¿He aŋi ꞌā a Iehoha te parau ꞌāpī era o ruŋa i te Puka o te ꞌAtua?

1. ¿ꞌA ꞌai i papaꞌi te Puka o te ꞌAtua?

Te parau ꞌāpī riva⁠-⁠riva mo ora ki te hopeꞌa raꞌa i ruŋa i te henua, i ruŋa i te Puka o te ꞌAtua e haꞌaki era (Salmo 37:⁠29). Te Puka o te ꞌAtua ko aŋa ꞌā hai 66 puka iti⁠-⁠iti papaꞌi e te 40 taŋata vae e te ꞌAtua mo aŋa i rā aŋa. A Moisés i papaꞌi te puka raꞌe era e rima 3.500 matahiti a tuꞌa. Te puka hopeꞌa a Juan i papaꞌi 1.900 matahiti a tuꞌa. Te manaꞌu taꞌatoꞌa era o ruŋa i te Puka o te ꞌAtua, mai a Iehoha i oho mai ai. A Īa hai toꞌona varūa maitai i haka aŋi⁠-⁠aŋi ai toꞌona manaꞌu ki te nuꞌu papaꞌi era i taꞌana puka (2 Samuel 23:⁠2). Nei ŋā nuꞌu taꞌatoꞌa, ko papaꞌi tahi ana i te manaꞌu o te ꞌAtua, taꞌe i te manaꞌu o rāua. Ōira e riva nō tātou mo kī ꞌaꞌana te Puka nei.—E taiꞌo 2 Timoteo 3:⁠16; 2 Pedro 1:⁠20, 21.

Ka mataꞌitaꞌi te video ¿ꞌO ꞌai te manaꞌu pāpaꞌi era i ruŋa i te Pipiria?

2. ¿He parautīꞌa mau ꞌā te meꞌe papaꞌi i ruŋa i te Puka o te ꞌAtua?

Ko ꞌite ꞌā tātou mai a Iehoha te Puka o te ꞌAtua i oho mai ai, o te ai, ko kī mai ꞌā te taꞌatoꞌa meꞌe ka piri mai ena pe muꞌa ka oho ena. Nei meꞌe e ko riva e tahi taŋata mo aŋa (Josué 23:⁠14). Mo te ꞌAtua Mana Pūai nō e riva mo aŋa peira.—E taiꞌo Isaías 42:⁠9; 46:⁠10.

Mo ai o te ꞌAtua te Puka nei, e topa kē nō ꞌā mai te tahi puka. Ōira ko huri ꞌā a ruŋa ki te hanere tumu ꞌarero e ko tuhaꞌa ꞌā tautini piēre o nei Puka. No atu toꞌona papaꞌi mai muꞌa ꞌā, te meꞌe papaꞌi o ruŋa i te Puka o te ꞌAtua, ko haka tano ꞌā ki te meꞌe taꞌatoꞌa aŋi⁠-⁠aŋi e tātou i te hora nei o ruŋa i te nātura. Peira ꞌā te meꞌe i papaꞌi era e te 40 taŋata i ruŋa i te Puka o te ꞌAtua, ko tū manaꞌu ꞌā no atu te taꞌe mahani i roto i a rāua.⁠a Takoꞌa i ruŋa i nei Puka he tikeꞌa tātou i te here o te ꞌAtua, e toꞌona pūai mo huri te huru o te taŋata ki toꞌona huru haka tere titīka. Ōira rahi nō te taŋata e aŋi⁠-⁠aŋi ena te Puka o te ꞌAtua mai i a Īa i oho mai ai.—E taiꞌo 1 Tesalonicenses 2:⁠13.

Ka mataꞌitaꞌi te video ¿Pe hē e ꞌite nei tātou he parautiꞌa mau ꞌā te meꞌe kī e te Pipiria?

3. ¿He aha te meꞌe vānaŋa mai e te Puka o te ꞌAtua?

Te tumu mau o te Puka o te ꞌAtua, he parau ꞌāpī riva⁠-⁠riva mo te taŋata taꞌatoꞌa: he meꞌe riva⁠-⁠riva e tahi haŋa e te ꞌAtua mo te ꞌAo taꞌatoꞌa. Ko ꞌaꞌamu mai ꞌā o ruŋa i te haꞌamata o te taŋata e pe hē i ŋaro ai te raveꞌa mo noho i ruŋa i te henua nehe⁠-⁠nehe ki te hopeꞌa raꞌa, e ko ꞌaꞌamu takoꞌa mai ꞌā, pe hē ka aŋa ena mo riro haka ꞌou te henua pahe kona nehe⁠-⁠nehe e tahi.—E taiꞌo Revelación 21:⁠4, 5.

I ruŋa i te Puka o te ꞌAtua, e ai rō ꞌā te roŋo mo haka tere titīka o tātou. Takoꞌa a ruŋa i te huru haka tere o te ꞌAtua ki te taŋata o muꞌa ꞌā, he riva tātou mo aŋi⁠-⁠aŋi toꞌona huru. Ōira te Puka o te ꞌAtua e haꞌūꞌū rō mai ꞌā mo aŋi⁠-⁠aŋi o ruŋa i a Īa, e pe hē tātou ana riro he ŋaruhoa ꞌoꞌona.—E taiꞌo Salmo 19:⁠7, 11; Santiago 2:⁠23; 4:⁠8.

4. ¿Pe hē tātou ana aŋi⁠-⁠aŋi te haꞌauraꞌa o te Puka o te ꞌAtua?

Te puka iti⁠-⁠iti nei he haꞌūꞌū mai mo aŋi⁠-⁠aŋi riva⁠-⁠riva te Puka o te ꞌAtua, pe he aŋa iŋa era o Ietū i muꞌa ꞌā. A īa e kī era e tahi kupu vānaŋa o ruŋa i te Puka o te ꞌAtua e ki ꞌoti, e haka ꞌite era i te haꞌauraꞌa ki te taŋata.—E taiꞌo Lucas 24:⁠27, 45.

Te parau ꞌāpī riva⁠-⁠riva oho mai ena mai te ꞌAtua, he meꞌe hopeꞌa o te riva⁠-⁠riva mo piri atu, ꞌina he meꞌe hahine ki nei roa. E no atu nei meꞌe, kē nuꞌu e ko tapa, e kē nuꞌu he riri mo vānaŋa o ruŋa nei meꞌe. ꞌIna koe ko horiŋa i te ŋā nuꞌu nei. He ꞌoti mau ꞌā te raveꞌa mo rovaꞌa te ora ki te hopeꞌa raꞌa, e hāpī e oho koe o ruŋa i te ꞌAtua.—E taiꞌo Juan 17:⁠3.