HĀPĪ 9
Ka aŋa te meꞌe haŋa era e te ꞌAtua koīa ko tuꞌu huaꞌai
“Ka haꞌamuri kōrua ki te kope aŋa era i te raŋi e i te henua.” (Revelación [Apocalipsis] 14:7)
Hai puka iti-iti nei a koe i aŋi-aŋi ai pe nei ē, i ruŋa i te Puka o te ꞌAtua e ai rō ꞌā rauhuru roŋo ka haꞌūꞌū atu era i a koe, e takoꞌa i tuꞌu huaꞌai. Ko haŋa ꞌā Iehoha mo koa riva-riva kōrua. Takoꞌa mo haꞌamuri ki a Īa, hai aŋa tahi taꞌana meꞌe haŋa era he raꞌe, “te tahi ŋā meꞌe era e vaꞌai takoꞌa rō atu” (Mateo 6:33). Ko haŋa ꞌā te ꞌAtua mo riro koe he repahoa ꞌoꞌona. Oīra e uꞌi te raveꞌa mo hio-hio mo oho te kōrua piri koīa ko te ꞌAtua, o te ai paꞌi, te meꞌe nei he meꞌe hopeꞌa o te nui-nui mo ravaꞌa e te taŋata (Mateo 22:37, 38).
1 KA HAKA HIO-HIO TUꞌU HERE KI A IEHOHA
TE MEꞌE KĪ E TE PUKA O TE ꞌATUA: “E he riro au he matuꞌa tane mo kōrua e a kōrua he riro he poki tane e vahine ꞌaꞌakuꞌ, e kī ena e Iehoha” (2 Corintios 6:18). Ko haŋa a Iehoha mo riro he repahoa ꞌoꞌou, e te pure he raveꞌa hopeꞌa o te riva-riva mo hahine ki a Īa. Oīra i kī mai ai e Iehoha: “ꞌIna ko noho te pure te oho” (1 Tesalonicenses 5:17). A Īa e haŋa rō ꞌā mo ꞌaꞌamu e koe i te meꞌe e haka tipa-tipa ena i a koe, e takoꞌa te ŋā meꞌe era i roto i te hopeꞌa nui o tuꞌu mahatu (Filipenses 4:6). Mo pure koe koīa ko tuꞌu huaꞌai, he tikeꞌa e rāua pe nei ē, te ꞌAtua he matuꞌa parautīꞌa moꞌou.
Mo vānaŋa ki te ꞌAtua, e haka roŋo takoꞌa ki a Īa. ¿Pe hē koe ana haka roŋo? Hai hāpī i taꞌana vānaŋa e hai hāpī takoꞌa te rauhuru puka e toꞌo mai era mai ruŋa (Salmo 1:1, 2). E haka topa i te manaꞌu o ruŋa i te meꞌe e hāpī era e koe (Salmo 77:11, 12). Takoꞌa e vari koe ki te kona piri era o te taŋata haka ꞌite o ruŋa o Iehoha e ꞌina ko haka rē te oho ki ꞌira (Salmo 122:1-4).
Te rua huru mo haka hio-hio tuꞌu here ki te ꞌAtua, e vānaŋa o ruŋa i a Īa ki te tahi taŋata. Mo aŋa mo oho koe peira he ata hahine koe ki a Īa (Mateo 28:19, 20).
TAꞌA MEꞌE MO AŊA:
E haka tapa te hora mo pure e mo taiꞌo i te Puka o te ꞌAtua paurō te mahana
Ka hāpī ki tuꞌu huaꞌai mo tapa i te meꞌe taꞌatoꞌa o te ꞌAtua, raꞌe ki te kori, reka e te tahi meꞌe
2 E KOA I TE HORA HAꞌATAꞌA E TE HUAꞌAI MO TE ꞌATUA
TE MEꞌE KĪ E TE PUKA O TE ꞌATUA: “Ka hahine kōrua ki te ꞌAtua e he hahine atu a Īa ki a kōrua” (Santiago 4:8). E haka tapa te mahana e te hora i te tapati, mo te hora haꞌataꞌa e te huaꞌai mo te ꞌAtua (Génesis 18:19). E taꞌe ko te meꞌe nō nei te meꞌe mo aŋa: e tapa koe i te ꞌAtua paurō te mahana, e ka haka hio-hio ka oho te here o tuꞌu huaꞌai ki te ꞌAtua. Te Puka o te ꞌAtua e kī rō ꞌā: ‘E hāpī o ruŋa o Iehoha ka noho era koe i tuꞌu hare, ka haꞌere ena koe i te ara, i te hora era ka moe ena koe, e i te hora era ka ꞌara ena koe’ (Deuteronomio 6:6, 7). E manaꞌu ꞌe e aŋa koe pē Josué hora kī era: “E a au e toꞌoku hare, a mātou ki a Iehoha nō ka haka roŋo nei” (Josué 24:15).
TAꞌA MEꞌE MO AŊA:
Paurō te tapati e uꞌi te meꞌe tano mo hāpī ki taꞌa poki, taꞌa viꞌe, a te roa era mo haꞌūꞌū ki a rāua