KAU 17
Te tumu mo ŋaruhoa ki te ꞌAtua
Te here he tumu o te hoꞌou. Mo ata rahi tuꞌu ꞌite o ruŋa o Iehoha, he ata here koe ki a Īa, ꞌe he ata rahi tuꞌu haŋa mo aŋa ki a Īa. Mo te meꞌe nei e haka makenu atu mo riro ōꞌou he pukuraŋa o Ietū (Mateo 28:19). Mo piri ōꞌou ki te huaꞌai koa o te pukuraŋa o Ietū, te Taŋata haka ꞌite o ruŋa o Iehoha, he ŋaruhoa he oho rō ai koe o te ꞌAtua, ki te hopeꞌa raꞌa. ¿He aha taꞌa meꞌe mo aŋa mo ai koe i roto i rā huaꞌai?
Ka haka tikeꞌa tuꞌu here ki te ꞌAtua hai haka roŋo ki tāꞌana roŋo. “ꞌI te haꞌauraꞌa o te here o te ꞌAtua: e haka roŋo ki tāꞌana roŋo, ꞌe nei roŋo meꞌe taꞌe paŋahaꞌa”. (1 Juan 5:3.)
Ka aŋa te meꞌe hāpī atu ena. Ko ꞌaꞌamu ꞌā Ietū e tahi ꞌaꞌamu mo haꞌauraꞌa te vānaŋa nei. Te taŋata māramarama e tahi, he haka tuꞌu tōꞌona hare i ruŋa i te papa, e tahi taŋata haka ꞌou pūꞌoko hio-hio, he haka tuꞌu tōꞌona hare i ruŋa i te ꞌone, he hoa mai te ꞌua nui-nui e tahi, te hare haka tuꞌu era i ruŋa i te papa, i rā papa ꞌā i noho ai, e te rua hare, he marere tahi ki raro. Kī ꞌā e Ietū, te taŋata haka roŋo tāꞌana vānaŋa hāpī era, pahe huru o te taŋata haka tuꞌu era te hare i ruŋa i te papa, i kī ai takoꞌa, te taŋata haka roŋo ki tāꞌana vānaŋa ꞌe ꞌina he aŋa i rā meꞌe kī era e īa, te huru ōꞌona pahe taŋata pūꞌoko hio-hio era. O te ŋā kope nei e rua ¿Ki a ai koe i haŋa ai mo haka tano tuꞌu huru? (Mateo 7:24-27).
He vaꞌai koe i a koe ki te ꞌAtua. Te rāveꞌa mo aŋa nei meꞌe, hai kī ōꞌou ki a Iehoha a roto i te pure pe nei ē, ko haŋa ꞌā koe mo aŋa i tāꞌana meꞌe haŋa ki te hopeꞌa raꞌa. Mo aŋa ōꞌou i te meꞌe haŋa o te ꞌAtua, he haka tikeꞌa i a koe pahe pukuraŋa o Ietū (Mateo 11:29).
He papatito. “Ka papatito koe ꞌe ka haka maitaki tuꞌu hara a roto i te ohu tōꞌona ꞌīŋoa”. (Hechos 22:16.)
Ka aŋa ki te ꞌAtua hai haŋa. “Taꞌatoꞌa meꞌe e aŋa mai ena, ka aŋa rā meꞌe hai māhatu pahe aŋa iŋa ena mo Iehoha, ꞌe taꞌe mo te taŋata”. (Colosenses 3:23.)