KAU 6
¿E ai rō ꞌā te raveꞌa mo te nuꞌu ko mate ꞌā?
1. ¿He aha te raveꞌa mo te taŋata ko mate ꞌā?
Te raveꞌa mo te taŋata ko mate ꞌā, he haka ora haka ꞌou. Te parau ꞌāpī riva-riva nei ko papaꞌi ꞌā i ruŋa i te Puka o te ꞌAtua. E ai rō ꞌā e tahi ꞌaꞌamu o ruŋa nei raveꞌa mo haka tikeꞌa i a tātou te parau ꞌāpī nei, e i he ꞌaꞌamu atu. I te hora era a Ietū i ruŋa i te henua, he mate toꞌona repahoa ko Lázaro noho era i Betania, kona e tahi poto ki a Jerusalén. I tuꞌu era Ietū ki rā kona, ka hā mahana o te mate o toꞌona repahoa. ꞌI īra i piri ai ki a Marta rāua ko María, taina vahine o Lázaro, e he pū he oho ananake, ki te rua era ꞌi īra i haka rē ai. I hini era he taka-taka te nuꞌu i rā kona. I rā hora he haka ora haka ꞌou e Ietū i a Lázaro. ¿Ka haka topa rā tū manaꞌu o ruŋa o te koa o Marta ko īa ko María, i te tikeꞌa ko ora haka ꞌou ꞌā toꞌona taina?—E taiꞌo Juan 11:21-24, 38-44.
Ko aŋi-aŋi era ꞌā Marta o ruŋa i te raveꞌa nei o te ai ko hāpī ꞌā o ruŋa i te kī o Iehoha mo haka ora haka ꞌou i te taŋata i ruŋa i te henua.—E taiꞌo Job 14:14, 15.
2. ¿He aha te meꞌe piri mai e mate ena?
Pe nei i kī ai e te ꞌAtua ki a Adán: “Koe mai te puŋa ehu ꞌoꞌone i toꞌo mai ai e ki te puŋa ehu ꞌoꞌone koe ka hoki ena” (GÉNESIS 3:19)
A tātou te taŋata hai puŋa ehu ꞌoꞌone i aŋa ai (Génesis 2:7; 3:19). Ōira ꞌina tātou varūa i roto i te tātou hakari. E mate nei tātou ꞌina he aŋa toe o te roro, ōira he kore tahi te tātou manaꞌu ꞌe e ko riva mo ŋaroꞌa e mo aŋa e tahi meꞌe, i te meꞌe era ko mate ko ꞌoti ꞌā. Ōira a Lázaro i taꞌe ꞌaꞌamu mai ai e tahi meꞌe o ruŋa i toꞌona mate.—E taiꞌo Eclesiastés 9:5, 6, 10.
A tātou ko aŋi-aŋi ꞌā, te nuꞌu era ko mate ꞌā,ꞌina rāua manaꞌu toe. Ōira te hāpī o te pōꞌauahi he reo-reo e tahi ꞌe e vāvā rō ꞌā i te ꞌAtua. Mo manaꞌu nō te ꞌAtua mo haka ꞌutuꞌa e tahi taŋata i roto i te ahi, he ꞌeꞌete toꞌona manava.—E taiꞌo Jeremías 7:31.
Ka mataꞌitaꞌi te video ¿He aha te meꞌe piri ki te nuꞌu era ko mate ꞌā?
3. ¿E riva rō mo vānaŋa ki te nuꞌu ko mate ꞌā?
Te taŋata ko mate ꞌā e ko riva mo vānaŋa e mo ŋaroꞌa e tahi meꞌe (Salmo 115:17). No atu nei meꞌe, e ai rō ꞌā te merahi rake-rake e riva nō mo vānaŋa ki te taŋata e mo haꞌariro i a rāua pahe nuꞌu era ko mate ꞌā (2 Pedro 2:4). Ōira he enemī mau a Iehoha mo vānaŋa tātou ki te nuꞌu ko mate ꞌā.—E taiꞌo Deuteronomio 18:10, 11.
4. ¿Ko ai ko ai te nuꞌu ka ora haka ꞌou ena?
Rahi nō te nuꞌu ko mate ꞌā ka ora haka ꞌou era i ruŋa i te henua. Peira ꞌā he haka ora haka ꞌou e Iehoha i te nuꞌu i aŋa i te meꞌe rake-rake i te taꞌe ꞌite o ruŋa i a Īa.—E taiꞌo Lucas 23:43; Hechos 24:15.
Te nuꞌu ka ora haka ꞌou ena he riva mo hāpī te parautīꞌa o ruŋa i te ꞌAtua. Hai huru haka tere era o rāua ana haka tikeꞌa i te rāua moꞌa ki a Ietū pahe ariki o te Haꞌatere o te ꞌAtua (Revelación 20:11-13). Mo te nuꞌu haka tere peira he ora ki te hopeꞌa raꞌa i ruŋa i te henua.—E taiꞌo Juan 5:28, 29.
5. ¿He aha te meꞌe hāpī mai o ruŋa o Iehoha te raveꞌa nei o te haka ora haka ꞌou i te nuꞌu mate?
Te raveꞌa nei o te haka ora haka ꞌou o te taŋata, i ai ai o te uŋa mai te ꞌAtua i taꞌana poki mo vaꞌai toꞌona hakari mo tātou. Peira e haka tikeꞌa mai ena te here e te riva o Iehoha ki a tātou. Hai uŋa o te ꞌAtua i taꞌana poki mo vaꞌai toꞌona hakari mo tātou, e riva nei te taŋata mate mo ora haka ꞌou.—E taiꞌo Juan 3:16; Romanos 6:23.