Meꞌe Haka Takeꞌa
He manuꞌino eꞌa mai roto i te vaikava
13 He oho ia tū manuꞌino era he māroa ꞌi te taha-taha tai. He uꞌi atu a au he manuꞌino taparahi-taꞌata haka ꞌou e tahi ka eꞌa mai roto i te vaikava. E hitu ōꞌona pūꞌoko ꞌe e hoꞌe ꞌahuru tara. ꞌI ruŋa i rā ŋā tara te hei, ꞌe ꞌi ruŋa i te pūꞌoko te ꞌīŋoa parauꞌino mo te ꞌAtua. 2 Te manuꞌino taparahi-taꞌata nei pa he manu ena ꞌā he leopardo. Te vaꞌe pa he vaꞌe ꞌā o te oso ꞌe te haha pa he haha ꞌā o te reone. He vaꞌai ki te manuꞌino nei e tū manuꞌino nui-nui mea-mea era i te pūai ꞌe i tōꞌona tōroꞌa ꞌariki era mo haka tere o rā manuꞌino pa he ꞌariki.
3 ꞌI ruŋa i te pūꞌoko e tahi o tū manuꞌino eꞌa nei mai roto i te vaikava te more ko ora ꞌā, more nui-nui taparahi-taꞌata mo mate, ꞌe ꞌina kai mate. I takeꞌa era e te taŋata taꞌatoꞌa o te ao, he māere tahi rō atu ꞌai ꞌe he peꞌe rō ꞌai ki rā manuꞌino. 4 He haꞌamuri tahi ananake ki tū manuꞌino nui-nui mea-mea era ꞌo te vaꞌai ki te manuꞌino taparahi-taꞌata eꞌa era mai roto i te vaikava i te parau mo haka tere, ꞌe he haꞌamuri takoꞌa ki rā manuꞌino koia ko kī e rā nuꞌu: «ꞌIna he rua kope pa he manuꞌino nei, ꞌe ꞌina he kope mo rē ki a ia».
5 Te ꞌAtua i haka rē nō i te manuꞌino eꞌa era mai roto i te vaikava mo kī i te meꞌe taꞌe tano ꞌe parauꞌino mōꞌona, ꞌe i haka rē takoꞌa nō mo haka tere pa he ꞌariki e maha ꞌahuru mā piti ꞌāvaꞌe. 6 ꞌE pē ira mau ꞌā i aŋa ai; i kī rō i te meꞌe taꞌe tano ꞌe parauꞌino mo te ꞌAtua, mo te kona haꞌamuri ki a ia ꞌe mo te nuꞌu taꞌatoꞌa noho ꞌi te raŋi. 7 I haꞌatiꞌa nō mo moto ki te nuꞌu o te ꞌAtua ꞌe mo rē ki a rāua. ꞌE i haꞌatiꞌa takoꞌa nō mo haka tere i te nuꞌu o te taꞌatoꞌa nō hau, ꞌarero ꞌe kona o te ao.
8 He haꞌamuri ia ki rā manuꞌino te taŋata taꞌatoꞌa te rāua ꞌīŋoa ꞌina o ruŋa i te puka pāpaꞌi o te ꞌīŋoa o te nuꞌu i a rāua te ora ꞌāpī ꞌina he hopeꞌa raꞌa. Te puka nei o te Māmoe tūtia era, ꞌe tōꞌona tūtia era ko haka tano era ꞌā mai te haꞌamata iŋa o te ao.
9 Te nuꞌu haŋa mo aŋi-aŋi e haka roŋo:
10 «Te nuꞌu ena mo puru, e maꞌu e puru rō;
ꞌe te nuꞌu ena mo mate hai hoe, hai hoe ka mate ena».
ꞌO ira, te nuꞌu haꞌataꞌa e te ꞌAtua māꞌana e ꞌite mo ꞌamo i te ꞌati topa ꞌi ruŋa i a rāua, ꞌe e haka moe e oho te manaꞌu ꞌi ruŋa i a Ietū.
Te manuꞌino eꞌa mai raro o te henua
11 I oti era he takeꞌa e au i te manuꞌino haka ꞌou e tahi ka eꞌa mai raro o te henua. Rā manuꞌino e ai rō ꞌā e rua tara tuꞌu pa he tara o te māmoe, ꞌe te vānaŋa iŋa pē tū manuꞌino nui-nui mea-mea era. 12 Te manuꞌino nei he rarovaꞌe o te manuꞌino eꞌa era mai roto i te vaikava, ꞌe ꞌāꞌana te haka tere i te taŋata peꞌe ki rā manuꞌino. ꞌE ꞌāꞌana takoꞌa te aŋa mo haꞌamuri o te taŋata taꞌatoꞌa o te ao ki tū manuꞌino ora era o te more.
13 Nei manuꞌino i aŋa rō i te mana ꞌe i te meꞌe mo māere o te taŋata, ꞌe ꞌātā i haka hoa rō i te ahi mai te raŋi. 14 Hai ŋā mana nei, mana haꞌatiꞌa era mo aŋa e ia hai ꞌīŋoa o tū manuꞌino eꞌa era mai roto i te vaikava, i reo-reo ai ki te taŋata. He uŋa ia i te nuꞌu nei he haka aŋa i te ꞌītoro pē rā manuꞌino mau ꞌā, manuꞌino taꞌe mate era ka ai atu i more rō ꞌi te more taparahi-taꞌata ꞌi te hoe.
15 Ki te manuꞌino eꞌa nei mai raro o te henua i vaꞌai ai i te pūai mo haka ora ꞌe mo haka vānaŋa i te ꞌītoro o tū manuꞌino era. ꞌE o rā ꞌītoro te uŋa te haka tiŋaꞌi i te nuꞌu taꞌatoꞌa taꞌe haꞌamuri ki a ia. 16 O tū manuꞌino eꞌa era mai raro o te henua i haka tāpaꞌo a te rima mataꞌu ꞌo a te tira i te nuꞌu taꞌatoꞌa, ka ŋā poki ꞌo ka paꞌari, ka ꞌono ꞌo ka veve, ka ꞌekaravo ꞌo ka taꞌe ꞌekaravo. 17 ꞌE ꞌina e tahi kope mo hoꞌo ꞌe mo hoꞌo mai, korohaŋa e tahi meꞌe, mo taꞌe maꞌu i rā tāpaꞌo, ꞌe rā tāpaꞌo he ꞌīŋoa o te manuꞌino eꞌa era mai roto i te vaikava, ꞌo he nūmera o tōꞌona ꞌīŋoa.
18 ꞌE mo aŋi-aŋi i te haꞌaauraꞌa o te nūmera o rā manuꞌino taparahi-taꞌata era, e ai i a koe te mārama-rama vaꞌai e te ꞌAtua. ꞌE te kope haŋa mo aŋi-aŋi e ꞌite mo haka tano-tano i rā nūmera ki te tiꞌaraꞌa tano mo aŋi-aŋi i rā ꞌīŋoa, he ꞌīŋoa o te taŋata e tahi. ꞌE rā nūmera he ono hānere ono ꞌahuru mā ono.