1 Kōrinto
Te moni mo te taina o Hērutarema
16 Te haka taka-taka i te moni mo te nuꞌu haꞌataꞌa e te ꞌAtua māꞌana o Hērutarema, e aŋa pa he meꞌe haka ꞌite e au ki te nūnaꞌa taꞌatoꞌa ⸤haka moe i te manaꞌu⸥ ꞌi ruŋa i a Ietū o te ŋā kona taꞌatoꞌa era o Karatia. 2 ꞌI te mahana tāpati taꞌatoꞌa, e haꞌataꞌa ꞌi te kōrua hare e tahi ꞌapa o te tara ai o kōrua ꞌe ꞌai ka hāpaꞌo rō, ki tuꞌu atu a au, ko haꞌataꞌa era ꞌā, ꞌo haka taka-taka iho kōrua ꞌi rā hora. 3 ꞌE, ki tuꞌu atu a au, he haka maꞌu i rā moni ki Hērutarema hai nuꞌu nō era o kōrua i haŋa. Ki a rāua ka vaꞌai nei e au i te parau ꞌi ruŋa e hāꞌaki rō ꞌā ko ai a rāua ꞌe ki te aha ꞌi Hērutarema. 4 ꞌE mo uꞌi ōꞌoku e tano nō a au mo oho ꞌi muri, he oho tahi a mātou.
He manaꞌu iŋa o Pauro mo oho ki Kōrinto
5 ꞌI tōꞌoku ara ki a kōrua ꞌi Kōrinto ꞌi raꞌe a au ka vari nei ki Mātērōnia, ꞌe ki oti ka tuꞌu iho atu ena a au ki a kōrua. 6 E rahi ꞌiti rō pēaha tōꞌoku noho atu ꞌi muri i a kōrua, korohaŋa ꞌāvaꞌe taꞌatoꞌa era o te toŋa. Pē ira, ki oho haka ꞌou a au ꞌi tōꞌoku ara ki te rua kona, e tano rō pēaha kōrua mo hāꞌūꞌū mai hai meꞌe mo tōꞌoku ara. 7 ꞌIna a au e ko haŋa mo hipa ꞌiti-ꞌiti nō atu mo uꞌi i a kōrua; e haŋa rō ꞌana mo roa ꞌiti o tōꞌoku noho iŋa atu, ana haŋa te ꞌAtua. 8 ꞌĪ a au ꞌi Ēfeto ꞌe ka noho nei a au ꞌātā ki oti te ⸤ŋoŋoro o te Peneketote⸥, 9 ꞌo te ai e rahi rō ꞌana te nuꞌu o nei haŋa mo haka ꞌite ōꞌoku ki a rāua i te ⸤roŋo riva-riva o te ꞌAtua⸥, ka ai atu e rahi takoꞌa rō ꞌana te nuꞌu taꞌe haŋa mai.
10 ꞌE mo tuꞌu atu o Timoteo, e uꞌi e haka naho-naho; a ia e aŋa takoꞌa rō ꞌana pē au ꞌi te aŋa o te tātou Pūꞌoko Haka Tere. 11 ꞌIna kōrua ko uꞌi taꞌe au ki a ia; e hāꞌūꞌū i tōꞌona ara mo oho mai mo uꞌi i a au. ꞌĪ a au e tiaki atu ena ki a ia ꞌe ki te ŋā taina hokorua ena i a ia.
12 ꞌE te tātou taina a ꞌĀporo, i kī rō e au mo oho atu ꞌi muri i te taina oho atu uꞌi i a kōrua, ꞌe, mo te hora nei, ꞌina e ko tano mo oho atu. Ki tano tōꞌona hora ka oho atu ena.
Te meꞌe mo aŋa
13 E uꞌi kōrua e hāpaꞌo ꞌe e haka hio-hio i te kōrua manaꞌu ꞌi ruŋa i a Ietū. E kiahio kōrua, ꞌina ko haꞌamā ꞌi te haka moe iŋa i te manaꞌu ꞌi ruŋa i a ia. 14 ꞌE te meꞌe taꞌatoꞌa o kōrua mo aŋa, e aŋa hai haŋa.
15 E te taina, ko ꞌite ꞌana a kōrua: te huaꞌai o Etefana he nuꞌu raꞌe o te kona era o Ākāia i haka moe i te manaꞌu ꞌi ruŋa i a Ietū, ꞌe ꞌi te hora nei te meꞌe rava aŋa o rāua he hāꞌūꞌū ki te taina haka moe i te manaꞌu ꞌi ruŋa i a Ietū. 16 He ani atu a au mo haka rē i a kōrua mo te nuꞌu era ꞌe mo te nuꞌu tuꞌu pē rāua hāꞌūꞌū ꞌi te aŋa o te ꞌAtua e haka tere atu.
17 Meꞌe huru kē te rahi o tōꞌoku koa i tuꞌu mai ai a Etefana, a Forotunato, ꞌe a Akaiko mai i a kōrua ena. ꞌI te kore, paꞌi, o kōrua, 18 o rāua te haka koa ꞌe te ꞌata haka pūai mai i a au, pa he meꞌe ka aŋa atu ena ki a kōrua ki hoki haka ꞌou atu. Te nuꞌu pē nei e moꞌa.
He ꞌaroha
19 Te nūnaꞌa taŋata taꞌatoꞌa haka moe i te manaꞌu ꞌi ruŋa i a Ietū o te ŋā kona nei o ꞌĀtia ko ꞌaroha mai ꞌā mo kōrua. A ꞌĀkira ꞌe a Pirika, ꞌe te nuꞌu taina taka-taka i te rāua hare ko ꞌaroha takoꞌa mai ꞌā mo kōrua hai ꞌīŋoa o te tātou Pūꞌoko Haka Tere, 20 ꞌe pē ira ꞌā te taina taꞌatoꞌa o muri i a au. ꞌE ꞌi roto i a kōrua takoꞌa e ꞌaroha hai haŋa.
21 A au, a Pauro, e pāpaꞌi atu ena i te ꞌaroha nei hai rima mau nei ꞌā ōꞌoku.
22 Mo taꞌe haŋa o te kope e tahi ki te tātou Pūꞌoko Haka Tere ko Ietū Kiritō, mo te ꞌAtua e haka ūtuꞌa. ¡E te mātou Pūꞌoko Haka Tere ē, ka hōrou koe ka hoki mai!
23 E te taina, ka ai ꞌi ruŋa i a kōrua taꞌatoꞌa te riva rahi o te tātou Pūꞌoko Haka Tere. 24 E haŋa rahi rō atu ꞌana a au ki a kōrua ꞌo te ai ꞌa Ietū Kiritō tātou taꞌatoꞌa.