¿Pe hē ana hahine ki te ꞌAtua?

1. ¿E haka roŋo rō ꞌā e te ꞌAtua i te pure taꞌatoꞌa?

Ko haŋa ꞌā te ꞌAtua mo hahine te taŋata o te ꞌAo taꞌatoꞌa ki a Īa a roto i te pure (Salmo 65:⁠2). No atu nei meꞌe, ꞌina he haka roŋo te taꞌatoꞌa pure. Pahe hora e aŋa e oho era e te Israelita i te meꞌe rake⁠-⁠rake, ꞌina te ꞌAtua he haka roŋo i te rāua pure. Takoꞌa te Puka o te ꞌAtua e kī rō ꞌā ꞌina a Iehoha he haka roŋo i te pure o te taŋata totoꞌā i taꞌana viꞌe (1 Pedro 3:⁠7). O te ai te pure he hauhaꞌa e tahi vaꞌai mai e te ꞌAtua mo hahine ki a Īa. No atu rā meꞌe, mo ai e tahi taŋata ko hara ꞌā, te ꞌAtua e haka roŋo rō ꞌā taꞌana pure o te ai ko mamāe ꞌā rā taŋata a roto i a īa o rā aŋa rake⁠-⁠rake aŋa era, e o te haka rē te oho te aŋa rā hara.—E taiꞌo Isaías 1:⁠15; 55:⁠7.

Ka mataꞌitaꞌi te video ¿E haka roŋo rō ꞌā e te ꞌAtua i te pure taꞌatoꞌa?

2. ¿Pe hē tātou ana pure?

Ki a Iehoha nō tātou ana pure o te ai ꞌaꞌana tātou i aŋa, ko Īa te ꞌAtua mau (Mateo 4:⁠10; 6:⁠9). Peira ꞌā a tātou he taŋata hara, ōira e pure a roto i te vaha o te ꞌīŋoa o Ietū, o te ai paꞌi, a īa i mate ai mo haka kore te tātou hara (Juan 14:⁠6). Kai haŋa a Iehoha mo pure ko tū vānaŋa ꞌā ko tū vānaŋa ꞌā. Ko haŋa ꞌā te ꞌAtua mo vānaŋa ki a Īa o ruŋa i te tātou manaꞌu e tātou meꞌe ŋaroꞌa, ōira hai mahatu nō tātou ana pure ki a Īa.—E taiꞌo Mateo 6:⁠7; Filipenses 4:⁠6, 7.

Te ꞌAtua e haka roŋo takoꞌa rō ꞌā, mo pure hai manaꞌu nō (1 Samuel 1:⁠12, 13). A Īa ko haŋa ꞌā mo pure e tātou i te taꞌatoꞌa hora, i te ꞌotea, i te hopeꞌa o te mahana, i te hora kai e i te hora mo piri mai te ꞌati.—E taiꞌo Salmo 55:⁠22; Mateo 15:⁠36.

3. ¿O te aha e taka⁠-⁠taka era te pukuraŋa o Ietū?

A tātou e noho nei i muri i te taŋata taꞌe haka roŋo ki te ꞌAtua, e haka meꞌe⁠-⁠meꞌe o ruŋa i te raveꞌa o te ꞌAtua mo haꞌariro te henua pahe kona nehe⁠-⁠nehe e tahi. Ōira e horiŋa nei mo hahine tātou ki te ꞌAtua (2 Timoteo 3:⁠1, 4; 2 Pedro 3:⁠3, 13). Ōira tātou e piri ki te tahi pukuraŋa o Ietū mo haka haŋu i a tātou e mo haka haŋu tātou i a rāua.—E taiꞌo Hebreos 10:⁠24, 25.

Mo piri o tātou ki te taŋata here ki te ꞌAtua, he haꞌūꞌū mai mo ata hahine ki a Īa. Mo piri takoꞌa o tātou i te koro paina o te Taŋata Haka ꞌIte o Ruŋa o Iehoha, e mo uꞌi a ruŋa i te huru haka tere o rāua, he vaꞌai mai te haŋu mo haka uhu o tātou.—E taiꞌo Romanos 1:⁠11, 12.

4. ¿Pe hē ana hahine ki te ꞌAtua?

Hai haka topa te manaꞌu o ruŋa i te meꞌe hāpī e te Puka o te ꞌAtua, he ata hahine koe ki a Īa. Takoꞌa he aŋi⁠-⁠aŋi ꞌoꞌou o ruŋa i te huru haka tere ꞌoꞌona, taꞌana roŋo e taꞌana hauhaꞌa riva ka vaꞌai mai ena pe muꞌa ka oho ena. Peira ꞌā hai haka topa i te manaꞌu o ruŋa i te ŋā meꞌe nei e ko i a ko pure, he aŋi⁠-⁠aŋi koe o ruŋa i te here nui⁠-⁠nui e i te rahi o te maramarama o te ꞌAtua.—E taiꞌo Josué 1:⁠8; Salmo 1:⁠1-3.

No atu te taꞌe tikeꞌa tātou i a Iehoha, ko ꞌite ꞌā tātou ko Īa te ꞌAtua mau, e mai i a Īa mau ꞌā te hauhaꞌa riva ka rovaꞌa ena tātou pe muꞌa ka oho ena. Ko ꞌite ꞌā tātou he aŋi ꞌā te manaꞌu nei, ōira e riva nei tātou mo hahine ki a Īa. Mo haka hio⁠-⁠hio te manaꞌu nei, e haka topa te manaꞌu o ruŋa i te meꞌe hāpī tātou o te ꞌAtua. Mo haꞌauraꞌa atu, a tātou te taŋata, e kai mo ora e mo haka hio⁠-⁠hio te tātou hakari, peira ꞌā mo haka hio⁠-⁠hio te manaꞌu o ruŋa i te ꞌAtua, e taiꞌo taꞌana puka ꞌe e hāpī e oho o ruŋa i a Īa.—E taiꞌo Mateo 4:⁠4; Hebreos 11:⁠1, 6.

5. ¿He aha te hauhaꞌa riva mo tātou mo hahine ki te ꞌAtua?

E tapa rō ꞌā Iehoha i te nuꞌu here ki a Īa. Takoꞌa e hapaꞌo rō ꞌā mo taꞌe ŋaro te tātou here ki a Īa, e te raveꞌa mo ora ki te hopeꞌa raꞌa (Salmo 91:⁠1, 2, 7-10). Peira ꞌā e hāpī rō mai ꞌā mo hapaꞌo te tātou hakari. E he hāpī takoꞌa rō mai ꞌā, hē te huru hopeꞌa o te riva⁠-⁠riva mo noho e mo rovaꞌa i te koa mau.—E taiꞌo Salmo 73:⁠27, 28; Santiago 4:⁠4, 8.