1 Iovani
Te kope ꞌāꞌana i pāpaꞌi i te parau nei kai haka ꞌite mai ko ai tōꞌona ꞌīŋoa. ꞌE, ka ai atu pē ira, meꞌe rahi te meꞌe o te puka nei tuꞌu pa he ꞌevaneria ena ꞌa ⸤Iovani⸥. ꞌO ira te nuꞌu ⸤kiritiano⸥ e kī ena: ꞌa Iovani te puka nei i pāpaꞌi. Te meꞌe haka ꞌite mai ꞌi ruŋa nei: te ꞌAtua he mōrī (1.5), ꞌe he haŋa (4.8), ꞌe e haka takeꞌa rō mai ꞌana i tōꞌona haŋa hai Ietū Kiritō, Poki ꞌāꞌana (4.9). Te kope pāpaꞌi era i te parau nei e haka aŋi-aŋi rō mai ꞌā: te kope haŋa ki te ꞌAtua ꞌe ki a Ietū, e haŋa takoꞌa ki te taina (4.11–12), ꞌe te kope haka moe i te manaꞌu ꞌi ruŋa i a Ietū, e noho ꞌi roto i te mōrī (1.7), ꞌina ko hara ꞌe ꞌina ko reo-reo (2.3–6).
Mo te kope pāpaꞌi i te puka nei, he parautiꞌa mau ꞌā a Ietū Kiritō he Vānaŋa vaꞌai i te ora, ꞌe nei Vānaŋa ko ai era ꞌana ꞌi raꞌe ki te aŋa i te ao (1.1–4). Te meꞌe haka pūai mai e te kope nei: e hāpaꞌo tātou e te nuꞌu maꞌori reo-reo kī: a Ietū Kiritō kai tuꞌu mai ki te ao nei pa he taŋata (4.2). Ka ai atu pē ira, ko ꞌite ꞌana e ia e aŋi-aŋi nō e te nuꞌu haka moe parautiꞌa i te manaꞌu ꞌi ruŋa i a Ietū i te maꞌori reo-reo ꞌe i te maꞌori taꞌe reo-reo; te kope nō era, paꞌi, mo kī i te vānaŋa tuꞌu pē rā, ꞌina he Vārua o te ꞌAtua ꞌi roto i a ia (4.3).
ꞌI ruŋa i te parau nei e haka haŋu mai ena mo haka moe mo oho nō i te manaꞌu ꞌi ruŋa i a Ietū. ꞌE e haka aŋi-aŋi mai ena ki te nuꞌu ⸤kiritiano⸥ parautiꞌa: i a rāua te ora ꞌāpī ꞌina he hopeꞌa raꞌa hai vānaŋa nei: Te ꞌAtua «ko vaꞌai mai ꞌana... ki a tātou i te ora ꞌāpī ꞌina he hopeꞌa raꞌa, ꞌe nei ora ꞌi tāꞌana Poki. Te kope i a ia te Poki o te ꞌAtua, i a ia te ora ꞌāpī nei, ꞌe te kope ꞌina he Poki o te ꞌAtua i a ia, ꞌina he ora ꞌāpī i a ia» (5.11–12).
I te Vānaŋa te ora ꞌāpī ꞌina he hopeꞌa raꞌa
1 ꞌĪ a au he pāpaꞌi atu o ruŋa i te Vānaŋa i a ia te ora ꞌāpī ꞌina he hopeꞌa raꞌa. A ia ko ai era ꞌā ꞌi raꞌe ki te haꞌamata iŋa o te ao, ꞌe, ka ai atu pē ira, i takeꞌa rō ꞌe i ŋaroꞌa rō e mātou i a ia. He aŋi ꞌā, ko takeꞌa ꞌā ꞌe ko haka puā ꞌā e mātou. 2 Te kope nei i a ia te ora ꞌāpī ꞌina he hopeꞌa raꞌa i haka takeꞌa rō i a ia ki te taŋata. I takeꞌa rō e mātou ꞌe he mataꞌite mātou ōꞌona. ꞌO ira e haka ꞌite atu ena o ruŋa i a ia. ꞌI muri i te ꞌAtua Matuꞌa a ia, ꞌe i haka takeꞌa rō mai ki a mātou. 3 E haka ꞌite atu ena o ruŋa i tū kope takeꞌa ꞌe ŋaroꞌa era e mātou, mo ravaꞌa takoꞌa e kōrua i te ora ꞌāpī nei i a mātou, he ora i te ꞌAtua Matuꞌa ꞌe i tāꞌana Poki ko Ietū Kiritō, 4 mo ko-koa tahi o tātou ꞌo te haka moe takoꞌa o kōrua i te manaꞌu ꞌi ruŋa i a ia.
He eꞌa iŋa mai roto i te hara
5 Te roŋo hāpī mai era e Ietū Kiritō ꞌe e haka ꞌite atu ena e mātou: te ꞌAtua he Mōrī ꞌe ꞌina he meꞌe pōꞌuri ꞌi ruŋa i a ia. 6 Mo kī o tātou: i a tātou te ora ꞌāpī o te ꞌAtua, ꞌe te parautiꞌa mau ꞌi roto i te pōꞌuri a tātou e noho nei, e reo-reo ꞌana a tātou, ꞌe te noho iŋa o tātou ꞌina he tano ki te roŋo parautiꞌa o te ꞌAtua. 7 ꞌE mo noho o tātou ꞌi roto i te mōrī, pa he oho iŋa o te ꞌAtua, i a tātou te ora ꞌāpī o te ꞌAtua, ꞌe te toto o tāꞌana poki ena ko Ietū e haka kore rō ꞌana i te tātou hara.
8 Mo kī o tātou ꞌina a tātou he hara, e reo-reo ꞌana a tātou ki a tātou ꞌā, ꞌe ꞌina kai aŋi-aŋi i te roŋo parautiꞌa o te ꞌAtua. 9 ꞌE mo kī o tātou ki te ꞌAtua i te tātou hara, he haka kore e ia, ꞌe he haka maꞌitaki i te meꞌe taꞌatoꞌa taꞌe tano o roto i te tātou māhatu, ꞌi te ai ōꞌona he ꞌAtua aŋa i te meꞌe tī-tika ꞌe haka tano i tāꞌana meꞌe kī. 10 ꞌE mo kī o tātou ꞌina a tātou kai hara, e kī ꞌana ia a tātou i te reo-reo o te ꞌAtua, ꞌe ꞌina a tātou he haŋa parautiꞌa ki tāꞌana vānaŋa.