꞌana, paꞌi, te hora mo haka tano tahi. 11 Ki tano rā hora, e haka rē kōrua i te nuꞌu aŋa i te meꞌe taꞌe tano mo aŋa mo oho nō i te rāua meꞌe taꞌe tano, ꞌe te nuꞌu aŋa i te meꞌe hano-hano mo aŋa mo oho nō i te rāua meꞌe hano-hano. ꞌE te nuꞌu aŋa i te meꞌe tano ki te mata o te ꞌAtua, ka aŋa ka oho nō i te rāua meꞌe tano, ꞌe te nuꞌu taꞌe hara ka noho nō rāua pē ira».
12 He kī haka ꞌou ia e Ietū:
«He aŋi ꞌā, e ko roa hia au ka tuꞌu atu ena. E maꞌu rō atu a au i te meꞌe mo vaꞌai mo haka koa o te nuꞌu, tano ki te rāua meꞌe i aŋa. 13 A au he Haꞌamata ꞌe he Hopeꞌa.
14 »Ko te koa i te nuꞌu tata i te rāua kahu, te auraꞌa, te nuꞌu haka rē mo haka kore e te ꞌAtua i te rāua hara, ki tano ai mo oꞌo ki roto ꞌi te kona moꞌa era ko Hērutarema ꞌāpī ꞌe mo kai mai ruŋa i te tumu vaꞌai i te ora ꞌāpī ꞌina he hopeꞌa raꞌa. 15 ꞌE te nuꞌu aŋa i te meꞌe taꞌe tano hano-hano, te nuꞌu aŋa i te tahu-tahu, te nuꞌu moe i te viꞌe i te taŋata taꞌe he viꞌe he kenu o rāua, te nuꞌu tiŋaꞌi haka mate i te rua, te nuꞌu haꞌamuri ki te ꞌītoro, ꞌe te nuꞌu taꞌatoꞌa te rāua meꞌe aŋa mau nō he reo-reo ꞌi haho ka noho ena.
16 »A au, a Ietū, ko uŋa atu ꞌā i tāꞌaku merahi mo haka ꞌite i te meꞌe taꞌatoꞌa nei ki te ŋā nūnaꞌa taŋata haka moe ena i te manaꞌu ꞌi ruŋa i a au. He hakaara a au o ⸤Tāvita⸥, ꞌe he hetuꞌu pura-pura ꞌi te pōꞌā».
17 Te ⸤Vārua Maitai⸥ ꞌe te viꞌe hāipo-ipo o te Māmoe pē nei e kī ena: «¡Ka oho mai!».
ꞌE te kope ŋaroꞌa i te meꞌe nei, ka kī: «¡Ka oho mai!».
ꞌE te kope pohe ki te vai ꞌe haŋa mo unu, ka oho mai ka unu i te vai taꞌe e ꞌauhau vaꞌai i te ora ꞌāpī ꞌina he hopeꞌa raꞌa.
18 Ki te nuꞌu taꞌatoꞌa ŋaroꞌa i te roŋo nei o ruŋa i te meꞌe mo topa pe muꞌa ka oho ena pāpaꞌi ꞌi ruŋa i te puka nei he kī atu a au: Mo ꞌāmui o te kope e tahi i te meꞌe haka ꞌou ki te ŋā meꞌe nei, he ꞌāmui takoꞌa e te ꞌAtua, ki tōꞌona ūtuꞌa, i te ꞌati hāꞌaki ꞌi ruŋa i te puka nei. 19 ꞌE mo haka kore e tahi kope e tahi parehe o te roŋo nei o ruŋa i te meꞌe mo topa pe muꞌa ka oho ena pāpaꞌi ꞌi ruŋa i te puka nei, e ko haka rē e te ꞌAtua mo toꞌo i tāꞌana o te meꞌe hua mai ruŋa i te tumu vaꞌai i te ora ꞌāpī ꞌina he hopeꞌa raꞌa ꞌe mo noho ōꞌona ꞌi te kona moꞌa haka ꞌite ꞌi ruŋa i te puka nei.
20 Te kope haka ꞌite he parautiꞌa te ŋā meꞌe nei e kī rō ꞌā: «He aŋi ꞌā, e ko roa hia a au ka tuꞌu atu ena».
ꞌE te kī ꞌāꞌaku: «¡Ka ai pē ira! ¡Ka oho mai koe, e Ietū ē, e te mātou Pūꞌoko Haka Tere ē!».
21 Ka ai ꞌi ruŋa i a kōrua taꞌatoꞌa te riva rahi o te tātou Pūꞌoko Haka Tere ko Ietū Kiritō.