MO AI HOKO TAHI NŌ KOE E KO RIꞌA⁠-⁠RIꞌA ꞌĀ, ¿HE AHA TAꞌA MEꞌE MO AŊA?

Ka uꞌi te poki o ruŋa i te hohoꞌa nei. Hoko tahi nō a īa e ko riꞌa⁠-⁠riꞌa ꞌā. ¿I riꞌa⁠-⁠riꞌa rō koe e tahi mahana?... Taꞌatoꞌa tātou i riꞌa⁠-⁠riꞌa rō. Te Puka o te ꞌAtua e vānaŋa rō ꞌā o ruŋa i te repahoa o Iehoha i riꞌa⁠-⁠riꞌa ai e takoꞌa i ŋaroꞌa ai te rāua hoko tahi. E tahi o rā ŋā taŋata, ko Elias toꞌona ꞌīŋoa, i ŋaroꞌa rō peira. Mai ki hāpī tātou o ruŋa i a īa.

Rahi nō te matahiti a tuꞌa a Elias e noho era i Israel, raꞌe ki te poreko o Ietū. A Acab te ariki e tahi o Israel ꞌina he haka roŋo ki a Iehoha te ꞌAtua parautīꞌa. A Acab e taꞌana viꞌe ko Jezabel ki te ꞌatua reo⁠-⁠reo ko Baal e tutūri era. Oīra te rahi o te Israelita ki a Baal e tutūri era. Te ariki vahine ko Jezabel, he viꞌe hopeꞌa o te rake⁠-⁠rake e a īa ko haŋa ꞌā mo tiŋaꞌi tahi te taŋata haka roŋo era ki a Iehoha, e peira ꞌā ki a Elias. ¿Ko ꞌite ꞌā koe he aha te meꞌe i aŋa a Elias?...

He eꞌa he tere a Elias ki te henua roa⁠-⁠roa e te henua nei he henua paka⁠-⁠paka. E he oho he piko i roto i te ana ¿O te aha i tere i piko ai?... O te ai ko riꞌa⁠-⁠riꞌa ꞌā. ꞌIna e tahi meꞌe a Elias mo riꞌa⁠-⁠riꞌa, ¿O te aha? O te ai ko ꞌite era ꞌā pe hē te huru o te mana pūai o Iehoha, i te meꞌe era ko haka tikeꞌa era ꞌā e Iehoha toꞌona pūai, hai uŋa mai te ahi mai ruŋa i te raŋi hora pahono era i te pure a Elias. Oīra, e riva nō a Iehoha mo haꞌūꞌū i a īa i toꞌona hora ꞌati.

I te hora era i roto i te ana a Elias, he ꞌui e Iehoha: “¿E aha ꞌā koe i nei?” He pahono e Elias: “Ko au nō te taŋata e haka roŋo atu ena ki a koe. Hoko tahi nō au i te hora nei e ko riꞌa⁠-⁠riꞌa ꞌā au o tiŋaꞌi rō mai i a au”. A Elias e manaꞌu era pe nei ē, te taŋata taꞌatoꞌa haka roŋo era ki te ꞌAtua ko tiŋaꞌi tahi ꞌā. He pahono e Iehoha: “Kai tano tuꞌu manaꞌu, e ai rō ꞌā 7.000 taŋata e haka roŋo mai ena ki a au. ꞌIna koe ko riꞌa⁠-⁠riꞌa. E ai nō ꞌā te aŋa maꞌau. Ki tuꞌu manaꞌu, ¿I koa rō a Elias i te hora ŋaroꞌa era i te vānaŋa nei?...

¿He aha te meꞌe o tātou mo hāpī o ruŋa i a Elias?... ꞌIna ko riꞌa⁠-⁠riꞌa e ꞌina ko manaꞌu hoko tahi nō tātou. A Iehoha he ꞌAtua mana pūai e maꞌana e haꞌūꞌū mai mo ꞌati o tātou. E takoꞌa ꞌina ko rehu e ai rō ꞌā tuꞌu repahoa here ki a Iehoha e ki a koe takoꞌa. ¿Ko koa ꞌā koe o te ai peira?...