Ēfeto

He poki ꞌe he matuꞌa ⸤kiritiano⸥

4 ꞌE a kōrua, e te matuꞌa tane ē, ꞌina ko haka riri i te kōrua ŋā poki. Te tano mau: e hāpaꞌo e hāpī i a rāua hai oho iŋa tano haŋa e te tātou Pūꞌoko Haka Tere ko Ietū Kiritō.

He ꞌekaravo ꞌe he nuꞌu haka aŋa i a rāua

5 E te ꞌekaravo, e haꞌatura ki te nuꞌu haka aŋa atu i a kōrua hai moꞌa ꞌe hai māhatu pa he meꞌe: e tāvini ꞌana a kōrua ki a Ietū. 6 E aŋa riva-riva te kōrua aŋa, taꞌe nō ꞌō ꞌi te hora ꞌi muri i a kōrua te nuꞌu haka aŋa atu ki koa ai a rāua. E aŋa kōrua pa he tāvini o Ietū aŋa hai māhatu i te meꞌe haŋa e te ꞌAtua. 7 E aŋa riva-riva kōrua hai koa, pa he meꞌe: e tāvini ꞌana kōrua ki a Ietū, taꞌe ꞌō ki te taŋata. 8 E ꞌite: e ai rō ꞌā te meꞌe mo vaꞌai e te ꞌAtua ki te taŋata, ka ꞌekaravo ꞌo ka taꞌe ꞌekaravo, ꞌo te meꞌe riva-riva aŋa e rāua.

9 E a kōrua, e te nuꞌu haka aŋa ē, e uꞌi e hāpaꞌo riva-riva te kōrua ꞌekaravo, ꞌe ꞌina ko haka riꞌa-riꞌa. E manaꞌu: a Ietū Kiritō ꞌi te raŋi he Pūꞌoko Haka Tere o kōrua ꞌe o rāua takoꞌa, ꞌe mōꞌona pē tū huru tahi ꞌā te taŋata.

He meꞌe vaꞌai mai ꞌo ravaꞌa tātou e Rukifero

10 E te taina, te vānaŋa hopeꞌa ꞌāꞌaku ka kī atu ena: ꞌi te hora taꞌatoꞌa e haka rē mā Ietū e haka haŋu atu hai pūai nui-nui ōꞌona. 11 E uꞌi e hāpaꞌo kōrua hai meꞌe taꞌatoꞌa vaꞌai atu e ia mo haka hio-hio, ꞌo reo-reo atu kōrua e Rukifero. 12 Taꞌe a tātou e moto ꞌā ki te taŋata; e moto ꞌana ki te tātane, te auraꞌa, ki a Rukifero ꞌe ki tāꞌana vaꞌehau taꞌatoꞌa ꞌina he takeꞌa mai haka tere i te nuꞌu noho ꞌi roto i te pōhāhā. 13 E hāpaꞌo kōrua hai meꞌe taꞌatoꞌa vaꞌai atu e te ꞌAtua mo haka hio-hio ꞌi te hora moto atu e Rukifero. Pē ira e ko ravaꞌa i a kōrua.

14 E maꞌu hio-hio te parautiꞌa o te ꞌAtua pa he vaꞌehau e haratuꞌa ena i te pena mo haka noho i tōꞌona kahu ꞌi te hora oho ki te tamaꞌi. E tano te kōrua noho iŋa ki te mata o te ꞌAtua, ki riro ai rā noho iŋa he meꞌe mo hāpaꞌo atu i a kōrua pa he kahu aŋa hai ꞌaurī e hāpaꞌo ena i te uma o te vaꞌehau. 15 E noho ꞌi roto i te haumārū vaꞌai atu e te ⸤roŋo riva-riva o ruŋa i a Ietū⸥, mo hio-hio o kōrua a te ara o te ꞌAtua, pa he vaꞌehau e uru ena i te kirivaꞌe mo haka hio-hio i tōꞌona rei iŋa ꞌi te hora oho ki te tamaꞌi. 16 E haka moe e oho te kōrua manaꞌu ꞌi ruŋa i a Ietū. Pē ira kōrua ka hāpaꞌo ena i a kōrua ꞌo hara ꞌi te hora haka ꞌatu atu e Rukifero, pa he vaꞌehau e maꞌu ena ꞌi te rima i te meꞌe ꞌaurī mo puru i te teꞌa pu-puhi ki a ia ꞌi te hora o te tamaꞌi. 17 ꞌE ꞌina ko rehu ki te hora hopeꞌa pē nei ē: ko eꞌa ꞌana a kōrua mai roto i te ūtuꞌa o te hara ꞌe ko ravaꞌa ꞌana i te ora ꞌāpī ꞌina he hopeꞌa raꞌa vaꞌai e te ꞌAtua. Pē ira kōrua ka hāpaꞌo ena mai te reo-reo ꞌa Rukifero, pa he vaꞌehau e puꞌa ena hai haꞌu ꞌaurī mo hāpaꞌo i tōꞌona pūꞌoko. ꞌE e ꞌite kōrua mo moto ki a Rukifero hai vānaŋa o te ꞌAtua, he hoe vaꞌai atu e te ⸤Vārua Maitai⸥, pa he moto iŋa o te vaꞌehau hai hoe ꞌi te hora o te tamaꞌi.

18 E te taina, ꞌina kōrua ko haka rē i te pure; e ani e oho ki te ꞌAtua hai pūai o te Vārua Maitai. E uꞌi ꞌo hōriŋa rō ꞌe ꞌo oho kē rō te manaꞌu. E pure mo te nuꞌu taꞌatoꞌa haꞌataꞌa e te ꞌAtua māꞌana. 19 E pure takoꞌa mōꞌoku, ki vaꞌai mai ai e te ꞌAtua i te vānaŋa tano mo kī ꞌi te hora ka vānaŋa era au o ruŋa i te roŋo riva-riva ꞌāꞌana, he parautiꞌa taꞌe haka ꞌite mai era ꞌi muꞌa ꞌā, ꞌe ki vaꞌai takoꞌa mai ai i te pūai ꞌo riꞌa-riꞌa a au ꞌi rā hora. 20 ꞌO te haka ꞌite ōꞌoku i te ⸤roŋo riva-riva o te ꞌAtua⸥, he aŋa i vaꞌai mai e ia, e puru atu ena a au. E pure kōrua mōꞌoku mo taꞌe riꞌa-riꞌa ōꞌoku ꞌi te hora haka ꞌite o ruŋa i a Ietū Kiritō.

He ꞌaroha

21 Mo te tātou taina haŋa rahi nei ko Tīkiko e maꞌu atu i te parau ꞌāpī o ruŋa i te meꞌe taꞌatoꞌa topa mai ki a au. E hāꞌūꞌū rō mai ꞌana a Tīkiko, ꞌe he tāvini takoꞌa pē au o te ꞌAtua ꞌite i te haka tano i tāꞌana meꞌe kī. 22 ꞌO ira i uŋa atu ena e au mo haka ꞌite atu pē hē a mātou. Pē ira he koa a kōrua ꞌe he pūai te manaꞌu ꞌi ruŋa i a Ietū.

23 Mo te ꞌAtua Matuꞌa ꞌe mo te tātou Pūꞌoko Haka Tere ko Ietū Kiritō e vaꞌai atu i te haumārū ꞌe i te haŋa koia ko haka pūai i te kōrua manaꞌu ꞌi ruŋa i a rāua. 24 Ka ai te riva rahi o te ꞌAtua ꞌi ruŋa i te nuꞌu taꞌatoꞌa haŋa hai māhatu ki a Ietū Kiritō, Pūꞌoko Haka Tere o tātou.