¿O te aha te ꞌAtua e haꞌatiꞌa ena te ꞌino e i te mamāe?

1. ¿Pe hē i haꞌamata ai te ꞌino?

Te ꞌino i haꞌamata ai i ruŋa i te henua hora kī era e te Tatāne te reo⁠-⁠reo raꞌe. Kai aŋa e Iehoha te Tatāne pahe merahi rake⁠-⁠rake, a īa i riro ai he merahi rake⁠-⁠rake, o te ai ko haŋa ꞌā mo oho a toꞌona ara reo⁠-⁠reo (Juan 8:⁠44). He haka tupu he oho i te haŋa mo haꞌatura te taŋata ki a īa, rā haꞌatura paꞌi o te ꞌAtua nō. Hai reo⁠-⁠reo i tata ai te roro o Eva mo haka roŋo ki a īa e taꞌe ki te ꞌAtua, e he peꞌe Adán ki taꞌana viꞌe i te aŋa rake⁠-⁠rake nei. Mai rā hora ki aŋanirā he mamāe, he taŋi⁠-⁠taŋi e he mate te meꞌe piri mai.—E taiꞌo Génesis 3:⁠1-6, 19.

Hai rā reo⁠-⁠reo kī era e te Tatāne ki a Eva, mo taꞌe haka roŋo ki te ꞌAtua, i haꞌamata ai te patoꞌi nui⁠-⁠nui o te Tatāne ki te Haꞌatere o te ꞌAtua. Hai rā patoꞌi te Tatāne i haka tikeꞌa ai toꞌona manaꞌu pe nei ē, taꞌe ma Iehoha te ꞌAtua Ariki Mana Pūai o te ꞌAo taꞌatoꞌa, e haꞌatere. Ōira, rahi nō te taŋata i aŋanirā peꞌe ki te patoꞌi era o te Tatāne, o te ai ko manaꞌu takoꞌa ꞌā taꞌe ma Iehoha e haꞌatere i a rāua. Ōira i te hora nei ko haꞌariro ꞌā te Tatāne he ariki o te ꞌAo nei.—E taiꞌo Juan 14:⁠30; 1 Juan 5:⁠19.

2. ¿E ai rō ꞌā te meꞌe hape o te meꞌe aŋa tahi era e te ꞌAtua?

Meꞌe aŋa tahi era e Iehoha ꞌina e tahi hape. Te merahi e te taŋata raꞌe era, e riva nō ꞌā mo haka roŋo ki te ꞌAtua o ruŋa i te meꞌe taꞌatoꞌa (Deuteronomio 32:⁠4, 5). Te ꞌAtua ko vaꞌai mai ꞌā te raveꞌa mo uꞌi e tātou ꞌā, he aha te meꞌe mo aŋa: he meꞌe riva⁠-⁠riva o he meꞌe rake⁠-⁠rake. Te raveꞌa nei ko haꞌatiꞌa mai ꞌā mo haka tikeꞌa te tātou here ki te ꞌAtua, hai aŋa i te meꞌe riva⁠-⁠riva.—E taiꞌo Santiago 1:⁠13-15; 1 Juan 5:⁠3.

3. ¿O te aha te ꞌAtua e haꞌatiꞌa ena i te mamāe?

A Iehoha ko haꞌatiꞌa te patoꞌi nui⁠-⁠nui ki toꞌona haꞌatere hai hora iti⁠-⁠iti nō ¿O te aha? Mo haka tikeꞌa pe nei ē ꞌina e tahi haꞌatere mo rovaꞌa i te hauhaꞌa riva mo te taŋata, mo kore toꞌona haꞌūꞌū (Eclesiastés 7:⁠29; 8:⁠9). Ko tano ꞌā i te hora nei 6.000 matahiti o te haꞌatere taŋata, e ꞌina mau ꞌā e tahi haꞌatere taŋata i riva mo haka kore i te tamaꞌi, te tiŋaꞌi taŋata, te toke, te haka tere titīka kore, e te maiūi.—E taiꞌo Jeremías 10:⁠23; Romanos 9:⁠17.

Mo haka rē tātou mo haꞌatere mai e te ꞌAtua, he rovaꞌa tātou i te hauhaꞌa riva (Isaías 48:⁠17, 18). ꞌIna he hora toe, nā a Iehoha he haka kore tahi i te haꞌatere taŋata. Te nuꞌu ka ora era i ruŋa i te henua, ko te nuꞌu haŋa mo haꞌatere i a rāua e te ꞌAtua (Isaías 11:⁠9).—E taiꞌo Daniel 2:⁠44.

Ka mataꞌitaꞌi te video ¿O te aha te ꞌAtua e haꞌatiꞌa ena i te mamāe?

4. ¿He aha te meꞌe haka tikeꞌa hai tātou huru haka tere?

Te Tatāne ko kī ꞌā pe nei ē, te taŋata e aŋa ena ki te ꞌAtua mo rovaꞌa hauhaꞌa nō. I aŋanirā e riva rō ꞌā mo haka tikeꞌa hai tātou haka tere iŋa, ko haŋa ꞌā tātou mo haka tere mai e te ꞌAtua e taꞌe e te rua. Pe nei tātou e haka tikeꞌa ena te Tatāne he kope reo⁠-⁠reo.—E taiꞌo Job 1:⁠8-12; Proverbios 27:⁠11.

5. ¿Pe hē ana haka tikeꞌa ko haŋa ꞌā tātou mo haꞌatere mai e te ꞌAtua?

He raꞌe tātou ana rara ana oho pe hē te ꞌAtua e haŋa ena mo haꞌatura i a Īa, e hē te hare pure parautīꞌa haꞌatiꞌa e Īa. Te hare pure nei, hai Puka o te ꞌAtua e haka tere e oho ena i a rāua (Juan 4:⁠23). Takoꞌa, e haka ava⁠-⁠ava koe mai te haꞌatere o te Tatāne ¿Pe hē? ꞌIna koe ko peꞌe ki te haꞌatere taŋata, e ki te tamaꞌi. Pahe huru aŋa era e Ietū koe ana haka tere.—E taiꞌo Juan 17:⁠14.

Te Tatāne, hai toꞌona pūai, e tata e oho mai ena te roro o te taŋata mo aŋa i te meꞌe ꞌino, rake⁠-⁠rake e taiꞌata, e he haka manaꞌu ki te taŋata, te ŋā meꞌe nei meꞌe taꞌe ꞌino mo aŋa. Ka haka ava⁠-⁠ava ena tātou mai te ŋā aŋa rake⁠-⁠rake nei, kē repahoa e kē huaꞌai, he pohi e he haka meꞌe⁠-⁠meꞌe atu (1 Pedro 4:⁠3, 4). Mo piri atu te ŋā meꞌe nei, ka kimi koe te hokorua o te taŋata here ki a Iehoha, e ka haka roŋo ki taꞌana roŋo haka tere titīka. Peira he haka tikeꞌa tātou he reo⁠-⁠reo mau ꞌā tū meꞌe kī era e te Tatāne pe nei ē, ꞌina e tahi taŋata mo haka roŋo ki te ꞌAtua hora era mo piri o te ꞌati.—E taiꞌo 1 Corintios 6:⁠9, 10; 15:⁠33.

I te rahi o te here o te ꞌAtua ki a tātou, nā a Īa he haka kore tahi te mamāe e te ꞌino. Mo te nuꞌu here ki taꞌana roŋo e haꞌatiꞌa mo haꞌatere i a rāua, ka ora ka oho ena ki te hopeꞌa raꞌa i ruŋa i te henua.—E taiꞌo Juan 3:⁠16.