Ka ŋaruhoa koe ki te ꞌAtua ki te hopeꞌa raꞌa

Mo ravaꞌa te ŋaruhoa ꞌe mo hāpaꞌo he aŋa rahi. Mo haka ꞌuhu mo riro he ŋaruhoa o te ꞌAtua, ꞌe mo hāpaꞌo tōꞌona hoꞌou, he vaꞌai atu rauhuru hauhaꞌa riva. Kī ꞌā e Ietū ki te nuꞌu haka roŋo ki a īa: “Mo te parautiꞌa e kume atu te kōrua vivi” (Juan 8:⁠32). ¿He aha te meꞌe i haŋa mo kī?

He pakoꞌo tuꞌu vivi i te hora nei ꞌā. E riva nō koe mo pakoꞌo mai te hāpī taꞌe parautiꞌa, e mai te reo⁠-⁠reo haka maraŋa era e te Tātane. Takoꞌa, he kore tuꞌu riꞌa⁠-⁠riꞌa e maꞌu ena e te rahi o te taŋata o te taꞌe aŋi⁠-⁠aŋi o ruŋa i te rāveꞌa riva⁠-⁠riva o Iehoha mo te taŋata taꞌatoꞌa (Romanos 8:⁠22). Te ŋaruhoa o te ꞌAtua ꞌina he riꞌa⁠-⁠riꞌa e tahi meꞌe, ꞌe ki te mate ꞌina takoꞌa (Hebreos 2:⁠14, 15).

He pakoꞌo tuꞌu vivi i te henua ꞌāpī o te ꞌAtua. Ka riro ena te henua pahe henua nehe⁠-⁠nehe, he kore tahi te tauꞌa, te maiūi, te toke, te tiŋaꞌi taŋata, te veve, te maruaki, te riꞌa⁠-⁠riꞌa, te taparahi e te aŋa tītika kore. Takoꞌa, e ko korohuꞌa e ko mate te taŋata. Te Puka o te ꞌAtua e kī rō ꞌā o ruŋa o Iehoha: “Mātaki ꞌā tuꞌu rima mo vaꞌai taꞌatoꞌa meꞌe pohe o te meꞌe ora taꞌatoꞌa” (Salmo 145:⁠16). ¡Ko te ora ka noho nei i ruŋa i te henua nehe⁠-⁠nehe!

Te ŋaruhoa o te ꞌAtua he ora ki te hopeꞌa raꞌa. Te ora ki te hopeꞌa raꞌa, he mahīa hopeꞌa o te nui⁠-⁠nui vaꞌai e Iehoha, ki te nuꞌu haŋa mo riro he ŋaruhoa ōꞌona (Romanos 6:⁠23). Ka manaꞌu iti⁠-⁠iti rā koe o ruŋa i te haꞌauraꞌa mo ora mo oho rō ai ōꞌou.

He ai tuꞌu hora mo aŋa te rauhuru meꞌe. Peaha ko haŋa ꞌā koe mo hāpī te haka taŋi te taꞌatoꞌa meꞌe, haka taŋi peho, he tarai riva⁠-⁠riva i te rauhuru meꞌe, koite ko haŋa ꞌā koe mo hāpī o ruŋa i te rauhuru manu tere henua ꞌe tiare. Koite takoꞌa, ko haŋa ꞌā koe mo reva ki te tahi kaiŋa ꞌe mo māhani ki te nuꞌu o ꞌira. I te ai e ko mate haka ꞌou koe, he ai tuꞌu hora mo aŋa taꞌatoꞌa meꞌe nei.

He ai tuꞌu hora mo ravaꞌa ŋaruhoa o te kaiŋa taꞌatoꞌa. I te meꞌe era he ora he oho rō ai koe, he ai tuꞌu hora mo māhani ki te tahi ŋaruhoa o Iehoha. He aŋi⁠-⁠aŋi koe i te rāua ꞌito⁠-⁠ꞌito ꞌe te rāua huru riva, ꞌe takoꞌa he riro koe tōꞌona ŋaruhoa. He haŋa koe ki a rāua ꞌe he haŋa takoꞌa atu rāua ki a koe (1 Corintios 13:⁠8). Te meꞌe ata riva, ka oho ena pē muꞌa i te rahi o te matahiti, he hio⁠-⁠hio he oho rō ai tuꞌu here pahe ŋaruhoa ki a Iehoha. Oīra, ¡ka ŋaruhoa koe ki te ꞌAtua ki te hopeꞌa raꞌa!